କେନ୍ଦ୍ରାପଡା: ସ୍ଥାନ କେନ୍ଦ୍ରାପଡା ରାଜନଗର ଅଞ୍ଚଳ । ବୟସ 20 ଖଣ୍ଡେ । ରାଜନଗର ଅଞ୍ଚଳର କଲେଜ ଛାତ୍ର ସମସ୍ତେ । ହେଲେ ହାତରେ ପାଠ୍ୟ ପୁସ୍ତକ ବଦଳରେ ଅଛି ଧଳା ଜହର ସାଙ୍ଗକୁ ଗଞ୍ଜେଇ । ଆଉ କଲେଜ ଯିବା ବାଟରେ ଗଞ୍ଜେଇ ଓ ବ୍ରାଉନ ସୁଗାରର ମଜା ନେଉଛନ୍ତି । ସେ ପୁଣି କଦଳୀ କାନ୍ଦି ଭିତରେ । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି ।
ସୂଚନା ଅନୁସାରେ କେନ୍ଦ୍ରାପଡାରେ ଦିନକୁ ଦିନ ବ୍ୟାପୁଛି ବ୍ରାଉନ ସୁଗାର କାରବାର । କିଛି ଦିନ ତଳେ କେନ୍ଦ୍ରାପଡା ସହରରୁ ୨୫ ଗ୍ରାମ ବ୍ରାଉନ ସୁଗାର ଜବତ ହୋଇଥିଲା । ଯାହା ସ୍ପଷ୍ଟ କରିଥିଲା ଜିଲ୍ଲାରେ ବ୍ୟାପକ ମାତ୍ରାରେ ବ୍ରାଉନ ସୁଗାର କାରବାର ହେଉଛି ।
ଏବେ ଏହାକୁ ଆହୁରି ସ୍ପଷ୍ଟ କରିଛି ଭାଇରାଲ ହୋଇଥିବା ଏହି ଭିଡିଓଟିରୁ । ଉକ୍ତ ଭିଡିଓରେ ରାଜନଗରର ଅଞ୍ଚଳର ଏକ ନିର୍ଦିଷ୍ଟ କଲେଜର ଛାତ୍ରମାନେ କୌଣସି ଏକ ସ୍ଥାନରେ ବ୍ରାଉନ ସୁଗାର ଓ ଗଞ୍ଜେଇ ସେବନ କରୁଛନ୍ତି ଏହାସହ ପାଖରେ କଞ୍ଚା କଦଳୀ ମଧ୍ୟ ଅଛି । ଏଥିରୁ ଆଶଙ୍କା କରାଯାଉଛି କଞ୍ଚା କଦଳୀ ମାଧ୍ୟମରେ ଧଳା ଜହରର ବେପାର ହେଉଛି । ଉକ୍ତ ଭିଡିଓରେ ଥିବା ଯୁବକ ବା ଛାତ୍ରମାନେ କଲେଜ ୟୁନିଫର୍ମ ମଧ୍ୟ ପରିଧାନ କରିଛନ୍ତି । ଯାହା ଚିନ୍ତାଜନକ । ପ୍ରଶ୍ନ ଉଠୁଛି ଯଦି କଲେଜ ଛାତ୍ରମାନଙ୍କର ହାତରେ ବ୍ରାଉନ ସୁଗାର ମିଳିଯାଉଛି ତେବେ ନିଶା ସେବନକାରୀଙ୍କ କଥା ନକହିବା ଭଲ ।
ଏହାକୁ ନେଇ ଜିଲ୍ଲାବାସୀ ଏବେ ଚିନ୍ତାରେ । କାରଣ କଲେଜ ଛାତ୍ର ମାନେ ବ୍ରାଉନ ସୁଗାର ସେବନ କରିବା ଘଟଣାକୁ ଆହୁରି ଚିନ୍ତା ବଢାଇ ଦେଇଛି । ଫଳରେ ଏହି ଘଟଣାକୁ ପୋଲିସ ଗମ୍ଭୀରତାର ସହ ତଦନ୍ତ କରି କେନ୍ଦ୍ରାପଡାରେ ବ୍ରାଉନ ସୁଗାର ବେପାର କରୁଥିବା କିଙ୍ଗପିନକୁ ଧରିବାକୁ ଦାବି କରୁଛନ୍ତି ବୁଦ୍ଧୀଜିବୀ । ଏହାସହ କଲେଜ ଛାତ୍ରଙ୍କୁ ମଧ୍ୟ ସଚେତନତା କରିବାକୁ ଦାବି କରିଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
