କେନ୍ଦ୍ରାପଡା: ବଡଭାଇକୁ ପେଟ୍ରୋଲ ଢାଳି ମାରିଦେବାକୁ ଉଦ୍ୟମ କଲା ସାନଭାଇ । ଜମିବାଡ଼ି ବିବାଦକୁ କେନ୍ଦ୍ର କରି ବଡ଼ଭାଇ ଶୋଇଥିବା ବେଳେ ସାନଭାଇ ପେଟ୍ରୋଲ ଢାଳି ନିଆଁ ଲଗାଇ ଦେଇଥିବା ଅଭିଯୋଗ ହୋଇଛି । ଏଭଳି ଅଭାବନୀୟ ଘଟଣା ଘଟିଛି କେନ୍ଦ୍ରାପଡା ଜିଲ୍ଲା ରାଜକନିକା ଥାନା ଅନ୍ତର୍ଗତ ଝାଡ଼ମାଳ ଗାଁରେ ।
ଗୁରୁତର ଅବସ୍ଥାରେ ବଡ଼ଭାଇ ବିଚିତ୍ର ପ୍ରଧାନକୁ ପ୍ରଥମେ ରାଜକନିକା ଗୋଷ୍ଠି ସ୍ବାସ୍ଥ୍ୟକେନ୍ଦ୍ର ଓ ପରେ କଟକ ବଡ଼ ମେଡିକାଲକୁ ସ୍ଥାନାନ୍ତରିତ କରାଯାଇଛି । ଆଜି ଦିନ ଗୋଟାଏ ସମୟରେ ବଡ଼ଭାଇ ବିଚିତ୍ର ପ୍ରଧାନ ଶୋଇଥିବା ବେଳେ ସାନଭାଇ ପବିତ୍ର ପ୍ରଧାନ ହତ୍ୟା କରିବା ଉଦେଶ୍ୟରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲା । ନିଆଁ ଲାଗିବା କ୍ଷଣି ଅର୍ଦ୍ଧଦଗ୍ଧ ବିଚିତ୍ର ଘରୁ ବାହାରି ଆସି ତଳେ ପଡି ଯାଇଥିଲେ । ଘରୁ ବିଚିତ୍ର ବାହାରି ଆସିବା ପରେ ଚାଳ ଛପର ଘର ମଧ୍ୟ ସମ୍ପୂର୍ଣ୍ଣ ଭାବେ ଜାଳି ଯାଇଥିଲା । ଏହି ଘଟଣାରେ ସାନଭାଇ ପବିତ୍ର ପ୍ରଧାନକୁ ରାଜକନିକା ଥାନା ପୋଲିସ ଅଟକ ରଖି ଅଧିକ ତଦନ୍ତ ଚଳାଇଛି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି,ଇଟିଭି ଭାରତ
