ଢେଙ୍କାନାଳ: ଚଳିତ ପୌର ନିର୍ବାଚନର ପ୍ରାର୍ଥୀପତ୍ର ଦାଖଲ ଆଉ ଗୋଟିଏ ଦିନ ବାକି ରହିଛି । ତେବେ ଢେଙ୍କାନଳ ପୌର ଅଧ୍ୟକ୍ଷା ପଦବୀ ସାଧାରଣ ବର୍ଗ ମହିଳାଙ୍କ ପାଇଁ ସଂରକ୍ଷିତ ରହିଥିବା ବେଳେ ବିଜେପି ତା’ର ଅଧ୍ୟକ୍ଷା ପ୍ରାର୍ଥୀ ଘୋଷଣା କରି ସାରିଛି । ଏପରିକି ଢେଙ୍କାନାଳ ପୌର ଅଧ୍ୟକ୍ଷା ଭାବେ ନିର୍ବାଚନ ଲଢ଼ିବାକୁ ଆଜି(ରବିବାର) ବିଜେପି ଦଳ ପକ୍ଷରୁ ପୂର୍ବତନ କାଉନସିଲର ଜୟନ୍ତୀ ପାତ୍ର ତାଙ୍କର ପ୍ରାର୍ଥୀପତ୍ର ଦାଖଲ କରିଛନ୍ତି ।
ଏହି ଉପଲକ୍ଷେ ବିଜେପି ପକ୍ଷରୁ ସହରର ବାଜି ଚୌକ ଛକରୁ ଜୟନ୍ତୀ ଏକ ବିଶାଳ ଶୋଭାଯାତ୍ରାରେ ସହର ପରିକ୍ରମା କରି ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚିଥିଲେ । ଏହି ଶୋଭାଯାତ୍ରାରେ ବିଜେପିର ବରିଷ୍ଠ ନେତା ତଥା ପୂର୍ବତନ ରାଜ୍ୟସଭା ସାଂସଦ ରୁଦ୍ର ପାଣି, ପୂର୍ବତନ ବିଧାୟକ କୃଷ୍ଣଚନ୍ଦ୍ର ପାତ୍ର, ଜିଲ୍ଲା ସଭାପତି ନରେଶ ମହାପାତ୍ର ପ୍ରମୁଖ ସାମିଲ ଥିଲେ । ପ୍ରାର୍ଥୀପତ୍ର ଦାଖଲ କରି ଢେଙ୍କାନାଳ ପୌରବାସୀଙ୍କ ଲାଗି ରହିଥିବା ବିଭିନ୍ନ ସମସ୍ୟା ସମାଧାନ ଓ ସ୍ଵଚ୍ଛ ସହର ଗଢି ତୋଳିବାକୁ ତାଙ୍କୁ ପୌରବାସୀ ସୁଯୋଗ ଦେବେ ବୋଲି ଆଶା ପୋଷଣ କରିଛନ୍ତି ଜୟନ୍ତୀ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
