ଭୁବନେଶ୍ବର: ପାଟକୁରା ନିର୍ବାଚନ ବେଳେ ହୋଇପାରେ ଇଭିଏମ ଟ୍ୟାମ୍ପରିଂ । ଏଥିପାଇଁ ଜିଲ୍ଲାପାଳଙ୍କ ଅଫିସରେ 100ଟି ଇଭିଏମ ପ୍ରସ୍ତୁତ ରହିଛି । କିଛିବି ଜାଲିଆତି କରି ବାଜିମାତ କରିବାକୁ ଲକ୍ଷ୍ୟ ରଖିଛି ଶାସକ ଦଳ । ଏଭଳି କିଛି ଆଶଙ୍କା କରିଛନ୍ତି ପାଟକୁରାର ବିଜେପି ପ୍ରାର୍ଥୀ ବିଜୟ ମହାପାତ୍ର ।
ଆଜି ପାଟକୁରା ନିର୍ବାଚନ ପାଇଁ ଚାଲିଛି ମତଦାନ । ମଇଦାନରେ 10 ପ୍ରାର୍ଥୀ । ଆଉ ଠିକ ଏତିକିବେଳେ ଇଭିଏମ ଟ୍ୟାମ୍ପରିଂ କରିବାକୁ ଶାସକ ଦଳ ଯୋଜନା କରୁଥିବା ଆଶଙ୍କା କରିଛନ୍ତି ବିଜୟ । ଦିନ ୧୨ଟା ପରେ ବଦଳାଯିବ ଇଭିଏମ । ଏଭଳି ବିସ୍ଫୋରକ ବୟାନ ଦେଇଛନ୍ତି ବିଜେପି ପ୍ରାର୍ଥୀ ବିଜୟ ମହାପାତ୍ର । ଗରଦପୁର ବ୍ଲକ ତଳକୁସୁମା ଗୋବିନ୍ଦପୁର ଉଚ୍ଚ ବିଦ୍ୟାଳୟର ୨୬୩ନଂ ବୁଥରେ ମତଦାନ କରିବା ଅବସରରେ ଏଭଳି ମନ୍ତବ୍ୟ ଦେଇ ସେ ଜିଲ୍ଲା ପ୍ରଶାସନକୁ ସମାଲୋଚନା କରିଛନ୍ତି ।
ବିଜୟଙ୍କ ଅଭିଯୋଗ ମୁତାବକ ଦିନ ୧୨ଟା ପରେ ପାଖାପାଖି ୧୦୦ଟି ଇଭିଏମ ଜିଲ୍ଲାପାଳଙ୍କ କାର୍ଯ୍ୟାଳୟରୁ ବାହାରି ନିର୍ବାଚନ ମଣ୍ଡଳୀର ବିଭିନ୍ନ ସ୍ଥାନକୁ ଯିବ । ବିଜେଡି ସପକ୍ଷରେ ଏହି ଇଭିଏମ ଗୁଡିକରେ ଭୋଟ ରହିଥିବ ବୋଲି ଅଭିଯୋଗ କରିଛନ୍ତି । ଅନ୍ୟପଟେ କାଁ ଭାଁ କିଛି ବୁଥକୁ ଛାଡି ଦେଲେ ସବୁଠି ନିର୍ବାଚନ ଶାନ୍ତିଶୃଙ୍ଖଳାରେ ହେଉଥିବା କହିଛନ୍ତି ବିଜେପି ପ୍ରାର୍ଥୀ । ପାଟକୁରାବାସୀ ବିଜୟଙ୍କୁ ବିଜୟୀ କରାଇବା ପାଇଁ ନିଷ୍ପତ୍ତି ନେଇସାରିଛନ୍ତି । ହେଲେ ଶାସକ ଦଳ ଇଭିଏମ ଗପଲାତି ନେଇ ଆଶଙ୍କା କରିଛନ୍ତି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
