କେନ୍ଦ୍ରାପଡା: ଯମଜ ଶିଶୁକନ୍ୟା ଜନ୍ମ ଦେବାରୁ ମହିଳାଙ୍କୁ ହତ୍ୟା । ଏଭଳି ଏକ ସାଂଘାତିକ ଅଭିଯୋଗ ଆସିଛି କେନ୍ଦ୍ରାପଡ଼ା ଜମ୍ବୁ ମେରାଇନ ଥାନା ଅନ୍ତର୍ଗତ ବଉଳକଣୀ ଗ୍ରାମରୁ ।
ସୂଚନାନୁଯାୟୀ, ଗ୍ରାମର ଭୋଳା ମିର୍ଦ୍ଧାଙ୍କ ପତ୍ନୀ ବନ୍ଦନା ମଣ୍ଡଳ ଗତ ସାତଦିନ ତଳେ କେନ୍ଦ୍ରାପଡ଼ା ମୁଖ୍ୟ ଚିକିତ୍ସାଳୟରେ ଦୁଇଟି କନ୍ୟା ସନ୍ତାନକୁ ଜନ୍ମ ଦେଇଥିଲେ । ପୁର୍ବରୁ ଅଧିକ ଯୌତୁକ ଦାବି ଓ ସ୍ୱାମୀଙ୍କର ପରକୀୟା ସମ୍ପର୍କ ପାଇଁ ବନ୍ଦନାଙ୍କୁ ଶାଶୂଘର ଲୋକେ ବାରମ୍ବାର ନିର୍ଯ୍ୟାତନା ଦେଉଥିବା ଅଭିଯୋଗ କରିଛନ୍ତି ବନ୍ଦନାଙ୍କ ବାପଘର ଲୋକେ ।
ତେବେ ଯମଜ କନ୍ୟା ସନ୍ତାନକୁ ଜନ୍ମ ଦେଇଥିବାରୁ ଡାକ୍ତରଖାନାରେ ବନ୍ଦନାଙ୍କ ବାପାଙ୍କୁ ବନ୍ଦନାଙ୍କ ସ୍ୱାମୀ ଓ ତାଙ୍କ ଦିଅର ଧମକ ଦେଇଥିଲେ ବୋଲି ଅଭିଯୋଗ ଫର୍ଦ୍ଦରେ ଉଲ୍ଲେଖ କରିଛନ୍ତି ବନ୍ଦନାଙ୍କ ବାପା ଚିତ୍ତରଞ୍ଜନ ମଣ୍ଡଳ ।
ଶୁକ୍ରବାର ଅପରାହ୍ନରେ ବନ୍ଦନା, ଲୁଗା ଦ୍ୱାରା ବେକରେ ରଶି ଲଗାଇ ଆତ୍ମହତ୍ୟା କରିଥିବା କଥା ବନ୍ଦନାଙ୍କ ବାପଘରକୁ ଖବର ଯାଇଥିଲା । ଏହାପରେ ଚିତ୍ତରଂଜନ ଆସି ଘଟଣା ସ୍ଥଳରେ ପହଞ୍ଚି ପାରିପାର୍ଶ୍ବିକ ଅବସ୍ଥାକୁ ଦେଖି ଏହା ଆତ୍ମହତ୍ୟା ନୁହେଁ ହତ୍ୟା ବୋଲି ଜମ୍ବୁ ମେରାଇନ ଥାନାରେ ଅଭିଯୋଗ କରିଥିବା ଜଣାପଡିଛି ।
କେନ୍ଦ୍ରାପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
