ଫୁଲବାଣୀ: ତ୍ରିସ୍ତରୀୟ ପଂଚାୟତ ନିର୍ବାଚନର ତୃତୀୟ ଦିନରେ କନ୍ଧମାଳ ଜିଲ୍ଲା କଂଗ୍ରେସ ପ୍ରାର୍ଥୀଙ୍କ ପକ୍ଷରୁ ଉପଜିଲ୍ଲାପାଳ ନିକଟରେ ନାମାଙ୍କନ ପତ୍ର ଦାଖଲ ହୋଇଛି । ଫୁଲବାଣୀ ନିର୍ବାଚନ ମଣ୍ଡଳୀର ୪ଟି ଜୋନରୁ ପ୍ରାର୍ଥୀମାନେ ନିଜ ନିଜର ପ୍ରାର୍ଥୀପତ୍ର ଦାଖଲ କରିଛନ୍ତି ।
ଖଜୁରିପଡା ୪ନମ୍ବର ଜୋନରୁ ଚନ୍ଦ୍ରା ବେହେରା, ୩ରୁ ସ୍ବପ୍ନାରାଣୀ ମଲ୍ଲିକ, ସେହିଭଳି ୧୨ ନମ୍ବର ଜୋନରୁ ଅଙ୍ଗଦ ଦିଗାଲ ଏବଂ 14ନମ୍ବର ଜୋନରୁ ଶିବାନୀ କହଁର ନାମାଙ୍କନ ପତ୍ର ଦାଖଲ କରିଛନ୍ତି ।
ତେବେ କଂଗ୍ରେସ ଜିଲ୍ଲା ସଭାପତି ଅନାମ ନାୟକ ବିଜେଡି ଓ ବିଜେପି ସରକାରଙ୍କ ଦୁର୍ନୀତି ଓ ମିଥ୍ୟା ପ୍ରତିଶୃତି ଏବଂ ଅତ୍ୟାବଶ୍ୟକ ସାମଗ୍ରୀର ଦରଦାମ ସହିତ ପେଟ୍ରୋଲ, ଡିଜେଲ ମୂଲ୍ୟ ବୃଦ୍ଧିରେ ସାଧାରଣ ଗରିବ ଲୋକ ପେଷି ହୋଇଗଲେଣି ବୋଲି କହିଛନ୍ତି । ଏହି ସବୁ ମୁଦ୍ଦାକୁ ଭୋଟରଙ୍କ ପାଖକୁ ନେଇ ଯିବୁ ବୋଲି କହିଛନ୍ତି କଂଗ୍ରେସ ଜିଲ୍ଲା ସଭାପତି ।
ସେହିପରି ବିଜେପିର 20 ଓ 21ରେ ନାମାଙ୍କନ ପତ୍ର ଦାଖଲ କରିବାର କାର୍ଯ୍ୟକ୍ରମ ରହିଛି । ଜି.ଉଦୟଗିରି ନିର୍ବାଚନ ମଣ୍ଡଳୀର ୭ଟି ଜୋନରୁ ବିଜେଡି ପ୍ରାର୍ଥୀ ବାଲିଗୁଡା ଉପଜିଲ୍ଲାପାଳଙ୍କ ପାଖରେ ପ୍ରାର୍ଥୀ ପତ୍ର ଦାଖଲ କରିଛନ୍ତି ।
ଅନ୍ୟପଟେ ଫୁଲବାଣୀ ନିର୍ବାଚନ ମଣ୍ଡଳୀର 5ଟି ଜିଲ୍ଲା ପରିଷଦ ଜୋନର ଫୁଲବାଣୀ ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ପ୍ରାର୍ଥୀ ପତ୍ର ଦାଖଲ ଚାଲିଥିବା ବେଳେ ବାଲିଗୁଡାର 13ଟି ଜୋନ ଓ ଜି.ଉଦୟଗିରିର 7ଟି ଜୋନ ପାଇଁ ବାଲିଗୁଡା ଉପଜିଲ୍ଲାପାଳଙ୍କ ପାଖରେ ପ୍ରାର୍ଥୀ ପତ୍ର ଦାଖଲ ପ୍ରକିୟା ଜାରି ରହିଛି ।
କନ୍ଧମାଳରୁ ସଞ୍ଜୟ ପାତ୍ର, ଇଟିଭି ଭାରତ
