ଫୁଲବାଣୀ: ବିଧାନସଭା ସଦାଚାର କାମିଟିର ଏକ ୫ ଜଣିଆ ଟିମ କନ୍ଧମାଳ ଗସ୍ତ କରିଛନ୍ତି । ଫୁଲବାଣୀ ଜିଲ୍ଲା ପରିଷଦ ସମ୍ମିଳନୀ କକ୍ଷ ଠାରେ ଜିଲ୍ଲା ପ୍ରଶାସନ ଓ ଜିଲ୍ଲା ସ୍ତରୀୟ ଅଧିକାରୀମାନଙ୍କ ସହ ଏକ ବୈଠକରେ ଯୋଗ ଦେଇଥିଲେ ଏହି ଟିମ । ବିଧାନସଭା ବୁକ୍ସ ଓଫ ସର୍କୁଲର ୪୭ ଆଧାରରେ ସମସ୍ତ ଲୋକ ପ୍ରତିନିଧି ଓ ପ୍ରଶାସନିକ ଅଧିକାରିଙ୍କ ମଧ୍ୟରେ ଉତ୍ତମ ସମ୍ପର୍କ ସ୍ଥାପନ ହେଉଛି କି ନାହିଁ ଓ ଠିକ ଭାବେ ଅନୁପାଳନ ହେଉଛି କି ନାହିଁ ତାହା ଅନୁଧ୍ୟାନ କରିଛି ଟିମ । ଜନପ୍ରତିନିଧି ଓ ସରକାରୀ ଅଧିକାରୀଙ୍କ ମଧ୍ୟରେ ସମନ୍ୱୟ ରହିଲେ ସରକାରଙ୍କର ଜନମଙ୍ଗଳକାରୀ ଯୋଜନା ଗୁଡ଼ିକ ଲୋକମାନଙ୍କ ପାଖରେ ସହଜରେ ପହଞ୍ଚି ପାରିବ । ସେଥିପାଇଁ ସମସ୍ତଙ୍କର ଇଚ୍ଛା ଶକ୍ତି ମଧ୍ୟ ଥିବା ଦରକାର । ହୋଇଥିବା ବୈଠକରେ ମତ ପ୍ରକାଶ ପାଇଛି ।
ବିଧାନସଭାର କନଷ୍ଟିଚୁଏନ୍ସି ଡେଭେଲେପ୍ ମେଣ୍ଟ କମିଟି ରହିଛି ତାହା କିପରି କାର୍ଯ୍ୟକ୍ଷମ ହେଉଛି ସେଥିରେ ବିଧାୟକ ମାନଙ୍କ ଅଂଶୀଦାର ରହୁଛି ନାହିଁ ପ୍ରଶାସନ ସହ ଆଲୋଚନା କରିଥିଲା କମିଟି । ଆଲୋଚନାରେ ବଡ଼ଚଣା ବିଧାୟକ ଅମର ପ୍ରସାଦ ଶତପଥି । ସେ କହିଛନ୍ତି, ''ବିଧାୟକ ଓ କାର୍ଯ୍ୟନିର୍ବାହୀ ଗୋଟିଏ ମୁଦ୍ରାର ଦୁଇଟି ପାର୍ଶ୍ବ ଅଟନ୍ତି । ଜିଲ୍ଲାର ଜନ ପ୍ରତିନିଧି ଓ ଜନସେବକ ବା ସରକାରୀ ଅଧିକାରୀଙ୍କ ମିଳିତ ଉଦ୍ୟମରେ ହିଁ ଜିଲ୍ଲାର ଉନ୍ନତି ସମ୍ଭବ ହୋଇଥାଏ । ସେମାନଙ୍କ ମଧ୍ୟରେ ସବୁବେଳେ ସମନ୍ୱୟ ରହିବା ଆବଶ୍ୟକ । ସରକାରୀ ଅଧିକାରୀମାନେ ସବୁବେଳେ ବୁକ୍ ସର୍କୁଲାର୍ ୪୭କୁ ମାନିବା ଦରକାର ।''
ସେହିପରି ବିଧାୟକ ଭୂପିନ୍ଦର ସିଂ ମଧ୍ୟ ଟିମ୍ ୱାର୍କକୁ ଗୁରୁତ୍ୱ ଦେଇଥିଲେ । କେବଳ ଜନ ପ୍ରତିନିଧି ନୁହଁନ୍ତି ଯେ କୌଣସି ସାଧାରଣ ଲୋକଙ୍କୁ ସେବା ଯୋଗାଇ ଦେବା ସହିତ ସମାନ ଗୁରୁତ୍ୱ ଦେବା ସରକାରୀ ଅଧିକାରୀ କିମ୍ବା କର୍ମଚାରୀ ମାନଙ୍କର କର୍ତ୍ତବ୍ୟ ହେବା ଉଚିତ । କାରଣ ସେମାନେ ନିଜର ଭୋଟ୍ ଦେଇ ଜନ ପ୍ରତିନିଧିମାନଙ୍କୁ ନିର୍ବାଚିତ କରିଛନ୍ତି । ଏମାନେ ସେହି ଲୋକମାନଙ୍କ ପାଖରେ ଉତ୍ତରଦାୟୀ । ତେଣୁ ସେହି ଲୋକମାନଙ୍କର ସମସ୍ୟା ସମାଧାନ କରିବା ଉଭୟଙ୍କର ଦାୟିତ୍ୱ । ପ୍ରତି କାର୍ଯ୍ୟାଳୟ ବୁକ୍ ସର୍କୁଲାର୍ ୪୭କୁ ଅନୁସରଣ କରିବା ନିହାତି ଆବଶ୍ୟକ । ଯଦି ବା କେଉଁ କାର୍ଯ୍ୟାଳୟରେ ତାହା ନାହିଁ ସେମାନେ ସଂଗ୍ରହ କରି ରଖିବା ଆବଶ୍ୟକ ବୋଲି କହିଥିଲେ ବିଧାୟକ ଭୂପିନ୍ଦର ସିଂ।
ଏହା ବି ପଢନ୍ତୁ...ବିଧାନସଭା ସଦାଚାର କମିଟିର ମାଲକାନଗିରି ଗସ୍ତ
ଜନସାଧାରଣ ବିଧାୟକ ତଥା ଅନ୍ୟ ଜନ ପ୍ରତିନିଧିମାନଙ୍କୁ ପ୍ରତିଦିନ ସେମାନଙ୍କ ସମସ୍ୟା ଦର୍ଶାଇ ଦରଖାସ୍ତ ଦେଉଛନ୍ତି । ସେମାନେ ସେଗୁଡ଼ିକୁ ସଂପୃକ୍ତ ଅଧିକାରୀମାନଙ୍କ ପାଖକୁ କାର୍ଯ୍ୟକାରୀତା ପାଇଁ ପଠାଇଥାନ୍ତି କାରଣ ସେମାନେ ତାଙ୍କ ଦ୍ୱାରା ନିର୍ବାଚିତ ହୋଇଛନ୍ତି । ଯଦି ସରକାରୀ ଅଧିକାରୀମାନେ ସେଗୁଡ଼ିକୁ କାର୍ଯ୍ୟକାରୀତା କରିବା ପାଇଁ ଗୁରୁତ୍ୱ ଦେବେନି ତେବେ ସେମାନେ ସେହି ଲୋକମାନଙ୍କୁ କଣ କହିବେ ସେମାନେ ଜନ ପ୍ରତିନିଧିମାନଙ୍କ ଉପରେ ଭରସା ତୁଟାଇଦେବେ ବୋଲି ବୈଠକରେ କହିଛନ୍ତି ବିଧାୟକ ଅରବିନ୍ଦ ଢାଲି ।
ପ୍ରକାଶ ଥାଉ କି, ଏହା ପୂର୍ବରୁ ଏହି କିମିଟି ମାଲକାନଗିରି ଜିଲ୍ଲା, ଗଜପତି, ରାୟଗଡା ଜିଲ୍ଲା ଗସ୍ତ କରିଥିଲେ । ଆଗକୁ କଳାହାଣ୍ଡି, ନବରଙ୍ଗପୁର ଓ ନୂଆପଡା ଜିଲ୍ଲା ଗସ୍ତ କରିବାର କାର୍ଯ୍ୟକ୍ରମ ରହିଛି ବୋଲି ସୂଚନା ଦେଇଛନ୍ତି ବିଧାୟକ ଅମର ଶତପଥୀ ।
ଇଟିିଭି ଭାରତ, କନ୍ଧମାଳ
