ଫୁଲବାଣୀ: ପୁଣି ମାତିଲେ ମାଓବାଦୀ । କିଛିଦିନର ନିରବତା ପରେ ପୁଣି ମାଓବାଦୀଙ୍କ ବର୍ବରକାଣ୍ଡ ଦେଖିବାକୁ ମିଳିଛି । ମାଓବାଦୀମାନେ ଫିରିଙ୍ଗିଆ ଥାନା ସୁମେରୁବନ୍ଧ ପଞ୍ଚାୟତର କିଲରପଙ୍ଗାରେ ଠିକାଦାରଙ୍କୁ ହତ୍ୟା କରିଥିବା ସୂଚନା ମିଳିଛି ।
ଶନିବାର ରାତିରେ 10ରୁ 15 ସଶସ୍ତ୍ର ମାଓବାଦୀ, ସ୍ଥାନୀୟ ଠିକାଦାର ତଥା ଛେଳି ବେପାରୀ କୈଳାଶ ଦିଗାଲଙ୍କୁ ଗୁଳି କରି ହତ୍ୟା କରିଥିବା ଖବର ମିଳିଛି । ହତ୍ୟାପରେ ମାଓବାଦୀମାନେ ସେଠାରେ କେକେବିଏନ ଡିଭିଜନ ପକ୍ଷରୁ ଏ ହତ୍ୟା କରାଯାଇଥିବାର ଏକ ପୋଷ୍ଟର ପକାଇଥିବା ଦେଖିବାକୁ ମିଳିଛି । ପୋଷ୍ଟରରେ କୈଳାଶ ପୋଲିସ ଇନଫରର୍ମର ଥିବା ଦର୍ଶାଯାଇଛି ।
ସୂଚନା ଥାଉକି, କୈଳାଶଙ୍କ ଗାଁ ଡମାଙ୍ଗପଦର ହୋଇଥିବାବେଳେ ସେ ଛେଳି କିଣିବା ପାଇଁ କିଲରପଙ୍ଗା ଯାଇଥିଲା । ସେଠାରେ ତାଙ୍କୁ ହତ୍ୟା କରାଯାଇଛି ।
ଏନେଇ ଖବର ପାଇବା ପରେ ଫିରିଙ୍ଗିଆ ପୋଲିସ ଘଟଣା ସମ୍ପର୍କରେ ତଦନ୍ତ ଆରମ୍ଭ କରିଛି । ତେବେ ଏହା ଦୁର୍ଗମ ଏବଂ ମାଓ ପ୍ରବଣ ଅଞ୍ଚଳ ହୋଇଥିବାରୁ ପୋଲିସ ଏସଓପି ନିୟମକୁ ପାଳନ କରି ଘଟଣାସ୍ଥଳକୁ ଯିବେ ବୋଲି ସୂଚନା ମିଳିଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
