ଫୁଲବାଣୀ: ଆଜିକାଲିର ଦୁନିଆରେ ଭଲ ମଣିଷଟିଏ ପାଇବା ଭାରି କଷ୍ଟକର । କିଛି ଖଳ ପ୍ରକୃତି ଲୋକମାନଙ୍କ ପାଇଁ ଆମେ ସମସ୍ତେ ଦୁନିଆକୁ ଏବେ ସନ୍ଦେହ ଦୃଷ୍ଟିରେ ଦେଖି ଚାଲିଛୁ । ଅଚିହ୍ନା ସ୍ଥାନରେ କି ଟ୍ରେନରେ ଯାତ୍ରା କରିବା ବେଳେ କାହାରିକୁ ସହଜରେ ଆମେ ବିଶ୍ୱାସ କରିପାରୁନାହୁଁ । ହେଲେ ଏ ଦୁନିଆ ଭିତରେ ଏବେ ବି ଭଲ ମଣିଷ ଅଛନ୍ତି । ଆଉ ସେହିମାନଙ୍କ ପାଇଁ ଆଜି ବି ବଞ୍ଚିଛି ମାନବିକତା ଓ ସଚ୍ଚୋଟ ପଣିଆ । ଯାହାର ଜ୍ବଳନ୍ତ ଉଦାହରଣ ପାଲଟିଛନ୍ତି କନ୍ଧମାଳ ଘୁ.ଉଦୟଗିରିର ମହମ୍ମଦ ନାଜୁର୍ । ଦାରିଦ୍ର୍ୟର କଷା ଘାତରେ ବି ତାଙ୍କର ମଣିଷ ପଣିଆଟା ହଜି ଯାଇନି ।
ତେବେ ଭାବିଲେ, ରାସ୍ତାରେ ଯାଉ ଯାଉ ଯଦି ଜଣେ ଗୋଟିଏ ମନି ପର୍ସଟେ ପାଉଛି । ଆଉ ସେଥିରେ କିଛି ଟଙ୍କା ଅଛି । ସେଠାରେ କଣ ପ୍ରଥମେ ସେ ମଣିଷଟି ପର୍ସଟି କାହାର ଚିନ୍ତା କରୁଛି ? ଟଙ୍କାକୁ କେମିତି ସେ ପର୍ସ ବାଲାକୁ ଫେରାଇ ଦେବ ଭାବୁଛି ? କିନ୍ତୁ ଏମିତି ଭାବିଛନ୍ତି କନ୍ଧମାଳ ଘୁ.ଉଦୟଗିରିର ମହମ୍ମଦ ନାଜୁରୁ । ଆଉ ପାଇଥିବା ମନିପର୍ସ ଓ ଟଙ୍କାକୁ ସେ ସଠିକ୍ ଲୋକ ପାଖରେ ପହଞ୍ଚାଇଛନ୍ତି ।
ନିଜେ ନିଇତି ପେଟପାଟଣା କଥା ଚିନ୍ତା କରୁଥିବା ବେଳେ ଅନ୍ୟ ଜଣେ ଗରିବଙ୍କ ହଜିଲା ଧନର ମୂଲ୍ୟ ସେ ଠିକ୍ ବୁଝିଛନ୍ତି । ତେବେ ଘୁ.ଉଦୟଗିରିି ବ୍ଲକ ସାହିର ମହମ୍ମଦ ନାଜୁର୍ ଗୋଟିଏ ସାଇକେଲ ଦୋକାନ କରିଛନ୍ତି । କିଛି ଦିନ ତଳେ ସେ ଦୋକାନରୁ ଘରକୁ ଫେରୁଥିବା ବେଳେ ହଠାତ୍ ସ୍ଥାନୀୟ ଆଧାର କେନ୍ଦ୍ର ନିକଟରୁ ଏକ ମନିପର୍ସଟେ ପାଇଲେ । ସେଥିରେ ପ୍ରାୟ 3 ହଜାର ଟଙ୍କା, ଗୋଟିଏ ଏଟିଏମ୍ କାର୍ଡ ଓ କିଛି ଦରକାରୀ କାଗଜପତ୍ର ଥିଲା । ତେବେ ସେଇ କିଛି ଟଙ୍କା ପାଇଁ ସେଠାରେ ସେ ନିଜର ମାନବିକାତା ଓ ସଚ୍ଚୋଟ ପଣିଆକୁ ଭୁଲିଗଲେ ନାହିଁ । ଆଉ ପର୍ସଟିର ମାଲିକ କିଏ ଖୋଜିଥିଲେ ।
ଶେଷରେ ବସଷ୍ଟାଣ୍ଡ ସାହିର ଶତ୍ରୁଘ୍ନ ବେହେରାଙ୍କ ପର୍ସ ହଜିଥିବା ଜାଣିବାକୁ ପାଇଥିଲେ । ଆଉ ପର୍ସଟି ତାଙ୍କର ବୋଲି ଜାଣିବା ପରେ ଶତ୍ରୁଘ୍ନଙ୍କ ଘରକୁ ଯାଇ ନିଜେ ପର୍ସଟିକୁ ଦେଇ ଆସିଲେ । ଆଉ ପର୍ସ ଦେବା ସମୟରେ ଉଭୟଙ୍କ ମୁହଁରେ ଥିଲା ହସ ଓ କୃତଜ୍ଞତାର ଛାପ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
