ଫୁଲବାଣୀ: ପଦାରେ ପଡିଛି ଅପରାଧି ଓ ଜେଲ କର୍ମଚାରୀଙ୍କ ସାଙ୍ଘାତିକ ଅପରାଧ । ଗଞ୍ଜେଇ କାରବାର ପାଇଁ ପଇସା ଦେଇ ଫେରି ନପାଇ ପାରିବାରୁ ଦୁଇ ଭାଇଙ୍କୁ ଅପହରଣ କରି ପୋଲିସ ହାତରେ ଧରା ପଡିଛି ଜେଲ ୱାଡେଙ୍କ ସହ 6 ଅଭିଯୁକ୍ତ । ଘଟଣାଟି ହେଉଛି ବାଲିଗୁଡା ଥାନା ମିଡିଆକିଆ ଗ୍ରାମର । ଯେଉଁଠାରେ ଦୁଇ ଭାଇ ବୁଲୁ ନାୟକ ଓ ବ୍ରଜ ନାୟକଙ୍କୁ ଅପହରଣ କରିବାକୁ ଚେଷ୍ଟା କରିଥିଲେ ଦୁର୍ବୃତ୍ତ ।
ଘଟଣା କ୍ରମେ, ଛଅ ମାସ ତଳେ ବୁଲୁ ନାୟକ ବାଲିଗୁଡା ଜେଲରେ ବନ୍ଦୀ ଥିବା ବେଳେ ତାଙ୍କର ୱାର୍ଡେନ ସୁବାସ ଚନ୍ଦ୍ର ବେହେରଦଳେଇଙ୍କ ସହ ବନ୍ଧୁତା ହୋଇଥିଲା । ଜେଲରୁ ମୁକୁଳିବା ପରେ ସେ ଗଞ୍ଜେଇ କାରବାର ପାଇଁ ସୁବାସଠାରୁ ଲକ୍ଷେ ଟଙ୍କାରୁ ଅଧିକ ଟଙ୍କା ନେଇ ପରେ ଆଉ ଫେରାଇ ନଥିଲା । ଫଳରେ ପ୍ରତିଶୋଧ ଆକାରରେ 6 ଜଣ ଅପହରଣକାରୀଙ୍କ ସହ ମିଶି ଦୁଇ ଭାଇ ବୁଲୁ ଓ ବ୍ରଜକୁ ଅପହରଣ କରିଥିଲା ସୁବାସ ।
ହେଲେ ଦୁଇ ଭାଇଙ୍କୁ ଅପହରଣ କରି ବୋଲେରୋ ନଂ ଓଡି-07ଟି-2600ରେ ବାଲିଗୁଡାରୁ ଦାରିଙ୍ଗବାଡି ଦେଇ ବ୍ରହ୍ମପୁର ନେବା ସମୟରେ କୌଶଳକ୍ରମେ ଗାଡିରୁ ଡେଇଁ ପଡିଥିଲେ ବୁଲୁ । ପରେ ସେ ଦାରିଙ୍ଗବାଡି ଥାନାରେ ପହଞ୍ଚି ଥାନା ଅଧିକାରୀ ଅଲେଖ ଗରଡିଆଙ୍କୁ ଖବର କରିଥିଲେ । ଖବର ପାଇ ପୋଲିସ ତୁରନ୍ତ ବୋଲେରୋକୁ ପିଛା କରିଥିଲା । ହେଲେ ଗାଡି ନ ଅଟକିବାରୁ ପୋଲିସ ବୋଲେରୋ ଚକରେ ଗୋଟିଏ ରାଉଣ୍ଡ ଗୁଳି ଚଳାଇ ଗାଡି ରୋକିବାରେ ସଫଳ ହୋଇଥିଲା ।
ଘଟଣାସ୍ଥଳରୁ ଅପହୃତ ବ୍ରଜଙ୍କୁ ଉଦ୍ଧାର କରିବା ସହ ପୋଲିସ ଜେଲ ୱାର୍ଡେନ ସୁବାସ ଓ ସାଥି ଅଭିଯୁକ୍ତଙ୍କୁ ଗିରଫ କରିଛି । ଅପରାଧିମାନେ ହେଲେ ସୁବାସ ଚନ୍ଦ୍ର ବେହେରଦଳେଇ, ମୁନା ସାହୁ, ରବି ଗୌଡ଼, ବାଲାଜି ଗୌଡ଼, ପି ସତ୍ୟମ ରେଡ଼ି, ଉମା ବିଶୋୟୀ ଓ ସୁବରାମ ନାୟକ । ତେବେ ଘଟଣାରେ ପୋଲିସ 70/19ରେ ଦଫା 364,365,334 ଆଇପିସି 325 ଓ 327 ଆର୍ମ୍ସ ଆକ୍ଟ ରୁଜୁ କରିଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
