ଫୁଲବାଣୀ: ଗତକାଲି ନୃଶଂସ ହତ୍ୟାକାଣ୍ଡ ପରେ ଆତଙ୍କର ବାତାବରଣ ଖେଳିଯାଇଛି କନ୍ଧମାଳ ସାରଙ୍ଗଡ଼ ଥାନା ଅନ୍ତର୍ଗତ ପାବୁରିଆ ଗାଁରେ । ରବିବାର ସମସ୍ତ ଦୋକାନ ବଜାର ବନ୍ଦ ରହିଥିବା ବେଳେ ଗାଡି ଚଳାଚଳ ମଧ୍ୟ ବାଧାପ୍ରାପ୍ତ ହୋଇଛି। ଲୋକେ କାହା ସହିତ କଥା ହେଉ ନଥିବା ବେଳେ ଗାଁରେ କେବଳ ମାଳ ମାଳ ପୋଲିସ ।
ରବିବାର ଘୁ.ଉଦୟଗିରୀ ଏସଡିପିଓ ଓ ତିନୋଟି ଟିମ୍ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ମୃତଦେହ ଜବତ କରିବା ପରେ ଘୁ.ଉଦୟଗିରୀ ମେଡିକାଲରେ ବ୍ୟବେଚ୍ଛଦ ପରେ ପରିବାରକୁ ହସ୍ତାନ୍ତର କରାଯାଇଛି । ହତ୍ୟା କରି ଫେରାର ହୋଇଯାଇଥିବା ଦୁର୍ବୃତ୍ତଙ୍କୁ ପୋଲିସ୍ ଧରି ନଥିବାରୁ ଆତଙ୍କର ବାତାବରଣ ଲାଗିରହିଛି। ସାଇଣ୍ଟିଫିକ ଟିମ ମଧ୍ୟ ହତ୍ୟାକାଣ୍ଡ ସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ।
ହତ୍ୟାକାଣ୍ଡର ଚବିଶ ଘଣ୍ଟା ପରେ ମଧ୍ୟ ହତ୍ୟାକାରୀଙ୍କୁ ପୋଲିସ୍ ଗିରଫ କରିପାରିନଥିବାରୁ ଭୟର ବାତାବରଣ ଲାଗିରହିଛି। ତିନୋଟି ପୋଲିସ ଟିମ୍ ବିଭିନ୍ନ ସ୍ଥାନରେ ଚଢାଉ କରିଥିଲେ ହେଁ ହତ୍ୟାକାରୀଙ୍କ ଟେର ପାଇପାରିନାହିଁ। ଶନିବାର ସନ୍ଧ୍ୟାରେ ପାବୁରିଆ ଛକରେ ସଚିଦାନନ୍ଦ ନାୟକଙ୍କୁ ପୂର୍ବ ଶତ୍ରୁତାରୁ ହତ୍ୟା କରାଯାଇଥିଲା ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
