ଫୁଲବାଣୀ: କନ୍ଧମାଳ ଜିଲ୍ଲା ଫିରିଙ୍ଗିଆ ପୋଲିସ ଅଚାନକ ଚଢାଉ କରି ବିପୁଳ ପରିମାଣର ଗଞ୍ଜେଇ ଜବତ କରିଛି । କନ୍ଧମାଳରୁ କଟକକୁ ଚାଲାଣ କରୁଥିବା ବେଳେ ନୂଆପଦର ଗାଁ ନିକଟରେ ଫିରିଙ୍ଗିଆ ପୋଲିସର ସ୍ବତନ୍ତ୍ର ଫୋର୍ସ ଏକ ଇଣ୍ଡିଗୋ କାରକୁ ଅଟକାଇ ଯାଞ୍ଚ କରିଥିଲା । 5ଟି ବଡ ବ୍ୟାଗରେ 60ରୁ ଅଧିକ ପ୍ୟାକେଟରେ ଥିବା 10 କିଲୋଗ୍ରାମ ଗଞ୍ଜେଇକୁ ଜବତ କରିବା ସହ 5ଜଣଙ୍କୁ ଗିରଫ କରିଛି ପୋଲିସ ।
ଗିରଫମାନେ ହେଲେ କେଲାପଡା ଗାଁର ବିରାଟ ଦିଗାଲ, ଅନ୍ତର୍ଯ୍ୟାମୀ ଦିଗାଲ, ବ୍ରଜେଶ୍ ପ୍ରଧାନ, ଗୁରୁପଡା ଗାଁର ପିଣ୍ଟୁ ପ୍ରଧାନ ଓ ଶାନ୍ତିନଗରର ମାଧବ ସାହୁ । ଗିରଫମାନଙ୍କୁ ଫୁଲବାଣୀ ଜିଲ୍ଲା କୋର୍ଟରେ ହାଜିର କରାଯାଇଥିଲା । କିନ୍ତୁ ଜାମିନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ଜେଲ ହାଜତକୁ ପଠାଇ ଦିଆଯାଇଛି । ଚଳିତ ଥର ଏହି କିଛି ଦିନ ମଧ୍ୟରେ ସବୁଠାରୁ ଅଧିକ ପରିମାଣର ଗଞ୍ଜେଇ ଜବତ କରାଯାଇଛି ବୋଲି କହିଛନ୍ତି ଥାନା ଅଧିକାରୀ ପି.ଶ୍ୟାମସୁନ୍ଦର ରାଓ । ଏପରି ଚଢାଉ ଲଗାତାର ଜାରି ରହିବ ବୋଲି ଥାନା ଅଧିକାରୀ ସୂଚନା ଦେଇଛନ୍ତି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
