ଫୁଲବାଣୀ: କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଅନ୍ତର୍ଗତ ଗେରୁପଡାରେ ଅଘଟଣ । ବିଳମ୍ବିତ ରାତିରେ ବିଦ୍ୟୁତ ସଟସର୍କିଟ ଯୋଗୁଁ ନିଆଁ ଲାଗି ଗୋଟିଏ ପରିବାରର ଜଣଙ୍କର ମୃତ୍ୟୁ ଘଟିଥିବା ବେଳେ 3ଜଣ ଗୁରୁତର ଆହତ ହୋଇଛନ୍ତି । ମୃତକ ହେଲେ ଅରୁଣ ବେହେରାଙ୍କ ସାନ ଝିଅ କ୍ରିଷ୍ଣା ବେହେରା(13) ।
ସୂଚନା ଅନୁଯାୟୀ, ମଙ୍ଗଳବାର ବିଳମ୍ବିତ ରାତି ପ୍ରାୟ 3ଟାବେଳେ ଅରୁଣ ବେହେରାଙ୍କ ପରିବାର ଲୋକେ ଶୋଇଥିବାବେଳେ ହଠାତ୍ ବିଦ୍ୟୁତ୍ ସଟସର୍କିଟ ଯୋଗୁଁ ଘରେ ନିଆଁ ଲାଗି ଯାଇଥିଲା । ଏଥିରେ ପରିବାର ସମସ୍ତ ସଦସ୍ୟ ଗୁରୁତର ହୋଇଥିଲେ । ସାନ ଝିଅ ଚିକିତ୍ସାଧିନ ଅବସ୍ଥାରେ ଫିରିଙ୍ଗିଆ ମେଡିକାଲରେ ପ୍ରାଣ ହରାଇଛନ୍ତି ।
ବଡ ଝିଅ ରମ୍ଭା, ପୁଅ ରୁଦ୍ର ଓ ସ୍ତ୍ରୀ ବାଲିମତି ବେହେରା ମଧ୍ୟ ଏଥିରେ ଗୁରୁତର ହୋଇଛନ୍ତି । ସମସ୍ତଙ୍କୁ ପ୍ରଥମେ ଫିରିଙ୍ଗିଆ ପରେ ଫୁଲବାଣୀ ଜିଲ୍ଲା ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଅବସ୍ଥା ସଙ୍କଟାପନ୍ନ ହେବାରୁ ଗୁରୁତରଙ୍କୁ ବ୍ରହ୍ମପୁର ମେଡିକାଲରୁ ସ୍ଥାନାନ୍ତର କରାଯାଇଛି ।
ଅନ୍ୟପଟେ ଖବର ପାଇ ଘଟଣାସ୍ଥାଳରେ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲା । ସ୍ଥାନୀୟ ପୋଲିସ ମଧ୍ୟ ଘଟଣାର ତଦନ୍ତ ଜାରି ରଖିଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
