କନ୍ଧମାଳ: ମାଓବାଦୀ ନାଁରେ ଫୋନରେ ଧମକ ଦେବା ମାମଲାରେ ଜଣକୁ ଗିରଫ କରିଛି ଦାରିଙ୍ଗବାଡି ପୋଲିସ । ଗିରଫ ନକଲି ମାଓବାଦୀ କଂଗ୍ରେସର ଜଣେ କର୍ମୀ ବୋଲି ଜଣାପଡ଼ିଛି । ଅଭିଯୋଗକାରୀ କଂଗ୍ରେସର ସ୍ଥାନୀୟ ଦଶ ନମ୍ବର ଜୋନର କଂଗ୍ରେସ ସଭାପତି ବୋଲି ଜଣାପଡିଛି ।
ଦାରିଙ୍ଗବାଡି ଥାନାରେ କଂଗ୍ରେସ ନେତା କାଳୀପ୍ରସାଦ ମଲ୍ଲିକ ଏତଲା ଦେଇଛନ୍ତି । ସେ ଏତଲାରେ ଦର୍ଶାଇଛନ୍ତି ଯେ, ତାଙ୍କୁ ଗତ ସପ୍ତାହେ ଧରି କେହି ଫୋନକରି ଜୀବନରୁ ମାରିଦେବାକୁ ଧମକ ଦେଉଥିଲେ । ମୁଁ ମାଓନେତା ସୁନୀଲ କହୁଛି ଏବଂ ତୁମେ ଆମକୁ ଭେଟି ସାହାଯ୍ୟ କର ନଚେତ ଆମେ ତୁମକୁ ମାରିଦେବୁ । ପରେ ବାରମ୍ବାର ଏପରି ଧମକ ଆସିବା ଯୋଗୁଁ କାଳୀପ୍ରସାଦ ଥାନାର ଆଶ୍ରୟ ନେଇଥିଲେ ।
ଏପରିକି ଥାନାରେ ରାତ୍ରୀଯାପନ ମଧ୍ୟ କଲେ । ଗତ ରାତିରେ ପୁଣି ଫୋନ୍ ଆସିବା ପରେ ପୋଲିସ କଥା ହେବା ସହିତ ଟ୍ରାକ କରି ନକଲି ମାଓବାଦୀକୁ ଧରି ଜେରା କରିଥିଲେ ।
ନକଲି ମାଓବାଦୀ ହେଲେ ବିଶ୍ବନାଥ ହାୱଡା ସିଂ । ସେ କଂଗ୍ରେସର ଜଣେ କର୍ମୀ ବୋଲି ଜଣାପଡିଥିଲା । ପଚରାଉଚରା ପରେ ସେ ନିଜର ଦୋଷ ସ୍ବୀକାର କରିଥିବା କହିଛନ୍ତି ଥାନା ଅଧିକାରୀ ଅଲେଖ ଗରଡିଆ ।
ଫଳରେ ଥାନାରେ ମାମଲା ନମ୍ବର 13/2019 ଅନୁସାରେ ଅଭିଯୁକ୍ତକୁ ଗିରଫ କରାଯାଇ କୋର୍ଟଚାଲାଣ କରାଯିବ ବୋଲି କହିଛନ୍ତି ଥାନା ଅଧିକାରୀ । କଂଗ୍ରେସ ବିଧାୟକ ଜାକବ୍ ପ୍ରଧାନଙ୍କ ଉଭୟ ସମର୍ଥକ ଓ ବିରୋଧି ହୋଇଥିବାରୁ ଏପରି ହୋଇଥିବା ଆଲୋଚନା ଚାଲିଥିବା ବେଳେ ଗିରଫ ବିଶ୍ବନାଥ କହିଛନ୍ତି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
