ଫୁଲବାଣୀ: କନ୍ଧମାଳ ଜିଲ୍ଲା ଦାରିଙ୍ଗିବାଡି ବ୍ଲକର ବୁଡାଗୁଡା ପଞ୍ଚାୟତରେ ଡାଇରିଆ ଆତଙ୍କ । କଡଗାବାଲି ଓ ବୁଡାଗୁଡା ଗାଁରେ ଏପର୍ଯ୍ୟନ୍ତ 30ରୁ ଅଧିକ ଆକ୍ରାନ୍ତ ହୋଇଥିବା ବେଳେ ଜଣଙ୍କର ମୃତ୍ୟୁ ହୋଇଥିବା ଜଣାପଡିଛି । ଅନ୍ୟ 4 ଜଣ ଗୁରୁତର ଅଛନ୍ତି ଓ ସେମାନଙ୍କୁ ବାଲିଗୁଡା ଉପଖଣ୍ଡ ମେଡିକାଲକୁ ସ୍ଥାନାନ୍ତର କରାଯାଇଛି । ଏନେଇ ମଙ୍ଗଳବାର 2ଟି ଡାକ୍ତରୀ ଦଳ ଗାଁରେ ପହଞ୍ଚି ଚିକିତ୍ସା କରିଛନ୍ତି ।
ଲକଡାଉନ ସମୟରେ ଆରମ୍ଭ ହୋଇଥିବା ଡାଇରିଆ ଏବେ ସ୍ଥାନୀୟ ଲୋକଙ୍କୁ ଅଧିକ ଆତଙ୍କିତ କରିଛି । ଜିଲ୍ଲାର ଦାରିଙ୍ଗିବାଡି ବ୍ଲକ ଅନ୍ତର୍ଗତ ବୁଡାଗୁଡାର କଡଗାବାଲି, ବୁଡାଗୁଡା ଓ ପଡିକିଆରେ 30ରୁ ଲୋକେ ଡାଇରିଆରେ ଆକ୍ରାନ୍ତ ହୋଇଛନ୍ତି । ପଡିକିଆର ପେଟା ମଲ୍ଲିକଙ୍କ ମୃତ୍ୟୁ ହୋଇଥିବା ବେଳେ 4 ଜଣ ଗୁରୁତରଙ୍କୁ ବାଲିଗୁଡା ସ୍ଥାନାନ୍ତର କରାଯାଇଛି । ତେବେ ଦୂଷିତ ପାଣି ଯୋଗୁଁ ଏପରି ହେଉଥିବା ଅନୁମାନ କରାଯାଉଛି ।
ମଙ୍ଗଳବାର ଦୁଇଟି ଡାକ୍ତରୀ ଦଳ ସମ୍ପୃକ୍ତ ଗାଁକୁ ଯାଇଥିବା ବେଳେ ବୁଧବାର ପୁଣି ଯିବାର ଯୋଜନା ରହିଛି । ନିରାକରଣ ପାଇଁ ସମ୍ପୃକ୍ତ ଗାଁରେ ବିଶୋଧନ ପ୍ରକ୍ରିୟା ଚାଲିଥିବା ବେଳେ ଘରେ ଘରେ ସ୍ବାସ୍ଥ୍ୟ ପରୀକ୍ଷା କରାଯାଉଛି ବୋଲି ସୂଚନା ଦେଇଛନ୍ତି ବାଲିଗୁଡା ଉପଖଣ୍ଡ ମେଡିକାଲ ଅଧିକାରୀ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
