ଫୁଲବାଣୀ: କଠିନ ପରିଶ୍ରମ ଓ ଦୃଢ ଇଚ୍ଛାଶକ୍ତି ବଳରେ ସାଧ୍ୟ ହୁଏ ଅସାଧ୍ୟ । ଦୂର ହୁଏ ଦୁର୍ଦ୍ଦିନ । ଏହାର ଏକ ନଜିର ଦେଖିବାକୁ ମିଳିଛି କନ୍ଧମାଳ ଜିଲ୍ଲା ତୁଡିପାଜୁ ଗ୍ରାମରେ । ଗାଁକରେ ରୁହନ୍ତି କାଳୀପ୍ରସନ୍ନ ବେହେରା । ଅତି ସାଧାରଣ ଜୀବନଯାପନରେ ବିଶ୍ବାସ ରଖୁଥିବା କାଳୀ 1992 ମସିହାରେ ମାତ୍ର ଦୁଇଟି ଗାଈକୁ ନେଇ ଆରମ୍ଭ କରନ୍ତି ଯାତ୍ରା । ଯାହା ଆଜି ଦୀର୍ଘ 28 ବର୍ଷ ପରେ 2ଟି ଗାଈ ଫାର୍ମରେ 60ଟି ଗାଈ ଓ 2ଟି ସେଲିଂ ସେଣ୍ଟରରେ ପରିଣତ ହୋଇଛି । ବର୍ତ୍ତମାନ କାଳୀ ନିଜେ ସ୍ବାବଲମ୍ବୀ ହେବା ସହ 5ଟି ପରିବାରକୁ ଯୋଗାଇଛନ୍ତି ରୋଜଗାରର ପନ୍ଥା ।
ଗୋପାଳନର ନିଶା ନେଇ ମାତ୍ର ଦୁଇଟି ଗାଈଙ୍କୁ ଧରି ବ୍ୟବସାୟ ଆରମ୍ଭ କରିଥିଲେ କାଳୀ । ସମୟକ୍ରମେ ନିଷ୍ଠାପର ଗୋରୁସେବା ଓ ଦୃଢ ଇଚ୍ଛାଶକ୍ତି ପାଇଁ ବଢିଲା ଗୋପାଳନର ପରିସର । ଯୋଡି ହେଲେ ଅଧିକ ଲୋକ ଓ ବଢିଲା ରୋଜଗାର । ଏବେ ଗୁହାଳରେ ବିଭିନ୍ନ ବ୍ରିଡର ଗାଈଙ୍କୁ ରଖି କାଳୀ ଦୈନିକ ପ୍ରାୟ 1000 ଲିଟର ଦୁଗ୍ଧ ଉତ୍ପାଦନ କରୁଛନ୍ତି । ଏଥିସହ ଦୁଗ୍ଧଜାତ ଦ୍ରବ୍ୟ ଯଥା ପନୀର, ଛେନା, ଦହି ଓ ମିଠା ଆଦି ପ୍ରସ୍ତୁତ କରି ସେ ଲୋକଙ୍କୁ ଯୋଗାଉଛନ୍ତି । ସେପଟେ ଭେଜାଲ କ୍ଷୀର ଆଗରେ ଶୁଦ୍ଧ କ୍ଷୀର ପାଇପାରୁଥିବାରୁ ଗାଁ ଲୋକେ ମଧ୍ୟ କାଳୀଙ୍କ ପାଖରେ ଲଗାନ୍ତି ଲମ୍ବା ଲାଇନ ।
କେବଳ ଯେ ଗୋପାଳନ କରି ସେ ସ୍ବାବଲମ୍ବୀ ହୋଇଛନ୍ତି ତାହା ନୁହେଁ, ଗୁହାଳ ପଛପଟେ ସେ ରଖିଛନ୍ତି ଏକ ଗୋବର ଗ୍ୟାସ ପ୍ଲାଣ୍ଟ । ଏଠାରେ ଗୋବରୁ ପ୍ରସ୍ତୁତ ଇନ୍ଧନ ଗ୍ୟାସକୁ ବ୍ୟବହାର କରି ପାଞ୍ଚ ପରିବାରର ରୋଷେଇ ହୋଇଥାଏ । ସେହିପରି ଉଦ୍ୟାନ ବିଭାଗର ସହଯୋଗରେ ଭର୍ମିକମ୍ପୋଷ୍ଟ ପାଇଁ ସେ ଖଣ୍ଡିଏ ପିଟ ପ୍ରସ୍ତୁତ କରିଛନ୍ତି । ଏଠାରେ ବିଭିନ୍ନ ପ୍ରକାଶ ପନିପରିବା ଚାଷ କରୁଥିବାରୁ ତାଙ୍କୁ କେବେ ବଜାର ଉପରେ ନିର୍ଭର ହେବାକୁ ପଡିନି । ତେବେ କାଳୀଙ୍କର ଏହି ପରିଶ୍ରମ ପାଇଁ ସେ ତତ୍କାଳୀନ ଗୁଜୁରାଟ ମୁଖ୍ୟମନ୍ତ୍ରୀ ତଥା ବର୍ତ୍ତମାନର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୃଷ୍ଟି ଆକର୍ଷଣ କରିପାରିଥିଲେ ।
ଗୁଜୁରାଟର ଗାନ୍ଧୀନଗରରେ ତାଙ୍କୁ ମୋଦି ସମ୍ବର୍ଦ୍ଧିତ କରିବା ସହ ପ୍ରୋତ୍ସାହନ ସ୍ବରୂପ ଯୋଗାଇଥିଲେ 50 ହଜାର ଟଙ୍କାର ସହାୟତା ରାଶି । ଏହାପରେ ସତେ ଯେମିତି ଆଉ କେବେ ପଛକୁ ଚାହିଁ ନାହାନ୍ତି କାଳୀ । କଠିନ ପରିଶ୍ରମ ସାଙ୍ଗକୁ ସରଳ ସ୍ବଭାବ ପାଇଁ ସେ ଜିଲ୍ଲାରେ ସଭିଙ୍କ ପ୍ରିୟ ପାଲଟିଛନ୍ତି । କେବଳ ଜିଲ୍ଲା ନୁହେଁ ରାଜ୍ୟସ୍ତରରେ ମଧ୍ୟ ସେ ଅନେକ ଥର ଗୋପାଳନ ପାଇଁ ସମ୍ମାନୀତ ହୋଇସାରିଛନ୍ତି । ଗୋପାଳନ କରିବାକୁ ଚାହୁଁଥିବା ଅନେକ ଲୋକେ ଆସି କାଳୀଙ୍କଠାରୁ ଶିଖନ୍ତି ଛୋଟ ବଡ ସବୁ କଥା ।
ଗୋପାଳନ ଏତେ ସହଜ ନହେଲେ ବି ଏହାର ଲାଭ ଯିଏ ପାଇଛି ସେ ହିଁ ଏହାର ମହତ୍ତ୍ବ ବୁଝିଛି । କାଳୀ ନିଜର ପରିଶ୍ରମ ବଳରେ ଶୂନରୁ ଆରମ୍ଭ କରି ବର୍ତ୍ତମାନ ଜମିବାଡି, ଘରଦ୍ବାର, 3ଟି ଚାରିଚାକିଆ ଗାଡି ସହିତ ବାୟୋଗ୍ୟାସ ଓ କିଚେନ ଗାର୍ଡେନ ଆଦି ତିଆରି କରିପାରିଛନ୍ତି । ଏହା ବର୍ତ୍ତମାନର ପୀଢିକୁ ବହୁମାତ୍ରାରେ ପ୍ରେରଣା ଯୋଗାଇବ ନିଶ୍ଚୟ ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
