କନ୍ଧମାଳ: ଲୋକସଭା ଆସନ ପାଇଁ ବିଜେଡି ଆରମ୍ଭ କରିଦେଇଛି ନିର୍ବାଚନୀ ପ୍ରଚାର । ନାମାଙ୍କନ ଦାଖଲ କରିବା ପରେ ବିଜେଡି ପ୍ରାର୍ଥୀ ଅଚ୍ୟୁତାନନ୍ଦ ସାମନ୍ତ ଫୁଲବାଣୀ ମୁନିସିପାଲିଟିରେ ବୁଲି ଆରମ୍ଭ କରିଛନ୍ତି ନିର୍ବାଚନ ପ୍ରଚାର ।
ଫୁଲବାଣୀ ସାହିର ହରିଜନ ସାହି,ଢିପା ସାହି ପ୍ରଭୃତିରେ ନିର୍ବାଚନ ପ୍ରଚାର କରିବା ସହିତ ମୁଖ୍ୟମନ୍ତ୍ରୀଙ୍କ ଲୋକାଭିମୁଖି ଯୋଜନା ଓ ବିକାଶ ପାଇଁ ବିଜେଡିକୁ ଭୋଟ ଦେବାକୁ ନିବେଦନ କରିଛନ୍ତି । ଏହାପରେ ଫୁଲବାଣୀ ସାହି ବରାଳଦେବୀ ପୀଠରେ ପୂଜାର୍ଚ୍ଚନା କରିଥିଲେ ଶ୍ରୀସାମନ୍ତ ।
ପ୍ରଚାରରେ ବିଜେଡି ଜିଲ୍ଲା ସଭାପତି ସରୋଜ କର୍ଣ୍ଣ, ସୁଗ୍ରୀବ ସିଂଙ୍କ ସମେତ ବହୁ ନେତା ଓ କର୍ମୀ ଯୋଗଦେଇଥିଲେ । ବୁଧବାର ବୌଦ୍ଧ ନିର୍ବାଚନ ମଣ୍ଡଳୀରେ ପ୍ରଚାରକୁ ଜୋରଦାର କରିଛି ବିଜେଡି ।
ସେହିପରି କଂଗ୍ରେସ ପ୍ରାର୍ଥୀ ମନୋଜ ଆଚାର୍ଯ୍ୟ ଫୁଲବାଣୀରେ ବିଭିନ୍ନ ପ୍ରମୁଖ ନେତା କର୍ମୀଙ୍କୁ ଭେଟି ପ୍ରଚାର ସମ୍ପର୍କରେ ଆଲୋଚନା କରିଥିଲେ । ଏହାସହ ଆସନ୍ତା 30 ତାରିଖ ଠାରୁ ଏହି ଲୋକସଭା ନିର୍ବାଚନ ମଣ୍ଡଳୀରେ ଥିବା ଫୁଲବାଣୀ, ବାଲିଗୁଡା, ଜି.ଉଦୟଗିରି,ବୌଦ୍ଧ,କଣ୍ଟାମାଳ,ଦଶପଲ୍ଲା ଓ ଭଞ୍ଜନଗର ବିଧାନସଭା ଆସନ ଅନ୍ତର୍ଗତ ବିଭିନ୍ନ ଅଞ୍ଚଳ ଗସ୍ତ କରିବାକୁ କାର୍ଯ୍ୟସୂଚୀ ନିର୍ଦ୍ଧାରଣ କରାଯାଇଥିଲା ।
କନ୍ଧମାଳରୁ ସଦାଶବ ପାତ୍ର, ଇଟିଭି ଭାରତ
