ଫୁଲବାଣୀ: ମା’ ନାରାୟଣୀଙ୍କ ଯାତ୍ରା ସମୟରେ ଫୁଲବାଣୀ ସହରରେ ପ୍ରବଳ ଟ୍ରାଫିକ ସମସ୍ୟା । ରାସ୍ତାରେ ଦୀର୍ଘସମୟ ଅଟକି ରହିଲା ଆମ୍ବୁଲାନ୍ସ । ଏଥିପାଇଁ ଯାତ୍ରା କମିଟି ଏବଂ ପୋଲିସକୁ ଦାୟୀ କରିଛନ୍ତି ସ୍ଥାନୀୟ ଲୋକେ । ବିଶେଷ କରି ପୋଲିସର ଅପାରଦର୍ଶିତା ଯୋଗୁଁ ସମସ୍ୟା ଅଧିକ ଜଟିଳ ପରିସ୍ଥିତି ସୃଷ୍ଟି କରୁଛି ବୋଲି ବୁଦ୍ଧିଜୀବୀ ଅଭିଯୋଗ କରିଛନ୍ତି ।
ସହରର ମୁଖ୍ୟ ରାସ୍ତାକୁ ସର୍କୁଲାର ରୋଡରୁ ସଂଯୋଗ କରୁଥିବା ରାସ୍ତାକୁ ବାଉଁଶ ପକାଇ ଅବରୋଧ କରାଯାଉଛି । ଠିକ ସେତିକି ବେଳେ ସର୍କୁଲାର ରୋଡରେ ଠାକୁରାଣୀ ଯାତ୍ରା ପାଇଁ ରାଲିକୁ ଅନୁମତି ଦିଆଯାଉଛି । ଫଳରେ ଟ୍ରାଫିକ ସମସ୍ୟା ଦେଖିବାକୁ ମିଳୁଛି । ସୂଚନା ଅନୁଯାୟୀ, ଏକ ଆମ୍ବୁଲାନ୍ସ ଗୋପବନ୍ଧୁ ଛକ ଠାରୁ କୋର୍ଟ ଛକ ମଧ୍ୟରେ ଟ୍ରାଫିକ ସମସ୍ୟା ଯୋଗୁଁ ପ୍ରାୟ ଅଧ ଘଣ୍ଟା ପର୍ଯ୍ୟନ୍ତ ଫସି ରହିଥିଲା । ବହୁ କଷ୍ଟରେ ଆମ୍ବୁଲାନ୍ସ ଯିବାରେ ସକ୍ଷମ ହୋଇଥିଲା ।
ଟ୍ରାଫିକ କାର୍ଯ୍ୟରେ ନ୍ୟସ୍ତ ଥିବା ପୋଲିସ ଏବଂ ହୋମଗାର୍ଡ କର୍ମଚାରୀ ଟ୍ରାଫିକ ନିୟନ୍ତ୍ରଣ କରିବା ଦୂରର କଥା ବାଉଁଶ କିପରି ନ ଉଠିବ ତାହାକୁ ଗୁରୁତ୍ୱ ଦେଇଥିଲେ । ଏନେଇ ପଚାରିବାରୁ ଉପରୁ ଅର୍ଡର ଥିବା କହିଛନ୍ତି । ଯଦି ଆମ୍ବୁଲାନ୍ସରେ ଥିବା ରୋଗୀଙ୍କର କିଛି ଘଟିଥାନ୍ତା ତେବେ ଏଥିପାଇଁ କିଏ ଦାୟୀ ରହିଥାନ୍ତେ ବୋଲି ସାଧାରଣ ଲୋକେ ପ୍ରଶ୍ନ କରିଛନ୍ତି ।
ଇଟିଭି ଭାରତ, କନ୍ଧମାଳ
