କନ୍ଧମାଳ: ଜିଲ୍ଲାରେ ଚାଞ୍ଚଲ୍ୟ । ଜେଲ କର୍ମଚାରୀ ଓ ଅପରାଧୀଙ୍କ ସାଙ୍ଘାତିକ ଷଡଯନ୍ତ୍ର ପଣ୍ଡ ହୋଇଛି । ଜଣେ ଜେଲ କର୍ମଚାରୀଙ୍କ ଦ୍ବାରା ଦୁଇ ଜଣଙ୍କୁ ଅପହରଣ କରିବା ଘଟଣାର ପର୍ଦ୍ଦାଫାସ ହୋଇଛି । ତେବେ ଏହି ଘଟଣାରେ 6ଜଣ ଅପରାଧି ଏବେ ଦାରିଙ୍ଗବାଡି ପୋଲିସ କବଜାରେ ।
ବାଲିଗୁଡା ଜେଲର ୱାଡେନ ସୁବାସ ଚନ୍ଦ୍ର ବେହେରା ଦଳେଇ ବୁଲୁ ନାୟକ ଓ ବ୍ରଜ ନାୟକଙ୍କୁ ଅପହରଣ କରିବା ନେଇ ଏହି ଘଟଣାରେ 6 ଜଣଙ୍କୁ ସାମିଲ କରିଥିଲେ । ସେମାନେ ଦାରିଙ୍ଗବାଡ଼ିରୁ ବ୍ରହ୍ମପୁରକୁ ନେଇ ଯାଉଥିବା ବେଳେ ଉପସ୍ଥିତି ବୁଦ୍ଧି ବଳରେ ସେଠାରୁ ଖସି ଆସିଥିଲେ ବୁଲୁ ନାୟକ ।
ଏହାପରେ ବୁଲୁ ଘଟଣା ବିଷୟରେ ଦାରିଙ୍ଗବାଡ଼ି ଥାନାରେ ପୋଲିସଙ୍କୁ ଜଣାଇଥିଲା । ପରେ ଥାନା ଅଧିକାରୀ ଅଲେଖ ଗରଡିଆ ଅପହରଣକାରୀଙ୍କ ଗାଡିକୁ ଗୁଳି ମାଡ କରିଥିଲେ । ଫଳରେ 6 ଅପହରଣକାରୀଙ୍କୁ କାବୁ କରିବାରେ ସଫଳ ହୋଇଥିଲା ପୋଲିସ ।
ସୁବାସ ଚନ୍ଦ୍ର ବେହେର ଦଳେଇ, ମୁନା ସାହୁ, ରବି ଗୌଡ଼, ବାଲାଜୀ ଗୌଡ଼, ପି ସତ୍ୟମ ରେଡ଼ି, ଉମା ବିଶୋଇ, ସୁବରାମ ନାୟକଙ୍କୁ ଗିରଫ କରିବା ସହ ଆଠଟି ମୋବାଇଲ, ଗୋଟିଏ ଛୁରୀ ଆଉ ଗୋଟିଏ ଦେଶୀ ବନ୍ଧୁକ ଜବତ କରିଛି ପୋଲିସ । ଏଥିସହ ବୁଲୁ ନାୟକଙ୍କ ଭାଇ ବ୍ରଜଙ୍କୁ ଉଦ୍ଧାର କରିଛି ପୋଲିସ ।
ସୂଚନାଯୋଗ୍ୟ, ଗତ 6 ମାସ ତଳେ ବୁଲୁ ନାୟକ ଜେଲରେ ଥିବା ସମୟରେ ୱାଡେନ ସୁବାଷଙ୍କ ସହ ଭଲ ସମ୍ପର୍କ ରଖିଥିଲା । ଆଉ ଜେଲରୁ ବାହାରିବା ପରେ ସୁବାଷ 1ଲକ୍ଷ ଟଙ୍କାରୁ ଊର୍ଦ୍ଧ୍ବ ଟଙ୍କା ବୁଲୁକୁ ଗଞ୍ଜେଇ କାରବାର ପାଇଁ ଦେଇଥିଲେ । କିନ୍ତୁ ପରବର୍ତ୍ତୀ ସମୟରେ ୱାଡେନଙ୍କୁ ଟଙ୍କା ଫେରସ୍ତ ନ କରିବାରୁ ସେ 6 ଜଣ ଭଡାଡିଆଙ୍କ ସହ ଏଭଳି ଅପହରଣ କରିଥିବା ନେଇ ଜଣାପଡ଼ିଛି ।
କନ୍ଧମାଳରୁ ସଦାଶିବ ପାତ୍ର, ଇଟିଭି ଭାରତ
