ଭବାନୀପାଟଣା: ଜନ୍ମଦିନ ହେଲା ଶେଷଦିନ । ସାଙ୍ଗମାନଙ୍କ ସହ ଜନ୍ମଦିନରେ ଅନେକ ମଉଜ ମଜଲିସ କରିବା ସହ ଭୋଜିର ଆୟୋଜନ ମଧ୍ୟ କରିଥିଲେ । ହେଲେ ସମୟ ପାଲଟିଲା କାଳ । ବାହାରକୁ ଯାଇଥିବା ସମୟରେ ପିକଅପ୍ ଭ୍ୟାନ ଧକ୍କାରେ ଚାଲିଗଲା ଯୁବକଙ୍କ ଜୀବନ। ଏପରି ଏକ ହୃଦୟ ବିଦାରକ ଦୁର୍ଘଟଣା କଳାହାଣ୍ଡି ଜିଲ୍ଲା ବିଶ୍ବନାଥପୁର ଥାନା ଧଅଁରାଭାଟରେ ଦେଖିବାକୁ ମିଳିଛି ।
ସୂଚନା ଅନୁଯାୟୀ, କଳାହାଣ୍ଡି ଜିଲ୍ଲା ସଦର ଥାନା କୁଟ୍ରୁଖମାର ଗାଁର ମାନସ ବେହେରା ଶନିବାର ରାତିରେ ବିଶ୍ବନାଥପୁରରୁ ଲାଞ୍ଜିଗଡ ଯାଉଥିଲେ । ଏହି ସମୟରେ ବିପରୀତ ଦିଗରୁ ଆସୁଥିବା ଏକ ପିକଅପ୍ ଭ୍ୟାନ୍ ତାଙ୍କୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ହିଁ ମାନସଙ୍କର ପ୍ରାଣହାନୀ ଘଟିଛି । ଏନେଇ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ କରିବା ପରେ ପରିବାର ଲୋକଙ୍କୁ ହସ୍ତାନ୍ତର କରିଛି । ଏଥିସହ ଦୁର୍ଘଟଣା ଘଟାଇ ଥିବା ପିକଅପ୍ ଭ୍ୟାନ୍ ଡ୍ରାଇଭରଙ୍କୁ ଅଟକ ରଖିଛି ପୋଲିସ ।
ତେବେ ମାନସଙ୍କର ଶନିବାର ଜନ୍ମଦିନ ଥିବାରୁ ସାଙ୍ଗମାନଙ୍କ ସହ ଭୋଜିର ଆୟୋଜନ କରିଥିଲେ । ମାତ୍ର ସେହିଦିନ ତାଙ୍କର ମୃତ୍ୟୁ ଘଟିବାରୁ ସ୍ଥାନୀୟ ଅଞ୍ଚଳରେ ଏକ ପ୍ରକାର ଶୋକର ଛାୟା ଖେଳିଯାଇଛି ।
କଳାହାଣ୍ଡିରୁ ଅଜିତ କୁମାର ସିଂହ, ଇଟିଭି ଭାରତ
