କଳାହାଣ୍ଡି: କିଛି ମାସ ତଳେ ଚର୍ଚ୍ଚାର ପରିସରକୁ ଆସିଥିଲା ବେଦାନ୍ତରେ ଲଙ୍କାକାଣ୍ଡ ଘଟଣା । ଘଟଣାରେ ଦୁଇ ଜଣଙ୍କର ମୃତ୍ୟୁ ହେବା ପରେ ପୋଲିସ ସିସିଟିଭି ଫୁଟେଜ ଆଧାରରେ 25 ଜଣଙ୍କୁ ଗିରଫ କରିଥିଲା । ହେଲେ ଅଟକ ଯୁବକଙ୍କ ମଧ୍ୟରୁ ଜଣଙ୍କର ଶୁକ୍ରବାର ମୃତ୍ୟୁ ହେବା ପରେ ଘଟଣା ଏବେ ନେଇଛି ନୂଆମୋଡ । ଫଳରେ ବେଦାନ୍ତ ପ୍ଲାଣ୍ଟ ମୁଖ୍ୟ ଫାଟକ ଓ ବେଦାନ୍ତ ଟାଉନସିପ ଅଞ୍ଚଳର 2 କିଲୋମିଟର ଭିତରେ 144 ଧାରା ଜାରି କରାଯାଇଛି ।
ସୂଚନା ଅନୁଯାୟୀ ଗତ ମାର୍ଚ୍ଚ 18 ତାରିଖରେ ଲାଞ୍ଜିଗଡସ୍ଥିତ ବେଦାନ୍ତ କମ୍ପାନୀ ମୁଖ୍ୟ ଫାଟକରେ ସାଧାରଣ ଜନତା ଓ ବେଦାନ୍ତ ସୁରକ୍ଷାକର୍ମୀଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ଯାହା ପରେ ଉଗ୍ରତର ହୋଇ ପୋଡାଜଳାରେ ପହଞ୍ଚିଥିଲା । ଘଟଣାରେ ଜଣେ ବେଦାନ୍ତ ସୁରକ୍ଷାକର୍ମୀ(ୱାଇଏସଏଫ୍ ମେଜର)ଙ୍କ ସମେତ ଛତ୍ରପୁର ଗ୍ରାମର ବେଦାନ୍ତ ଶ୍ରମିକ ଜାନି ବାତ୍ରାଙ୍କର ମୃତ୍ୟୁ ହୋଇଥିଲା । ପରେ ସିସିଟିଭି ଫୁଟେଜ ଆଧାରରେ 25 ଜଣଙ୍କୁ ଜେଲରେ ଭର୍ତ୍ତି କରିଥିଲା ପୋଲିସ ।
ହେଲେ ଗତ 3 ଦିନ ହେବ ଜେଲରେ ଅସୁସ୍ଥ ହୋଇ ପଡିଥିଲେ ରେଙ୍ଗୋପାଲି ଗ୍ରାମର ଅଟକ ଯୁବକ ପଟ୍ଟନାୟକ ହରିଜନ(45) । ଗୁରୁତର ପଟ୍ଟନାୟକଙ୍କୁ ଜେଲ କର୍ମଚାରୀ ଭବାନୀପାଟଣା ଡାକ୍ତରଖାନାରେ ଭର୍ତ୍ତି କରିଥିଲେ । ହେଲେ ଅବସ୍ଥାରେ ଉନ୍ନତି ନହେବାରୁ 2 ଦିନ ପରେ ତାଙ୍କୁ ବୁର୍ଲା ସ୍ଥାନାନ୍ତର କରାଯାଇଥିଲା । ସେଠାରେ ଚିକିତ୍ସାଧୀନ ଅବସ୍ଥାରେ ଶୁକ୍ରବାର ଆଖି ବୁଜିଥିଲେ ପଟ୍ଟନାୟକ ।
ଏନେଇ ଅଶାନ୍ତ ପରିସ୍ଥିତି ସୃଷ୍ଟି ହେବା ସହ ମୃତ ପଟ୍ଟନାୟକଙ୍କ ପରିବାର ଓ ଗ୍ରାମବାସୀ କ୍ଷତିପୂରଣ ଦାବି କରିଛନ୍ତି । ତେଣୁ କମ୍ପାନୀର 2 କିଲୋମିଟର ପରିଧି ମଧ୍ୟରେ 144 ଧାରା ଜାରି କରାଯାଇଛି । କୌଣସି ସ୍ଥାନରେ ଯେପରି 5 ଜଣରୁ ଅଧିକ ଲୋକ ଏକାଠି ନ ହେବେ, ସେ ନେଇ ଡାକବାଜି ଯନ୍ତ୍ର ସାହାଯ୍ୟରେ ଅଞ୍ଚଳରେ ପ୍ରଚାର ମଧ୍ୟ କରାଯାଉଛି ।
ତେବେ ଗ୍ରାମବାସୀ ଓ ପରିବାର ଲୋକଙ୍କ ଦାବି ଅନୁଯାୟୀ ମୃତ ପଟ୍ଟନାୟକଙ୍କ 5 ଝିଅଙ୍କୁ 5 ଲକ୍ଷ ଲେଖାଏଁ ଦିଆଯିବା ସହ ସ୍ତ୍ରୀ ମନୋରମାଙ୍କୁ ଚାକିରୀ ଯୋଗାଇବାର ଦାବି କରାଯାଇଛି । ଅନ୍ୟପଟେ ବେଦାନ୍ତ ଗେଷ୍ଟ ହାଉସରେ ଗ୍ରାମବାସୀ, ବେଦାନ୍ତ କର୍ତ୍ତୃପକ୍ଷ ଓ ପ୍ରଶାସନ ମଧ୍ୟରେ ଆଲୋଚନା ଜାରି ରହିଛି । ଗୁଇନ୍ଦା ବିଭାଗର ସୂଚନା ଅନୁଯାୟୀ ପୋଲିସ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ଆଶଙ୍କା ଥିବାରୁ 144 ଧାରା କରାଯାଇଛି ।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
