ଭବାନୀପାଟଣା: ମଙ୍ଗଳବାର କଳାହାଣ୍ଡି ଜିଲ୍ଲାର ମଦନପୁର ରାମପୁର ଥାନା ଅନ୍ତର୍ଗତ ରିଷିଡ଼ା ଗାଁ ନିକଟରେ ଟ୍ରକ ଓ ବାଇକ ମୁହାଁମୁହିଁ ଧକ୍କା ହୋଇଥିଲା । ଯାହା ଫଳରେ ବାଇକ ଆରୋହୀଙ୍କ ଘଟଣାସ୍ଥଳରେ ହିଁ ମୃତ୍ୟୁ ହୋଇଥିବା ଜଣାପଡ଼ିଛି । ଘଟଣା ମୁତାବକ, ରିଷିଡ଼ା ଗ୍ରାମର ଟୁନା ରଣା ତେରେସିଙ୍ଗା ଗାଁକୁ ନିଜର କୌଣସି କାମରେ ବାଇକ ଯୋଗେ ଯାଉଥିବା ସମୟରେ ବେଳପଡା ଛକ ନିକଟରେ ସାମ୍ନା ପଟୁ ଆସୁଥିବା ଏକ ଟ୍ରକ ସହ ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣା ସ୍ଥଳରେ ଟୁନାଙ୍କ ମୃତ୍ୟୁ ହୋଇଥିଲା ।
ଏହି ଦୁର୍ଘଟଣା ନେଇ ସ୍ଥାନୀୟ ଲୋକେ ମଦନପୁର ରାମପୁର ଅମାଠ ରାସ୍ତା ଅବରୋଧ କରିବ ସହ କ୍ଷତିପୂରଣ ଦାବି କରିଥିଲେ। ପରେ ଖବର ପାଇ ଘଟଣା ସ୍ଥଳରେ ମଦନପୁର ରାମପୁର ପୋଲିସ ପହଞ୍ଚି ଲୋକଙ୍କୁ ବୁଝାସୁଝା କରିବା ସହ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଥିଲା। ତେବେ ଏହି ଘଟଣା ନେଇ ଟ୍ରକ ଓ ଡ୍ରାଇଭରକୁ ଅଟକ ରଖିଛି ପୋଲିସ।
ସେହିଭଳି ଜିଲ୍ଲାର ଧର୍ମଗଡ଼ ସହରର ବିରଞ୍ଚି ମୁଣ୍ଡ ନାମକ ଜଣେ ବ୍ୟକ୍ତି ଜୁନାଗଡ଼ରୁ ଘରକୁ ଫେରିବା ସମୟରେ ଧର୍ମଗଡ଼ ଥାନା ଅନ୍ତର୍ଗତ ସାରଦାପୁର ନିକଟରେ ଏକ ଅଜଣା ଗାଡି ତାଙ୍କୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ହିଁ ତାଙ୍କ ମୃତ୍ୟୁ ହୋଇଥିବା ସୂଚନା ମିଳିଛି । ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ ଜାରି ରଖିଛି।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
