କଳାହାଣ୍ଡି: ଉପାନ୍ତ ଅଞ୍ଚଳରେ ହାତୀ ଉପଦ୍ରବ ଏବେ ଉଗ୍ର ରୂପ ନେଉଛି । କେତେବେଳେ ହାତୀପଲ ଜନବସତି ମୁହାଁ ହୋଇ ଘର ଭାଙ୍ଗୁଛନ୍ତି ତ ପୁଣି କେତେବେଳେ ଫସଲ ନଷ୍ଟ କରୁଛନ୍ତି । ଯାହାକୁ ନେଇ ଲୋକଙ୍କ ମନରେ ଅସନ୍ତୋଷ ଦେଖାଦେଇଛି । ହାତୀଙ୍କ ଚଳ ପ୍ରଚଳ ଉପରେ ନଜର ରଖିବା ଓ ହାତୀଙ୍କୁ ଘଉଡ଼ାଇବା କୁ ନେଇ ଗ୍ରାମବାସୀ ଙ୍କୁ ସୂଚନା ଦେବା ପାଇଁ ଏଲିଫାଣ୍ଟ ସ୍କ୍ବାର୍ଡ ନିଯୁକ୍ତ କରାଯାଇଛି । ତଥାପି ମଧ୍ୟ ହାତୀଙ୍କ ଖବର ଗ୍ରାମବାସୀ ପାଖରେ ପହଞ୍ଚି ପାରୁ ନାହିଁ । ଏନେଇ ଅନେକ ସମୟରେ ଗଜରାଜ ଓ ମଣିଷଙ୍କ ଲଢେଇ ମଧ୍ୟରେ ଅନେକ ଧନଜୀବନ ହାନୀ ହେଉଥିବା ବେଳେ ବନ ବିଭାଗ ନିରବଦ୍ରଷ୍ଟା ସାଜିଥିବା ଅଭିଯୋଗ ହୋଇଛି । ଯାହା ଫଳରେ ନିଜ ଭିଟାମାଟି ଛାଡିବାକୁ ବାଧ୍ୟ ହେଉଛନ୍ତି ଗ୍ରାମବାସୀ ।
ଅଭିଯୋଗ ଅନୁଯାୟୀ, କଳାହାଣ୍ଡି ଜିଲ୍ଲା ବିଶ୍ବନାଥପୁର ରେଞ୍ଜ୍ ଅନ୍ତର୍ଗତ ବେଡେଗାଁ, ଟାମକୁରୁଞ୍ଜା, ସୁଖପଦର, ଖିଲାପଦର, ମହିଷିପିଟା, ସୁଲିମ,କାଶୀଗୁଡା ଏମିତି ଅନେକ ଉପାନ୍ତ ଗାଁ କୁ ରାତିରେ ହାତୀପଲ ଆସି ଉପଦ୍ରବ କରୁଛନ୍ତି । ହାତୀପଲ ଏହି ଅଞ୍ଚଳର ଅନେକ ଗୁଡିଏ ଘର ଦ୍ୱାର ଭାଙ୍ଗିବା ସହିତ ଫସଲ ନଷ୍ଟ କରୁଥିବା ସହ ମାସ ମାସ ଧରି ବସାବାନ୍ଧି ରହୁଥିବା ଅଭିଯୋଗ ହୋଇଛି । ଏନେଇ ଟାମକୁରୁଞ୍ଜା ଗାଁକୁ ନିକଟସ୍ଥ ଜଙ୍ଗଲ ରୁ ୨୦ ଟିକିଆ ହାତୀ ପଲ ଆସି ୪ ଟି ଘର ଭାଙ୍ଗିବା ସହ ଚାଷ ଜମିରେ ପଶି ଦଳି ଚକଟି ଅନେକ ଫସଲ ନଷ୍ଟ କରିଥିବା ଦେଖିବାକୁ ମିଳିଛି । ସେହି ଭଳି କାଶୀଗୁଡ଼ା ଓ ସୋରଦେହେଡ଼ା ଗାଁରେ ମଧ୍ୟ ବିଳମ୍ବିତ ରାତିରେ ହାତୀପଲ ପଶି ଗାଁ ମୁଣ୍ଡରେ ଥିବା 4 ଟି ଘର ଭାଙ୍ଗିବା ସହ ଧାନ, ମାଣ୍ଡିଆ, ମକା ସମେତ ଡାଲି ଜାତୀୟ ଫସଲ ନଷ୍ଟ କରିଦେଇଥିବା ଅଭିଯୋଗ ହୋଇଛି ।
ଅନ୍ୟପଟେ ଗାଁ ମୁଣ୍ଡରେ ହାତୀପଲ ଗତ ୫ ଦିନ ହେଲା ଥିବା ବେଳେ ଗାଁ କୁ ବନ ବିଭାଗ କର୍ମଚାରୀ ଯାଉନଥିବା ଅଭିଯୋଗ କରିଛନ୍ତି ଗ୍ରାମବାସୀ । ଗାଁରେ ହାତୀ ଉପଦ୍ରବ ଫଳରେ ଘରଦ୍ବାର, ଆସବାବପତ୍ର, ଧାନଚାଉଳ, ମକା ଓ ଡାଲି ଜାତୀୟ ଫସଲ ସବୁ ନଷ୍ଟ ହେଉଥିବା ବେଳେ ଭୟଭୀତ ଲୋକେ ଗାଁରେ ରହିବା ମୁସ୍କିଲ ହୋଇ ପଡ଼ିଛି । ଏହାସହ ଜୀବନ ଜୀବିକା ନିର୍ବାହ କରିବା ମଧ୍ୟ କଷ୍ଟସାଧ୍ୟ ହୋଇ ପଡ଼ିଛି । ଫଳରେ ଗାଁରେ ରହିବା ନେଇ ଅତିଷ୍ଠ ହୋଇଗଲେଣି ଲୋକେ । ଶେଷରେ ହାତୀ ଉପଦ୍ରବରୁ ରକ୍ଷା ପାଇବା ନିମନ୍ତେ ଲୋକେ ନିଜ ଭିଟାମାଟି ଚାଡିବାକୁ ନିଷ୍ପତ୍ତି ନେଇଛନ୍ତି । ସବୁ ଜାଣି ବନ ବିଭାଗ ନିଦାବିଷ୍ଣୁ ସାଜିଛି । ଥମୁନି ହାତୀ ଉପଦ୍ରବ । ଭିଟାମାଟି ଛାଡିବାକୁ ବାଧ୍ୟ ହେଉଛନ୍ତି ଗ୍ରାମବାସୀ । ଏନେଇ ଗ୍ରାମବାସୀ ଅନ୍ୟତ୍ର ଥଇଥାନ ଦାବି କରି ବିଡ଼ିଓ ଏବଂ ତହସିଲଦାର ଙ୍କ ଦ୍ୱରାସ୍ତ ହୋଇଛନ୍ତି । ଯଥା ଶୀଘ୍ର ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ଗ୍ରାମବାସୀ ଙ୍କୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ଲିଖିତ ନିବେଦନ କରିଛନ୍ତି ଗ୍ରାମବାସୀ ।
ଇଟିଭି ଭାରତ, କଳାହାଣ୍ଡି
