ଭବାନୀପାଟଣା: ପୂର୍ବରୁ କଳାହାଣ୍ଡି ଜିଲ୍ଲାର ଛାତ୍ରଛାତ୍ରୀ ଉଚ୍ଚଶିକ୍ଷା ପାଇଁ ଜିଲ୍ଲା ବାହାରକୁ ଯାଉଥିଲେ । ହେଲେ ଏବେ ଶିକ୍ଷାର ହବ୍ ହୋଇପାରିଛି କଳାହାଣ୍ଡି ।
ଶିକ୍ଷା କ୍ଷେତ୍ରରେ ଏହି ଜିଲ୍ଲା ନିଜର ସ୍ଵତନ୍ତ୍ର ପରିଚୟ ସୃଷ୍ଟି କରିଛି । ବୁଧବାର କଳାହାଣ୍ଡି ପ୍ରତିଷ୍ଠା ଦିବସ ଥିବାବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜିଲ୍ଲା ଗସ୍ତ କରିଥିଲେ । ଦିନିକିଆ ଗସ୍ତରେ ଆସି ସେ ଏଠାରେ ବିଭିନ୍ନ ପ୍ରକଳ୍ପର ଉଦଘାଟନ ଏବଂ ଶିଳାନ୍ୟାସ କରିଥିଲେ । ଏହି ସମୟରେ ମୁଖ୍ୟମନ୍ତ୍ରୀ କଳାହାଣ୍ଡି ବିଶ୍ବବିଦ୍ୟାଳୟକୁ ଜିଲ୍ଲାର ଅଧିଷ୍ଠାତ୍ରୀ ଦେବୀ ମା ମାଣିକେଶ୍ୱରୀଙ୍କ ନାଁରେ ନାମିତ କରିଥିଲେ । ଯାହାକୁ ନେଇ ଛାତ୍ରଛାତ୍ରୀଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳିଛି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତକାଲି ବିଶ୍ବବିଦ୍ୟାଳୟ ପଡ଼ିଆରେ ପହଞ୍ଚିବା ପରେ ମଞ୍ଚରେ କଳାହାଣ୍ଡି ସାଂସଦ ବସନ୍ତ ପଣ୍ଡା ବିଶ୍ବବିଦ୍ୟାଳୟକୁ ଅଧିଷ୍ଠାତ୍ରୀ ଦେବୀଙ୍କ ନାଁରେ ନାମିତ କରିବା ପାଇଁ ତାଙ୍କ ନିକଟରେ ଦାବି କରିଥିଲେ । ମୁଖ୍ୟମନ୍ତ୍ରୀ ଏହି ଦାବିକୁ ସମ୍ମାନ ଜଣାଇ ବିଶ୍ଵବିଦ୍ୟାଳୟକୁ ମା ମାଣିକେଶ୍ବରୀ ବିଶ୍ବବିଦ୍ୟାଳୟ ଭାବେ ନାମିତ କରିଥିଲେ । ବିଶ୍ଵବିଦ୍ୟାଳୟର ଏହି ନାମକରଣ ଯୋଗୁଁ ମାଣିକେଶ୍ୱରୀଙ୍କ ସଂସ୍କୃତିକୁ ସାରା ଦେଶ ଜାଣିବ ଏବଂ ଛାତ୍ରଛାତ୍ରୀ ଏହି ବିଶ୍ବବିଦ୍ୟାଳୟରେ ଅଧ୍ୟୟନ କରିବା ପାଇଁ ଇଚ୍ଛା କରିବେ ବୋଲି ଆଶା କରାଯାଉଛି ।
ଏହାମଧ୍ୟ ପଢନ୍ତୁ: ୭୫ ବର୍ଷରେ କଳାହାଣ୍ଡି, ଧୁମଧାମରେ ପାଳିତ ହେଲା ପ୍ରତିଷ୍ଠା ଦିବସ
ସେପଟେ ଖୁବଶୀଘ୍ର ବିଶ୍ବବିଦ୍ୟାଳୟ ଏନସିସି ୟୁନିଟ ପାଇଁ ଏକ ସ୍ବତନ୍ତ୍ର ଏୟାରକ୍ରାଫ୍ଟ ଆସିବ । ଉତ୍କେଲା ବିମାନ ବନ୍ଦରରେ ଏନସସି ଛାତ୍ରଛାତ୍ରୀ ସ୍ବପ୍ନର ଉଡାଣ ଭରି ପାରିବେ ବୋଲି ଗତକାଲି ମଞ୍ଚରେ ଜୁନାଗଡ଼ ବିଧାୟକ କ୍ୟାପଟେନ ଦିବ୍ୟ ଶଙ୍କର ମିଶ୍ର ପ୍ରକାଶ କରିଛନ୍ତି ।
ଏଠାରେ ଉଲ୍ଲେଖଯୋଗ୍ୟ ଯେ, ବୁଧବାର ୭୫ ବର୍ଷରେ ପଦାର୍ପଣ କରିଛି କଳାହାଣ୍ଡି ଜିଲ୍ଲା । ଜିଲ୍ଲା ପ୍ରଶାସନ ପକ୍ଷରୁ ଜିଲ୍ଲା ଗଠନ ଦିବସ ପାଳନ କରାଯାଇଥିଲା । ସକାଳୁ ସକାଳୁ ଜିଲ୍ଲାର ଅଧିଷ୍ଠାତ୍ରୀ ଦେବୀ ମାଆ ମାଣିକେଶ୍ବରୀଙ୍କ ମନ୍ଦିରରୁ ମଶାଲ ଶୋଭାଯାତ୍ରା ବାହାରି ସହର ପରିକ୍ରମା କରିବା ପରେ ଟାଉନ ହଲ ଠାରେ ପହଞ୍ଚିଥିଲା । ଏହାପରେ ମଞ୍ଚ ପୂଜା ଅନୁଷ୍ଠିତ ହୋଇଥିଲା । ସନ୍ଧ୍ୟାରେ ସଭାକାର୍ଯ୍ୟ ଆୟୋଜିତ କରାଯାଇଥିଲା । ମୁଖ୍ୟମନ୍ତ୍ରୀ କଳାହାଣ୍ଡିରେ ଲକ୍ଷ୍ମୀ ବସର ଉଦଘାଟନ କରିବା ସହ ଜିଲ୍ଲାବାସୀଙ୍କ ବହୁ ପ୍ରତୀକ୍ଷାର ଅନ୍ତ ଘଟାଇ ମେଡିକାଲ କଲେଜର ଉଦଘାଟନ କରିଥିଲେ ।
ଇଟିଭି ଭାରତ, ଭବାନୀପାଟଣା
