ଭବାନୀପାଟଣା: ବିକାଶର ବାସ୍ତବ ଚିତ୍ର । ଗାଁକୁ ରାସ୍ତାନଥିବାରୁ ଆସିପାରିଲା ନାହିଁ ଆମ୍ବୁଲାନ୍ସ । ଫଳରେ ଖଟିଆରେ ୭ କିଲୋମିଟର ବୁହା ହେଲେ ରୋଗୀ । ଏଭଳି ଦୃଶ୍ୟ ଦେଖିବାକୁ ମିଳିଛି କଳାହାଣ୍ଡି ମଦନପୁର ରାମପୁର ଅଞ୍ଚଳରେ । ବ୍ଳକର ଲୁବେନଗଡ ପଞ୍ଚାୟତ ଅନ୍ତର୍ଗତ ଟୁଡାପଡା ଗ୍ରାମର ମିନତି ମାଝୀଙ୍କୁ ଜ୍ବର ହେବାରୁ ପରିବାର ଲୋକେ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ । ତେବେ ଆମ୍ବୁଲାନ୍ସଟି ଆସିବା ସମୟରେ ଗାଁକୁ ରାସ୍ତାନଥିବାରୁ ଅଧାବାଟରେ ଅଟକି ଯାଇଥିଲା । ଶେଷରେ କୌଣସି ଉପାୟ ନ ପାଇ ପରିବାର ଓ ଗ୍ରାମବାସୀ ମିନନ୍ତି ମାଝୀଙ୍କୁ ଖଟିଆରେ ବୋହି ୭ କିଲୋମିଟର କାଉପଦର ଗାଁକୁ ଆଣିବା ପରେ ଆମ୍ବୁଲାନ୍ସ ଯୋଗେ ମଦନପୁର ରାମପୁର ଡାକ୍ତରଖାନାରେ ରୋଗୀଙ୍କୁ ଭର୍ତ୍ତି କରିଥିଲେ ।
ତେବେ ଏ ସମସ୍ୟା ଆଜିର ନୁହଁ ବର୍ଷ ବର୍ଷ ଧରି ଏଭଳି ସମସ୍ୟାର ସମ୍ମୁଖୀନ ହେଉଛନ୍ତି ଗ୍ରାମବାସୀ । ଗାଁକୁ ରାସ୍ତା ନଥିବା ନେଇ ଅନେକ ଥର ଗ୍ରାମବାସୀ ପ୍ରଶାସନକୁ ଜଣାଇଥିଲେ ମଧ୍ୟ କେହି କର୍ଣ୍ଣପାତ କରୁନଥିବାରୁ ଆଜିବି ପକ୍କା ରାସ୍ତା ଗାଁ ପାଇଁ ସ୍ବପ୍ନ ପାଲଟିଛି ।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
