କଳାହାଣ୍ଡି: ଜିଲ୍ଲା ନିକଟସ୍ଥ ଜୟପାଟଣା ଢାବା ସମ୍ମୁଖରେ ଘଟିଛି ସଡ଼କ ଦୁର୍ଘଟଣା । ଏକ ଟାଟା ପିକଅପକୁ ପଛପଟୁ ପିଟିଲା ବାଇକ । ଘଟଣାସ୍ଥଳରେ ବାଇକ ଆରୋହୀଙ୍କର ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଥିବା ସୂଚନା ମିଳିଛି । ମୃତକଙ୍କ ପରିଚୟ ନୀଳାଞ୍ଚଳ ନାୟକ (25) ବୋଲି ଜଣାପଡିଛି ।
ସୂଚନା ଅନୁସାରେ, ଜୟପାଟଣା ପଟୁ ମୋଟର ଅଭିମୁଖେ ଯାଉଥିବା ଏକ ଟାଟା ପିକଅପକୁ ପଛପଟୁ ବାଇକ ଧକ୍କା ମାରିଲା । ଏହି ଦୁର୍ଘଟଣାରେ ଜୟପାଟଣା ବ୍ଲକ ପଡାର ବାଇକ ଆରୋହୀ ନୀଳାଞ୍ଚଳଙ୍କର ମୃତ୍ୟୁ ଘଟିଥିବା ବେଳେ ଉଡୁକୁ ନାୟକ (30) ଗୁରୁତର ହୋଇଛନ୍ତି । ତାଙ୍କୁ ଜୟପାଟଣା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି ।
ସେପଟେ ଦୁର୍ଘଟଣାରେ ମୃତ୍ୟୁ ଘଟିଥିବା ମୃତକଙ୍କ ପରିବାରଙ୍କୁ କ୍ଷତିପୂରଣ ଦାବିରେ ପରିବାର ଓ ଅଞ୍ଚଳର ଲୋକେ ଉତ୍ତ୍ୟକ୍ତ ହୋଇ ଜୟପାଟଣା ରାସ୍ତା ଅବରୋଧ କରିଛନ୍ତି । ଘଟଣାସ୍ଥଳରେ ଜୟପାଟଣା ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିବା ସହ ଆନ୍ଦୋଳନକାରୀଙ୍କ ସହ ଆଲୋଚନା କରିଛି ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
