କଳାହାଣ୍ଡି: ଖରା, ବର୍ଷା ଓ ରୋଗପୋକ ସହ ଲଢି ଫସଲ ଅମଳ କରିଥିବା ଚାଷୀ ମୁଣ୍ଡରେ ଏବେ ପୁଣି ଚଡକ । କାରଣ କେଉଁଠି ଶୀତ କାକରରେ ମଣ୍ଡିରେ ଧାନ ପଡିରହିଉଛି ତ ଆଉ କେଉଁଠି ଚାଷୀଙ୍କୁ ଟୋକନ ଦେଇ ମିଲର୍ସର ଦେଖାନାହିଁ । କେବଳ ସେତିକି ନୁହେଁ କିଛି ମଣ୍ଡିରେ ମିଲର୍ସମାନେ ଧାନ କ୍ବିଣ୍ଟାଲ ପିଛା ୮ ରୁ ୯ କେଜି କମ୍ କରି ଧାନ କିଣୁଥିବା ଅଭିଯୋଗ ହୋଇଛି । ଦେଖିବା ଇଟିଭି ଭାରତର ଗ୍ରାଉଣ୍ଡ ଜିରୋ ରିପୋର୍ଟ ।
ଏ ହେଉଛି ଜୁନାଗଡ ବ୍ଲକ ଜାରିଙ୍ଗ ଓ ଦାସିଗାଁ ଧାନ ମଣ୍ଡିର ଦୃଶ୍ୟ । ଏମିତିକି ଅଦିନିଆ ବର୍ଷା ଯୋଗୁଁ ମଣ୍ଡିରେ ଧାନ ପଡିରହି ଗଜା ହେବାକୁ ବସିଲାଣି । ଟୋକନ ଖଣ୍ଡେ ଖଣ୍ଡେ ଚାଷୀଙ୍କ ହାତରେ ଥିବା ବେଳେ ବିକ୍ରିକୁ ନେଇ ସମସ୍ୟା ଉପୁଜୁଛି । ଅନ୍ୟପକ୍ଷେ ପଞ୍ଜିକୃତ ହୋଇଥିବା କାଗଜପତ୍ର ଡିଲିଟ ହୋଇଯାଉଥିବା ଅଭିଯୋଗ ହୋଇଛି ।
ଚାଷୀ ଅମଳ ଧାନକୁ ମଣ୍ଡି ଓ ଖଳାରେ ଜଗି ରହିଛି । କିଛି ଚାଷୀ ଏପରି ସ୍ଥିତି ଦେଖି ଦଲାଲକୁ କମ ଦରରେ ମଧ୍ୟ ଧାନ ବିକ୍ରି କରୁଥିବା ଅଭିଯୋଗ ହୋଇଛି । ଏହା ଯୋଗାଣ ବିଭାଗର ପାରିବାପଣିଆ ଉପରେ ସୃଷ୍ଟି କରିଛି ଅନେକ ପ୍ରଶ୍ନବାଚୀ । ଗୋଟେପଟେ ଚାଷୀ ବ୍ୟାଙ୍କ ଓ ଋଣ କରଜ କରି ଚାଷୀ ଚାଷ କରିଥିବା ବେଳେ ଆମ ବ୍ୟବସ୍ଥା ଚାଷୀର ମେରୁଦଣ୍ଡକୁ ସଳଖିବାରେ ସତେ ଯେମିତି ବିଫଳ ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
