ଭବାନୀପାଟଣା: ଲକ୍ଡାଉନ୍ ଯୋଗୁଁ ହନ୍ତସନ୍ତ ଦାଦନ ଶ୍ରମିକ । କୋରୋନା ମହାମାରୀର ମୁକାବିଲା ପାଇଁ ସାରା ଦେଶରେ ହଠାତ ଘୋଷଣା ହେଲା 21 ଦିନିଆ ଲକ୍ଡାଉନ୍ । ବନ୍ଦ ହେଲା ଚକ ଅଖ ଦୋକାନ ବଜାର । ବାଦ ଦିଆଯାଇଛି ଜରୁରୀକାଳିନ ସେବା । ହେଲେ ଏସବୁ ଭିତରେ ପେଟ ପାଇଁ ଦାନା ଯୋଗାଡ ଆଶାରେ ନିଜ ଭିଟାମାଟି ଛାଡି ଅନ୍ୟ ରାଜ୍ୟକୁ ଦାଦନ ଖଟି ଯାଇଥିବା ମଣିଷ କିଛି ବୁଝିବା ଆଗରୁ ସତେ ଯେମିତି ଗୃହବନ୍ଦୀ । ତେବେ ଲକଡାଉନ ସମୟରେ କେମିତି ଅଛନ୍ତି ଦାଦନ ଓ ତାଙ୍କ ପରିବାର ଦେଖିବା ରିପୋର୍ଟ ।
କୋରୋନା ଲାଗି ଲକ୍ଡାଉନ୍ ପରେ ରାଜ୍ୟ ବାହାରେ ଫସି ରହିଥିବା ଅନେକ ଦାଦନ ଶ୍ରମିକ ନିଜ ଭିଟାମାଟିକୁ ଫେରିବା ଲାଗି ଭିଡିଓ ମାଧ୍ୟମରେ ଆକୁଳ ନିବେଦନ କରିଛନ୍ତି । ଲକଡାଉନ ଘୋଷଣା ପରେ କାମଧନ୍ଦା ବନ୍ଦ ହୋଇଥିବାବେଳେ ପେଟକୁ ଦାନା ମିଳୁନି । ଫଳରେ ଦି ପଇସା ରୋଜଗାର ଆଶାରେ ଗାଁ ଛାଡି ଯାଇଥିବା ଶ୍ରମିକ ମାନେ ଏବେ ସରକାରଙ୍କ ସହାୟତା ମାଗିଛନ୍ତି ।
ଏପଟେ ପରିବାର ପରିଜନଙ୍କ ଦୁଃଖଭରା ଭିଡିଓ ପାଇବା ପରେ କଳାହାଣ୍ଡିରେ ସେମାନଙ୍କ ଫେରିବା ବାଟକୁ ଚାହିଁ ରହିଛନ୍ତି ସମ୍ପର୍କୀୟ । ଯୋଗାଯୋଗ ହୋଇପାରୁନଥିବାରୁ ଗାଁ ମୁଣ୍ଡରେ ନିଜ ଭେଣ୍ଡିଆ ପୁଅର ଫେରିବା ବାଟକୁ ଚାହିଁ ରହିଛି ମା’ । ସେହିପରି କିଛି ସମ୍ପର୍କୀୟ, ନିଜ ପରିଜନଙ୍କ ସହ ଫୋନରେ କଥା ହୋଇ ଟିକିଏ ଆଶ୍ବସ୍ତି ପାଉଛନ୍ତି । ଆଉ ସେମାନଙ୍କୁ ଫେରାଇ ଆଣିବା ଲାଗି ସରକାରଙ୍କ ନିକଟରେ ନିବେଦନ କରୁଛନ୍ତି ।
ଲକଡାଉନ ଘୋଷଣା ପରେ ରାଜ୍ୟକୁ ବର୍ତ୍ତମାନ ସୁଦ୍ଧା ପ୍ରାୟ 1 ଲକ୍ଷ ପଞ୍ଜୀକୃତ ଦାଦନ ନିଜ ଘରକୁ ଫେରିଥିବା ସରକାର କହୁଥିବାବେଳେ 1 ଲକ୍ଷ 85 ହଜାର ଦାଦନ ଏବେବି ବାହାର ରାଜ୍ୟରେ ଅଛନ୍ତି । ସେହିପରି ପଞ୍ଜିକରଣ ହୋଇନଥିବା ଅନେକ ଦାଦନ ଏବେବି ରାଜ୍ୟ ବାହାରେ ଦିନ କାଟୁଛନ୍ତି । ତେବେ ଆଗରୁ ସୂଚନା ନଦେଇ ହଠାତ୍ ଲକ୍ଡାଉନ୍ ଘୋଷଣା କରିବା ଦାଦନ ଶ୍ରମିକଙ୍କ ପାଇଁ କାଳ ସାଜିଛି ବୋଲି ମାନବାଧିକାର କର୍ମୀ ମତ ଦେଇଛନ୍ତି ।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
