କଳାହାଣ୍ଡି: ଉପାନ୍ତ ଅଞ୍ଚଳରେ ପୁଣି ଷ୍ଟ୍ରେଚରରେ ବୁହା ହେଲେ ଗର୍ଭବତୀ । ରାସ୍ତା ନଥିବାରୁ ଜଙ୍ଗଲୀ ରାସ୍ତା ଦେଇ ନାଳ ପାର କରି ଗର୍ଭବତୀଙ୍କୁ 12 କିଲୋମିଟର ବୁହାଯାଇଛି । ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ଆଦିବାସୀ ଅଧ୍ୟୁଷିତ ଅଞ୍ଚଳ ତଥା ଥୁଆମୂଳ ରାମପୁର ବ୍ଳକ ଅନ୍ତର୍ଗତ କାଣିଗୁମା ପଞ୍ଚାୟତର ନେହେଲା ଗ୍ରାମରେ ।
ଥୁଆମୂଳ ରାମପୁର ବ୍ଳକର ଦୁର୍ଗମ ଅଞ୍ଚଳମାନଙ୍କରେ ଆଜିବି ସରକାର ବ୍ୟବସ୍ଥା ଠାରୁ ବହୁ ଦୂରରେ ରହିଛି । ଗର୍ଭବତୀଙ୍କ ଖଟିଆ କିମ୍ବା ଷ୍ଟ୍ରେଚରେ ବୁହାହେବା ଏବେ ନିତିଦିନିଆ ସମସ୍ୟା ପାଲଟିଛି । ପ୍ରଶାସନକୁ ଆଜିବି ପଡୁନି ଫରକ । ସୂଚନା ଅନୁସାରେ ଗତ 20 ତାରିଖରେ ନେହେଲାର ସାଇବନି ଗୌଡ଼ (23) ଙ୍କୁ ଜନନୀ ଯନ୍ତ୍ରଣା ହେବାରୁ ତାଙ୍କ ସ୍ବାମୀ ହୋଇଚୂନ ଗୌଡ଼ (26) ଓ ଅନ୍ୟ ଗାଁ ଲୋକଙ୍କ ସହଯୋଗରେ ତାଙ୍କୁ ଷ୍ଟ୍ରେଚରରେ କାଣିଗୁମା ପର୍ଯ୍ୟନ୍ତ ବୋହିକି ନେଲେ ।
ଗର୍ଭବତୀଙ୍କୁ ଥୁଆମୂଳ ରାମପୁର ଡାକ୍ତରଖାନା ପର୍ଯ୍ୟନ୍ତ ନେବା ପାଇଁ କାଣିଗୁମା ନେବାକୁ କହିଥିଲେ ଆଶା ଦିଦି ତୁଳା ନାୟକ । ସବୁ ବାଧାବିଘ୍ନକୁ ଖାତିର ନକରି ଗର୍ଭବତୀଙ୍କୁ 12 କିଲୋମିଟର ବୋହି ନେଇ କାଣିଗୁମା ପର୍ଯ୍ୟନ୍ତ ଅଣାଗଲା । ସେଠାରୁ ଆମ୍ବୁଲାନ୍ସ ଯୋଗେ ଥୁଆମୂଳ ରାମପୁର ଡାକ୍ତରଖାନା ଭର୍ତ୍ତି କରାଗଲା । ତେବେ ଏଠାରେ ପ୍ରଶ୍ନ ଉଠୁଛି ବାରାମ୍ବାର ଗାଁ ଲୋକେ ସମାନ ସମସ୍ୟା ଭୋଗୁ ଥିବାବେଳେ ଏପର୍ଯ୍ୟନ୍ତ ପ୍ରଶାସନ କିମ୍ବା କୌଣସି ନେତା କାହିଁକି ଚୁପ ବସିଛନ୍ତି ।
ଆଜିବି ଉକ୍ତ ଦୁର୍ଗମ ଅଞ୍ଚଳ ପାଇଁ ସରକାରଙ୍କ ପକ୍ଷରୁ କୌଣସି ବ୍ୟବସ୍ଥା କରାଯାଇ ନାହିଁ । ସ୍ଥାନୀୟ ରାଜନେତା ଓ କର୍ମଚାରୀଙ୍କ ଦୂରଦୃଷ୍ଟି ଅଭାବ ରହିଥିବା ଯୋଗୁଁ ଲୋକମାନେ ହୋଇରାଣ ହେଉଥିବା ଦେଖିବାକୁ ମିଳୁଛି ।
କଳାହାଣ୍ଡିରୁ ଅଜିତ ସିଂହ , ଇଟିଭି ଭାରତ
