ଭବାନୀପାଟଣା: ଗାଁକୁ ଭଲ ରାସ୍ତା ନଥିବା ଯୋଗୁ ସ୍ଥାନୀୟ ଯୁବକ ସଂଘର ଅଭିନବ ପ୍ରତିବାଦ । ରାସ୍ତାରେ ରୋପଣ କଲେ ଧାନତଳି । ଏପରି କିଛି ଅଭାବନୀୟ ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ନର୍ଲା ବ୍ଲକ ସରିଆଁ ଗାଁରେ ।
ଅଭିଯୋଗ ଅନୁସାରେ, ନର୍ଲା ବ୍ଲକ ସରିଆଁ ଗାଁକୁ ସଂଯୋଗ କରୁଥିବା ରାସ୍ତାର ଅବସ୍ଥା ଏତେ ଶୋଚନୀୟ ଯେ ଗାଡି ମଟର ଯିବା ଆସିବା ତ ଦୂରର କଥା ଚାଲିକି ଯିବା ବି ଅସମ୍ଭବ। ସରିଆଁ ଗାଁରୁ କେସିଙ୍ଗା ଯିବାକୁ ହେଲେ ଏହି ରାସ୍ତା ଉପରେ ହିଁ ସମ୍ପୂର୍ଣ୍ଣ ନିର୍ଭର କରନ୍ତି ଅଞ୍ଚଳବାସୀ । ସେ ଶିକ୍ଷା ଓ ସ୍ବାସ୍ଥ୍ୟ ପାଇଁ ହେଉ ଅବା ବ୍ୟବସାୟ ଏ ରାସ୍ତାହିଁ ଅଞ୍ଚଳବାସୀଙ୍କ ଜୀବନ ରେଖା ହେଉଛି ଏହି ରାସ୍ତା । କିନ୍ତୁ ବର୍ଷା ଋତୁ ଆସିଲେ ଆଣ୍ଠୁଏ କାଦୁଅ ଓ ରାସ୍ତା ସାରା ଖାଲଖମା।
ଫଳରେ ଗାଁକୁ ନାଁ ଆମ୍ବୁଲାନ୍ସ ଆସି ପାରୁଛି ନାଁ ଲୋକେ ନିଜ ନିତିଦିନିଆ କାମରେ କେସିଙ୍ଗା ଯାଇ ପାରୁଛନ୍ତି । ସମସ୍ୟା ନେଇ ସରିଆଁ ଗାଁର ଯୁବକମାନେ ଅନେକ ସମୟରେ ପ୍ରଶାସନର ଦ୍ବାରସ୍ତ ହୋଇଛନ୍ତି। ହେଲେ କୌଣସି ସୁଫଳ ନ ମିଳିବାରୁ ଏବେ ଏଭଳି ଅଭିନବ ଉପାୟରେ ରାସ୍ତାରେ ଧାନତଳି ରୋପଣ କରି ସରକାରଙ୍କ ଦୃଷ୍ଟି ଆକର୍ଷଣ କରିବା ସହ ରାସ୍ତା ସମସ୍ୟାର ସମାଧାନ ପାଇଁ ଦାବି କରିଛନ୍ତି।
କଳାହାଣ୍ଡିରୁ ଅଜିତ କୁମାର ସିଂ, ଇଟିଭି ଭାରତ
