ଭବାନୀପାଟଣା: ସ୍ବାଧୀନତାର ଅମୃତ ମହୋତ୍ସବ ପାଳୁଛି ଦେଶ । ଦେଶକୁ ସ୍ବାଧୀନତା ମିଳିବାର 7 ଦଶନ୍ଧୀ ପରେ ବି ଗାଁକୁ ନାହିଁ ନିତିଦିନିଆ ରାସ୍ତା । ଗାଁକୁ ରାସ୍ତା ସଂଯୋଗ ଦାବି ନେଇ ଜିଲ୍ଲାପାଳଙ୍କୁ ଭେଟିଛନ୍ତି କଳାହାଣ୍ଡି ଜିଲ୍ଲା ମୁର୍ଲିମୁଇ ଗାଁର ଲୋକେ । ଖୁବ ଶୀଘ୍ର ରାସ୍ତା ସଂଯୋଗ ପାଇଁ ଲିଖିତ ଆକାରରେ ଜଣାଇଛନ୍ତି ।
କାହିଁକି ରାସ୍ତା ନିର୍ମାଣ ଦାବି ଉଠାଇଲେ ଗାଁ ଲୋକେ ?
ଗତ ୧୫ ଦିନ ତଳେ ବ୍ଲକର ମୁର୍ଲିମୁଇ ଗାଁର ଜଣେ ବ୍ୟକ୍ତିଙ୍କ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ମୃତ୍ୟୁ ହୋଇଥିଲା । ମହାପ୍ରୟାଣ ଗାଡ଼ିରେ ମୃତଦେହ ଗାଁକୁ ଆଣିବା ପାଇଁ ବାହାରି ଥିଲେ ପରିବାର ଲୋକେ ହେଲେ ଗାଁକୁ ରାସ୍ତା ନଥିବା କାରଣରୁ ମହାପ୍ରୟାଣ ଗାଡି ଗାଁ ଭିତରକୁ ଯାଇ ପାରି ନଥିଲା ପରେ ପରିବାର ଓ ଗ୍ରାମବାସୀ ମୃତଦେହକୁ ସର୍ଗିପଦର ଗାଁରୁ ନିଜ ଗାଁ ମୁର୍ଲିମୁଇ ଗାଁକୁ ପ୍ରାୟ ୮ କିଲୋମିଟର ବୋହି ନେଇଥିଲେ । ଏହି ଘଟଣାକ୍ରମେ ନେଇ ଗ୍ରାମବାସୀ ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି । ଗାଁକୁ ସଂଯୋଗ କରୁଥିବା ରାସ୍ତାକୁ ପ୍ରଧାନମନ୍ତ୍ରୀ ସଡକ ଯୋଜନାରେ ସାମିଲ କରିବା ସହ ଯଥାଶୀଘ୍ର ରାସ୍ତା ନିର୍ମାଣ କରିବା ନେଇ ଗ୍ରାମବାସୀ ଜିଲ୍ଲାପାଳଙ୍କୁ ସାକ୍ଷାତ କରି ଲିଖିତ ଅଭିଯୋଗ କରିଛନ୍ତି ।
କଳାହାଣ୍ଡି ଜିଲ୍ଲା ଆଦିବାସୀ ଅଧ୍ୟୁଷିତ ବଣପାହାଡ ଘେରା ଥୁଆମୂଳ ରାମପୁର ବ୍ଲକର ଉପାନ୍ତ ଅଞ୍ଚଳରେ ଦେଖିବାକୁ ମିଳିଛି ସରକାରୀ ବ୍ୟବସ୍ଥାର ନଗ୍ନ ଚିତ୍ର । ନିର୍ବାଚନ ଆସିଲେ ନେତା ମନ୍ତ୍ରୀଙ୍କର ଗାଁରେ ପାଦ ପଡେ । ଆଉ ମିଳେ ପୁଳା ପୁଳା ପ୍ରତିଶୃତି । ପ୍ରତିଶୃତିର ପାହାଡ ଲଦି ଦେଇ ନେଇ ଯାଆନ୍ତି ଗାଁ ଲୋକଙ୍କ ଠାରୁ ଭୋଟ । ନିର୍ବାଚନ ସରିଗଲା ପରେ ନେତାଙ୍କର ପ୍ରତିଶୃତି ପାଣିର ଗାର ପାଲଟି ଯାଏ । ନା ଦେଖାଥାଏ ନେତାଙ୍କର ନା ପ୍ରତିଶୃତି ବାସ୍ତବ ରୂପ ନେଇଥାଏ । ସେପଟେ ସରକାରଙ୍କର ବିକାଶ ଗାଡି ଯେମିତି ଅଧାରେ ଅଟକି ଯାଇଛି । ଥୁଆମୂଳ ରାମପୁର ବ୍ଲକର ମୁର୍ଲିମୁଇ ଗାଁକୁ ରାସ୍ତାଟିଏ ନାହିଁ । ଆମ୍ବାଲାନ୍ସ ଆସିବା ଦୂରର କଥା ବାଇକ ମଧ୍ୟ ଏଠାକୁ ଆସିବା ମୁସ୍କିଲ । ରାସ୍ତା ପାଇଁ ପ୍ରଶାସନକୁ ଗୁହାରି କଲେ ମଧ୍ୟ କେହି ଏଥିପାଇଁ କର୍ଣ୍ଣପାତ କରିନଥିବା ଅଭିଯୋଗ କରିଛନ୍ତି ଗ୍ରାମବାସୀ । ରାସ୍ତା ନଥିବାରୁ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏହି ଘଟଣାକୁ ନେଇ ଶୁକ୍ରବାର ଗ୍ରାମବାସୀ ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି । ଗାଁକୁ ସଂଯୋଗ କରୁଥିବା ରାସ୍ତାକୁ ପ୍ରଧାନମନ୍ତ୍ରୀ ସଡକ ଯୋଜନାରେ ସାମିଲ କରିବା ସହ ଯଥାଶୀଘ୍ର ରାସ୍ତା ନିର୍ମାଣ କରିବା ନେଇ ଗ୍ରାମବାସୀ ଜିଲ୍ଲାପାଳଙ୍କୁ ସାକ୍ଷାତ କରି ଲିଖିତ ଅଭିଯୋଗ କରିଛନ୍ତି ।
ଏନେଇ ସମାଜସେବୀ ମୁର୍ଲିଧର ନାଏକ କହିଛନ୍ତି "ସ୍ବାଧୀନତାର ୭୫ ବର୍ଷ ପୂର୍ତ୍ତି ଅବସରରେ ଦେଶବାସୀ ଅମୃତ ମହୋତ୍ସବ ପାଳନ କରୁଛନ୍ତି । କିନ୍ତୁ ଦୁଃଖ ଏବଂ ପରିତାପର ବିଷୟ । ଗୋଟିଏ ଗାଁକୁ ମୃତଦେହ ନେବାକୁ ପାଇଁ ଖଟିଆରେ ୧୦ କିମି ବୋହିବାକୁ ପଡୁଛି । ରାସ୍ତା ନ ଥିବା କାରଣରୁ ଗର୍ଭବତୀ ମହିଳାଙ୍କୁ ଖଟିଆରେ ବହିବାକୁ ୧୦ କିମି ବୋହିବାକୁ ପଡୁଛି । ତା ପରେ ଆମ୍ବୁଲାନ୍ସକୁ ସ୍ଥାନାନ୍ତର କରିବାକୁ ପଡୁଛି । ବାହାରେ ହସ୍ପିଟାଲରେ ଯଦି କୌଣସି ବ୍ୟକ୍ତିଙ୍କର ମୃତ୍ୟୁ ହୁଏ ତାହେଲେ ଯେଉଁ ସ୍ଥାନ ପର୍ଯ୍ୟନ୍ତ ଗାଡି ଯାଉଛି ସେଠାରୁ ୧୦ କିମି ଖଟିଆରେ ବୋହି ମୃତଦେହକୁ ଗାଁ ଭିତରକୁ ନେବାକୁ ପଡୁଛି ।"
ଇଟିଭି ଭାରତ, କଳାହାଣ୍ଡି
