କଳାହାଣ୍ଡି: ମୃତଦେହ ରଖି ରାସ୍ତା ଅବରୋଧ । ଗତ ମଙ୍ଗଳବାର କଳାହାଣ୍ଡି ଜିଲ୍ଲା ଜୁନାଗଡ ସହରରେ ଥିବା ଇଣ୍ଡିଆନ ଗ୍ୟାସ ଗୋଦାମ ନିକଟରୁ ଶ୍ରମିକ ଭୂବନେ ବୋଡକିଆଙ୍କ ସନ୍ଦେହଜନକ ମୃତଦେହ ମିଳିଥିଲା । ପୋଲିସ ମୃତ୍ୟୁ ପଛର କାରଣ ଉନ୍ମୋଚନ କରିପାରିନଥିବାରୁ ବୁଧବାର ମୃତଦେହ ରଖି ରାସ୍ତା ଅବରୋଧ କରିଛନ୍ତି ଅଞ୍ଚଳବାସୀ ।
ସୂଚନା ଅନୁଯାୟୀ, ଭୂବନେ ଜୁନାଗଡ ଥାନା କାଙ୍କେରୀମାଲ ଗ୍ରାମର ବୋଲି ଜଣାପଡିଥିବାବେଳେ ସେ ଜୁନାଗଡସ୍ଥିତ ତାଙ୍କ ଭଉଣୀ ଘରେ ରହି ଗ୍ୟାସ ଗୋଦାମରେ ଶ୍ରମିକ ଭାବେ କାମ କରି ଆସୁଥିଲେ । ତେବେ ଗତ ମଙ୍ଗଳବାର ଭୂବନେଙ୍କ ମୃତଦେହ ଠାବ ପରେ ତାଙ୍କ ଭଉଣୀ ଜୁନାଗଡ ଥାନାରେ ହତ୍ୟା ଅଭିଯୋଗ ଆଣିଥିଲେ ।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରିଥିଲେ । ତେବେ 24 ଘଣ୍ଟା ବିତିଯାଇଥିଲେ ମଧ୍ୟ ପୋଲିସ ହତ୍ୟା ପଛର ରହସ୍ୟ ଉନ୍ମୋଚନର କୌଣସି ଟେର ପାଇନଥିବାରୁ ଅଞ୍ଚଳବାସୀ ପ୍ରତିବାଦ କରି ହାତୀ ନଦୀପୋଲ ଉପରେ ମୃତଦେହ ରଖି ବିକ୍ଷୋଭ ପ୍ରଦର୍ଶନ କରିବା ସହ ଏନଏଚ-୨୬ କୁ ଅବରୋଧ କରିଛନ୍ତି ।
କଳାହାଣ୍ଡିରୁ ଅଜିତ୍ ସିଂ, ଇଟିଭି ଭାରତ
