କଳାହାଣ୍ଡି: ଦାଦନ ଦୁଃଖରେ କାନ୍ଦୁଛି କଳାହାଣ୍ଡି । କାମ ଧନ୍ଦା ଅଭାବରୁ ବାହାର ରାଜ୍ୟକୁ ଦାଦନ ଖଟିବାକୁ ଚାଲି ଯାଉଛନ୍ତି ଜିଲ୍ଲାବାସୀ । କିଏ କର୍ମକ୍ଷେତ୍ରରେ ନିର୍ଯାତିତ ହେଉଛି ତ କିଏ ଦୁର୍ଘଟଣାର ଶିକାର ହୋଇ ଅକର୍ମଣ୍ୟ ହେଉଛି । ଏପରିକି କିଛି ଲୋକ ମୃତ୍ୟୁମୁଖରେ ପଡୁଛନ୍ତି । ଆଉ ଏସବୁକୁ ଦେଖିଲେ ଲାଗେ ସତେ ଯେମିତି ସାଧାରଣ ଲୋକଙ୍କ ସାମଗ୍ରିକ ବିକାଶକୁ ନେଇ ନିଜକୁ ଉତ୍ତରଦାୟୀ ମଣୁଥିବା ସରକାରୀ ଯୋଜନା କେବଳ କାଗଜ କଲମରେ ସୀମିତ ରହିଛି । ଏଭଳି କିଛି ଘଟଣାବଳୀକୁ ନେଇ ଦେଖନ୍ତୁ ଇଟିଭି ଭାରତର ସ୍ବତନ୍ତ୍ର ରିପୋର୍ଟ ।
ଏ ହେଉଛି ସଦର ବ୍ଲକ ମୁସିଗୁଡା ଗାଁର ଉମା ଗୌଡଙ୍କ ଘର । ଭୂମିହୀନ ପରିବାରରେ ଉମା ହିଁ ଜଣେ ରୋଜଗାରକ୍ଷମ ବ୍ୟକ୍ତି ଥିଲେ । ପରିବାର କହିଲେ ମାଆ, ସ୍ତ୍ରୀ ଓ ଦୁଇ ଝିଅ । ମୂଲ ଲାଗିଲେ ପରିବାରର ଚୁଲି ଜଳେ । ହେଲେ ଗାଁରେ କାମ ଧନ୍ଦା ଅଭାବରୁ ଶେଷରେ ବ୍ୟାଙ୍କ ଓ ମହିଳା ସ୍ବୟଂ ସହାୟକ ଗୋଷ୍ଠୀରୁ ମୋଟ 40 ହଜାର ଋଣ କରି ଛେଳି ମେଣ୍ଢା ଚାଷ କରୁଥିଲେ । ହେଲେ ଛେଳି ମେଣ୍ଢା ମରିଯିବାରୁ ଋଣ ଭାର ବଢିଥିଲା । ଫଳରେ ଦୁଇ ପଇସା ରୋଜଗାର ଆଶାରେ ଉମା ଗତ ମେ ମାସରେ ହାଇଦ୍ରାବାଦକୁ ଦାଦନ ଖଟିବାକୁ ଯାଇଥିଲେ ।
ସେଠାରେ ବାଲାଜୀ ବୋର ୱେଲରେ ଶ୍ରମିକ ଭାବେ କାମ କରୁଥିଲେ ଉମା । ତେବେ ଏକ ଦୁର୍ଘଟଣାରେ ମୃତ୍ୟୁ ହେବା ପରେ ମାଲିକ ସହାୟତାରେ ତାଙ୍କର ମୃତଦେହ ପହଞ୍ଚିଥିଲା ଗାଁରେ । ସାଙ୍ଗରେ ଆସିଥିଲା 40 ହଜାର ଟଙ୍କା । ହେଲେ ଅନେକ ଆଶା ଓ ସ୍ବପ୍ନ ନେଇ ଯାଇଥିବା ଉମା ନିଜେ ତ ଫେରି ପାରିଲେନି, ମରଶରୀର ହୋଇ ଫେରିଲା ତାଙ୍କ ଶରୀର ।
ଜିଲ୍ଲାରେ ଅନ୍ୟ ଏକ ହୃଦୟ ବିଦାରକ ଘଟଣା, ଯାହା ରାଜ୍ୟ ତଥା ଜାତୀୟସ୍ତରରେ ସୃଷ୍ଟି କରିଥିଲା ହଇଚଇ । କହିବାକୁ ଗଲେ କଳାହାଣ୍ଡି ଇତିହାସର ଏକ କଳଙ୍କିତ ଅଧ୍ୟାୟ । ଦାଦନ ଶ୍ରମିକର ପାପୁଲି କଟା ଘଟଣା ସରକାରୀ ବ୍ୟବସ୍ଥା ଉପରେ ସୃଷ୍ଟି କରିଥିଲା ଅନେକ ପ୍ରଶ୍ନବାଚୀ । ଦୋହଲି ଯାଇଥିଲା ଉଭୟ ଶାସନ ଓ ପ୍ରଶାସନ । 2013 ମସିହା ଡିସେମ୍ବର 16 ତାରିଖରେ ଜିଲ୍ଲାର ଜୟପାଟଣା ଅଞ୍ଚଳରୁ 10 ରୁ 15 ଜଣ ଦାଦନ ଶ୍ରମିକ ଅଗ୍ରୀମ ଟଙ୍କା ନେଇ ଦଲାଲ ସହାଯୋଗରେ ଛତିଶଗଡ ଯାଉଥିଲେ । ଆଉ ଠିକ ବେଲପଡା ନିକଟରେ କିଛି ଶ୍ରମିକ ଶୌଚ ବାହାନାରେ ଖସି ଯିବାରୁ ଦଲାଲମାନେ ଉତକ୍ଷିପ୍ତ ହୋଇ ଦୁଇ ଶ୍ରମିକ ଦିଆଲୁ ନିଆଲ ଓ ନିଳାମ୍ବର ଧଙ୍ଗଡା ମାଝୀଙ୍କ ହାତ ପାପୁଲି କାଟି ଦେଇ ଘଟଣାସ୍ଥଳରୁ ଫେରାର ହୋଇ ଯାଇଥିଲେ ।
ପରେ ପର୍ଯାୟକ୍ରମେ ଉଭୟଙ୍କ ଚିକିତ୍ସା ହୋଇଥିଲା । ନିଳାମ୍ବର ଆଜି ଆଉ ନାହାନ୍ତି ସତ, ହେଲେ ଘଟଣାରେ ସମ୍ପୃକ୍ତ ଦୋଷୀକୁ ମିଳିଲା ଦଣ୍ଡ । ସେପଟେ ରୋଜଗାର ଆଶାରେ ଦାଦନ ମୁହାଁ ଦିଆଲୁ ଏବେ ଏକ ଅଭିଶପ୍ତ ଜୀବନ କାଟୁଛନ୍ତି । ସେ ସମୟରେ ଘଟଣାର ପ୍ରାସଙ୍ଗିକତାକୁ ଦେଖି ଜାତୀୟ ମାନବାଧିକାର କମିଶନ ହସ୍ତକ୍ଷେପ କରିଥିଲେ ଆଉ ପ୍ରଶାସନକୁ ଅନେକ ନିର୍ଦ୍ଦେଶ ମଧ୍ୟ ଦେଇଥିଲେ । ହେଲେ ତାହା ଆଜି ପାଣିର ଗାର । ଏହା କେବଳ ଯେ ଉମା ଗୌଡ କିମ୍ବା ଦିଆଲୁଙ୍କ କଥା ନୁହେଁ , ସେ ସଦର ବ୍ଲକ ଇଛାପୁର ଗାଁର ପୀତବାସ ଦୁର୍ଗା ହୁଅନ୍ତୁ ଅବା ନର୍ଲା ବ୍ଲକ ବାଲିପଡାର ସୂର୍ଯ୍ୟ ଝରା, ସମସ୍ତେ ଆଜି ଦାଦନ ଜୁଇରେ ଭସ୍ମିଭୂତ ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
