ଭବାନୀପାଟଣା: ଭାରସାମ୍ୟ ହରାଇ ବ୍ୟାଣ୍ଡ ପାର୍ଟି ଗାଡି ଦୁର୍ଘଟଣାଗ୍ରସ୍ତ । ଗଣେଶ ପୂଜା ବିସର୍ଜନରେ ପ୍ରସେସନ ପାଇଁ ଯାଉଥିବା ସମୟରେ ଭାରସାମ୍ୟ ହରାଇବାରୁ ବ୍ୟାଣ୍ଡ ପାର୍ଟି ଗାଡି ଓଲଟି ପଡ଼ିଥିବା ସୂଚନା । ଦୁର୍ଘଟଣାରେ ପ୍ରାୟ ୨୦ରୁ ଊର୍ଦ୍ଧ୍ବ ଗୁରୁତର ଅବସ୍ଥାରେ ମେଡ଼ିକାଲରେ ଭର୍ତ୍ତି ହୋଇଥିବା ଜଣାପଡିଛି ।
ସୂଚନା ଅନୁସାରେ, କଳାହାଣ୍ଡି ଜିଲ୍ଲା କେସିଙ୍ଗା ସହରର ଗଣେଶ ପୂଜା ବିସର୍ଜନରେ ସାମିଲ ହେବା ପାଇଁ ରାୟପୁର ଦୁର୍ଘ ଅଞ୍ଚଳର ଏକ ବ୍ୟାଣ୍ଡ ପାର୍ଟି ଦଳ କେସିଙ୍ଗା ଅଭିମୁଖେ ଯାଉଥିଲେ । ଏହି ସମୟରେ ଭବାନୀପାଟଣା ବଲାଙ୍ଗୀର ୨୬ ନମ୍ବର ଜାତୀୟ ରାଜପଥ କାନ୍ତେଶୀର ନିକଟରେ ବ୍ୟାଣ୍ଡ ପାର୍ଟି ଗାଡିର ଚକ ଫାଟି ଜିବାରୁ ଗାଡିଟି ଭାରସାମ୍ୟ ହରାଇ ଓଲଟି ପଡିଥିଲା ।
ଫଳରେ ଗାଡିରେ ବସିଥିବା ଏହି ଦଳର ପ୍ରାୟ ୨୦ରୁ ଊର୍ଦ୍ଧ୍ବ ସଦସ୍ୟ ଗୁରୁତର ହୋଇଥିବା ସୂଚନା ମିଳିଛି । ସ୍ଥାନୀୟ ଲୋକେ ପୋଲିସକୁ ଖବର ଦେବା ସହ ଗୁରୁତର ବ୍ୟକ୍ତିଙ୍କୁ ଉଦ୍ଧାର କରି କେସିଙ୍ଗା ଓ ଭବାନୀପାଟଣା ମେଡ଼ିକାଲରେ ଭର୍ତ୍ତି କରିଥିବା ଜଣାପଡ଼ିଛି । ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି ।
ଇଟିଭି ଭାରତ, କଳାହାଣ୍ଡି
