ଭବାନୀପାଟଣା : ପୋଖରୀରେ ବୁଡ଼ି ଯୁବକ ମୃତ । ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ଆଟାଙ୍ଗଗୁଡା ଗାଁରେ । ମୃତବ୍ୟକ୍ତି ଜଣକ ହେଲେ ସେହି ଗାଁର ଯୁବରାଜ ମାଝୀ । ଯୁବରାଜ ପ୍ରତ୍ୟେକ ଦିନ ଭଳି ଆଜି ମଧ୍ୟ ଶ୍ରମିକ ଭାବରେ କାମ କରିବାକୁ ଯାଇଥିଲେ । କାମ ସାରି ଘରକୁ ଫେରି ଗାଁ ମୁଣ୍ଡରେ ଥିବା ପୋଖରୀକୁ ଗାଧୋଇବାକୁ ଯାଇଥିଲେ ।
ତେବେ ଦୀର୍ଘ ସମୟ ଧରି ଯୁବରାଜ ଘରକୁ ନଆସିବାରୁ ପରିବାର ଲୋକେ ଖୋଜାଖୋଜି କରିଥିଲେ ହିଁ ପାଇନଥିଲେ । ପରେ ଗାଁ ପୋଖରୀରେ ଯୁବରାଜଙ୍କ ମୃତଦେହ ଭାସୁଥିବା ଦେଖି ପରିବାର ଓ ଗ୍ରାମବାସୀ ପୋଲିସକୁ ଜଣାଇ ଥିଲେ । ଖବରପାଇ ପୋଲିସ ଓ ଓଡ୍ରାଫ ଟିମ୍ ଘଟଣାସ୍ଥଳରେ ପହଞ୍ଚିଥିଲେ । ସେଠାରେ ମୃତଦେହକୁ ପୋଖରୀ ଭିତରୁ ଉଦ୍ଧାର କରିଥିଲେ । ଏନେଇ ପୋଲିସ ଏକ ମାମଲା ରୁଜୁ କରି ମୃତଦେହ ଜବତ କରିବା ସହ ମୃତଦେହ ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରିଛି ।
ସେପଟେ ଅନ୍ୟ ଏକ ଘଟଣାରେ ଓଟୋ ରିକ୍ସା ଓଲଟି ୩ ଜଣ ଗୁରୁତର ହୋଇଥିବା ଜଣାପଡିଛି । ସୂଚନା ଅନୁଯାୟୀ ଭବାନୀପାଟଣା ସହରର ୨ ଜଣ ଯାତ୍ରୀଙ୍କୁ ନେଇ ଅଟୋଟି ଜୁନାଗଡ଼ ଅଞ୍ଚଳକୁ ଯାଉଥିଲା । ସେହି ସମୟରେ ରିସଗାଁ ଛକ ନିକଟରେ ଭାରସାମ୍ୟ ହରାଇ ଓଲଟିପଡି ଥିଲା ଓଟୋ । ଖବରପାଇ ସ୍ଥାନୀୟ ଲୋକେ ଦୁର୍ଘଟଣାଗ୍ରସ୍ତ ଲୋକଙ୍କୁ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ତେବେ ଏପର୍ଯ୍ୟନ୍ତ ଦୁର୍ଘଟଣାଗ୍ରସ୍ତ ଲୋକଙ୍କ ପରିଚୟ ମିଳି ପାରିନାହିଁ ।
ଇଟିଭି ଭାରତ, କଳାହାଣ୍ଡି
