କଳାହାଣ୍ଡି: ରେଳ ଲାଇନରୁ ଯୁବକଙ୍କ ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର । କଳାହାଣ୍ଡି ଜିଲ୍ଲା ନର୍ଲା ଥାନା ଲାଞ୍ଜିଗଡ଼ ରୋଡ଼ ରେଳ ଲାଇନରୁ ରବିବାର ଜଣେ ଯୁବକଙ୍କ ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର କରିଛି ଟିଟିଲାଗଡ ରେଳ ପୋଲିସ। ମୃତ ଯୁବକ ଜଣଙ୍କ ନବରଙ୍ଗପୁର ଜିଲ୍ଲା ମୈଦଲପୁର ଗାଁର ଏସ ଗଣପତି ଦୋରା ବୋଲି ଜଣାପଡିଛି ।
ତେବେ ମୃତଦେହ ନିକଟରୁ ଏକ ମୋବାଇଲ, ୩ଟି ଟ୍ରେନ ଟିକଟ ଓ ହାତଲେଖା କିଛି ମୋବାଇଲ ନମ୍ବର ସହ ଡ୍ରାଇଭିଙ୍ଗ ଲାଇସେନ୍ସ ମଧ୍ୟ ରେଳବାଇ ପୋଲିସ ଜବତ କରିଛି । ହାତଲେଖା ମୋବାଇଲ ନମ୍ବର ମାଧ୍ୟମରେ ପୋଲିସ ମୃତ ଏସ ଗଣପତିଙ୍କ ପିତାଙ୍କ ସହ ଯୋଗାଯୋଗ କରିଛନ୍ତି ।
ତେବେ ଜବତ ଟିକଟ ଅନୁସାରେ ଏସ ଗଣପତି ଦୋରା ଗତ 17 ତାରିଖ ଦିନ ବିଶାଖାପାଟଣାରୁ ରାୟଗଡ଼ା ଟିକଟ କରିଥିଲେ। କିନ୍ତୁ ରାୟଗଡାରୁ ଲାଞ୍ଜିଗଡ଼ ରୋଡ ଯାତ୍ରା ସମୟରେ ତାଙ୍କର ସନ୍ଦେହ ଜନକ ମୃତ୍ୟୁକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ତେବେ ଉପଯୁକ୍ତ ତଦନ୍ତ ପରେ ଘଟଣାର ପ୍ରକୃତ ସତ୍ୟାସତ୍ୟ ଜଣାପଡ଼ିବ ବୋଲି ପୋଲିସ ପ୍ରକାଶ କରିଛି।
କଳାହାଣ୍ଡିରୁ ଅଜିତ୍ କୁମାର ସିଂ, ଇଟିଭି ଭାରତ
