ଭବାନୀପାଟଣା: ବିଶ୍ବ ଦରବାରରେ ପ୍ରଦର୍ଶିତ ହେବାକୁ ଯାଉଛି କଳାହାଣ୍ଡିର ଲୋକ ସଂସ୍କୃତି ଓ ପରମ୍ପରା । ଆଦିବାସୀ ଅଧ୍ୟୁଷିତ କଳାହାଣ୍ଡି ଜିଲ୍ଲାର କଳା, ସଂସ୍କୃତି ବେଶ ନିଆରା । ସେ ବଜାଶାଲ ବାଦ୍ୟର କଥା ହେଉ କି ବୀର ବାଦ୍ୟ ତଥା ଘୁମୁରା । ସବୁଥିରେ ଭରି ରହିଛି ଲୋକ ସଂସ୍କୃତି ଓ ଲୋକ ପରମ୍ପରା । ଆଉ ଏହି ଲୋକ ସଂସ୍କୃତି ଏବେ ବିଶ୍ୱ ଦରବାରରେ ପ୍ରଦର୍ଶିତ ହେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସହାୟତାରେ ଜାପାନରେ ନିଜ ଲୋକକଳାକୁ ପ୍ରଦର୍ଶିତ କରିବାକୁ ସୁଯୋଗ ପାଇଛନ୍ତି କଳାକାରମାନେ ।
ଆଦିବାସୀ ସଂସ୍କୃତି ଓ ପରମ୍ପରାକୁ ନେଇ ବେଶ ପରିଚିତ ଓଡ଼ିଶାର କଳାହାଣ୍ଡି ଜିଲ୍ଲା । ଆଧୁନିକତାର ଚାକଚକ୍ୟରେ ବି ମଳିନ ପଡିନି ଘୁମୁରାର ଘୁମୁଘୁମୁ ନାଦ ସହ ରସରକେଳି ଓ ମାଏଲାଜଡ଼ । ଏହାସହ ବନବାଦୀର ପରମ୍ପରା ମଧ୍ୟ ଏବେବି ଉଜ୍ଜୀବିତ ହୋଇରହିଛି । ମହାବୀର ଅନୁଷ୍ଠାନର କଳାକାରମାନେ ପୂର୍ବରୁ ନିଜ କଳାକୁ ବିଶ୍ୱ ଦରବାରରେ ପ୍ରଦର୍ଶିତ କରିଥିବାବେଳେ ଏବେ ପୁଣି ଥରେ ଜାପାନରେ ନିଜ କଳାକୁ ପ୍ରଦର୍ଶତ କରିବାକୁ ଯାଉଛନ୍ତି । ଯେଉଁଥିପାଇଁ ସେମାନେ ଜୋରସୋରରେ ଅଭ୍ୟାସ ଜାରି ରଖିଛନ୍ତି । ନିଜ କଳାକୁ ବିଶ୍ୱ ଦରବାରରେ ପ୍ରଦର୍ଶତ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସହଯୋଗ କରିଥିବା କହିବା ସହ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି ଅନୁଷ୍ଠାନର ସଦସ୍ୟ ।
ମହାବୀର ଅନୁଷ୍ଠାନ ପକ୍ଷରୁ ଏନେଇ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି । ଅନୁଷ୍ଠିତ ଏହି ସାମ୍ବାଦିକ ସମ୍ମିଳନୀରେ ମହାବୀର ଅନୁଷ୍ଠାନର ସଭାପତି ତଥା ଘୁମୁରା ଗୁରୁ ଜୟନ୍ତ ବେହେରା, ଜିଲ୍ଲା ସୂଚନା ଓ ଲୋକ ସମ୍ପର୍କ ବିଭାଗ ଅଧିକାରୀ ମନୋଜ ବେହେରା, ଅଜୟ ମିଶ୍ର, ଓ ମହାବୀର ସାଂସ୍କୃତିକ ଅନୁଷ୍ଠାନ ସମ୍ପାଦକ ସତ୍ୟ ସିଂ ପ୍ରମୁଖ ଉପସ୍ଥିତ ଥିବାବେଳେ କଳାକାରମାନେ ମଧ୍ୟ ଉପସ୍ଥିତ ରହିଥିଲେ।
ମହାବୀର ସାଂସ୍କୃତିକ ଅନୁଷ୍ଠାନର ୧୧ଜଣ କଳାକାର ଜାପାନ ପାଇଁ ଯାତ୍ରା ଆରମ୍ଭ କରିବେ । ଜାପାନର ଓସାକାରେ ଅବସ୍ଥିତ କନସଲେଟ ଜେନେରାଲ ଏବଂ ଟୋକିଓର ଇଣ୍ଡିଆନ କାଉନସିଲ ଅଫ୍ କଲ୍ଚର ଓ ଜାପାନରେ ବସତି ସ୍ଥାପନ କରିଥିବା ଓଡିଆ ସମାଜ ତରଫରୁ ନିମନ୍ତ୍ରିତ ହୋଇ ଅନୁଷ୍ଠାନର କଳାକାରମାନେ ଓଡିଶାର ବିଭିନ୍ନ ଲୋକନୃତ୍ୟ ପ୍ରଦର୍ଶନ କରିବାର କାର୍ଯ୍ୟକ୍ରମ ରହିଛି । ଆଉ ଏହାକୁ ନେଇ କଳାକାରମାନଙ୍କ ମଧ୍ୟରେ ବେଶ ଉତ୍ସାହ ଦେଖିବାକୁ ମିଳିଛି । ତେବେ କଳାକରଙ୍କ ଏଭଳି ପ୍ରଦର୍ଶନ ଜିଲ୍ଲା ତଥା ସମଗ୍ର ରାଜ୍ୟ ପାଇଁ ଏକ ଗର୍ବର ବିଷୟ।
ଇଟିଭି ଭାରତ, କଳାହାଣ୍ଡି
