ଭବାନୀପାଟଣା: ମହାମାରୀ କୋରୋନା ସଂକ୍ରମଣ ରୋକିବାକୁ କେଉଁଠି ଲକଡାଉନ ତ ଆଉ କେଉଁଠି ଲାଗୁ ହୋଇଛି ସଟଡାଉନ । ଯଦିଓ କଟକଣା କିଛି ମାତ୍ରାରେ କୋହଳ ହୋଇଛି, ତଥାପି ସ୍ବାଭାବିକ ହୋଇପାରିନାହଁ ସାଧାରଣ ଜୀବନ ଯାତ୍ରା । ଫଳରେ ଅଟକି ରହିଛି ରାଜ୍ୟର ହଜାର ହଜାର ବସ, ଯାହାକି ବସ ମାଲିକ ଓ କର୍ମଚାରୀଙ୍କ କଷ୍ଟକୁ ବଢାଇଦେଇଛି ।
କୋରୋନା ସଂକ୍ରମଣ ଯୋଗୁ ବସ ଯାତାୟାତ କରିପାରୁ ନଥିବାରୁ ଦୁର୍ଦ୍ଦିନରେ ଦିନ କାଟୁଛନ୍ତି ରାଜ୍ୟରେ କାର୍ଯ୍ୟରତ ଅନେକ ବସ କର୍ମଚାରୀ। ମାଲିକ ଆଉ ସରକାରଙ୍କ ଭିତରେ ଆଲୋଚନା ବି ଏଯାଏଁ ଫଳପ୍ରଦ ହୋଇପାରିନି । ସବୁବେଳେ ଚଳଚଞ୍ଚଳ ରହୁଥିବା କଳାହାଣ୍ଡି ଜିଲ୍ଲା ମୁଖ୍ୟ ବସଷ୍ଠାଣ୍ଡ ଏବେ ଖାଁଖାଁ ଲାଗୁଛି । ଗତ ମାର୍ଚ୍ଚ ୨୪ରୁ ଆଜି ପର୍ଯ୍ୟନ୍ତ କୌଣସି ବସ ଚାଲୁନାହିଁ । ଏପରିସ୍ଥିତିରେ ପରିବାର କେମିତି ଚଳାଇବେ, ଏନେଇ ଡ୍ରାଇଭର, କଣ୍ଡକ୍ଟର ଏବଂ ହେଲ୍ପରଙ୍କ ଚିନ୍ତା ବଢିଯାଇଛି । ଗୋଟିଏ ପଟେ ଗାଡି ଚାଲୁନଥିବାରୁ ମାଲିକ ସଙ୍ଘ ହାତ ଟେକି ଦେଇଥିବାବେଳେ ସରକାର ମଧ୍ୟ କର୍ମଚାରୀଙ୍କୁ ଆଡ଼ ଆଖିରେ ଚାହୁଁ ନାହାନ୍ତି । ସ୍ଥିତି ଏଭଳି ହେଲାଣି ଯେ ଦିନ କେଇଟା ପରେ ହୁଏତ ଏମାନଙ୍କ ପରିବାର ଭୋକ ଉପବାସରେ ଦିନ କାଟିବା ପ୍ରାୟତଃ ନିଶ୍ଚିତ ।
ଜିଲ୍ଲାର ବିଭିନ୍ନ ବସଷ୍ଟାଣ୍ଡରେ ଏମିତି ଧାଡି ଧାଡି ହୋଇ ଛିଡା ହୋଇଛି ଶହ ଶହ ବସ । ଡ୍ରାଇଭର ସବୁ ଗାଁକୁ ପଳାଇ ଯାଇଥିବା ବେଳେ କିଛି କିଛି ହେଲ୍ପର ଗାଡି ଜଗି ରହିଛନ୍ତି । ଏଣେ ବସ ଚାଲୁନଥିବାରୁ ଲକ୍ଷ ଲକ୍ଷ ଟଙ୍କାର କ୍ଷତି ସହୁଛନ୍ତି ବସ ମାଲିକ । ଆଗକୁ କେମିତି ଟ୍ୟାକ୍ସ ଓ ଇନସୁକାନ୍ସ ଦାଖଲ କରିବେ ସେ ଚିନ୍ତା ମଧ୍ୟ ଘାରିଛି। ଏଣୁ ଏଭଳି ପରିସ୍ଥିତିରେ କର୍ମଚାରୀଙ୍କୁ ଦରମା ଦେବା ସେମାନଙ୍କ ପକ୍ଷେ ଆଦୌ ସମ୍ଭବ ନୁହେଁ ବୋଲି ସଫା ସଫା କହିଦେଇଛନ୍ତି ବସ ମାଲିକ ।
କଳାହାଣ୍ଡିରୁ ଆଜିତ ସିଂ, ଇଟିଭି ଭାରତ
