ଭାବନୀପାଟଣା: ପୁଣି ଭିଜିଲାନ୍ସ ଜାଲରେ ସରକାରୀ କର୍ମଚାରୀ । କଳାହାଣ୍ଡି ଜିଲ୍ଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଜୁନିଅର ଆସିଷ୍ଟାଣ୍ଡ ଏମ. ଦିବ୍ୟଜ୍ୟୋତି ଭିଜିଲାନ୍ସ ହାବୁଡରେ ପଡିଛନ୍ତି । ମୃତ୍ୟୁ ପ୍ରମାଣପତ୍ର କରେଇ ଦେବାକୁ ଜଣଙ୍କଠାରୁ ୯ ହଜାର ଟଙ୍କା ଲାଞ୍ଚ ନେଉଥିବାବେଳେ ଭିଜିଲାନ୍ସ ଦିବ୍ୟଜ୍ୟୋତିଙ୍କୁ ଗିରଫ କରିଛି । ସୂଚନା ଅନୁଯାୟୀ, କଳାହାଣ୍ଡି ଜିଲ୍ଲା ଥୁଆମୂଳ ରାମପୁର ବ୍ଲକ ଅନ୍ତର୍ଗତ ଗୋପାଳପୁର ଗାଁର ନିଲଝରି ନାଏକ ନିଜ ପରିବାର ୩ ଜଣଙ୍କ ମୃତ୍ୟୁ ପ୍ରମାଣପତ୍ର ପାଇଁ ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଆବେଦନ କରିଥିଲେ ।
ହେଲେ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ କାର୍ଯ୍ୟରତ ଅତିରିକ୍ତ କିରାଣୀ ଏମ. ଦିବ୍ୟଜ୍ୟୋତି ମୃତ୍ୟୁ ପ୍ରମାଣପତ୍ର କରାଇ ଦେବା ପାଇ ଲାଞ୍ଚ ମାଗିଥିଲେ। କାମ ବାବଦରେ ୧୮ ହଜାର ଟଙ୍କା ଲାଞ୍ଚ ମାଗିଥିଲେ । ଦୁଇଟି ଇନଷ୍ଟଲମେଣ୍ଟରେ ୯ ହଜାର ଲେଖାଏଁ ଦେବାକୁ ଡିଲ କରିଥିଲେ କିରାଣୀ ।
ଏହା ବି ପଢନ୍ତୁ...ଲାଞ୍ଚ ନେବାବେଳେ ଧରାପଡିଲେ ଲୋଇସିଂହା ଥାନା ଅଧିକାରୀ
ଏନେଇ ନିଲଝରି ନାଏକ ଭିଜିଲାନ୍ସ ବିଭାଗ ନିକଟରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ଅତିରିକ୍ତ କିରାଣୀଙ୍କୁ ଧରିବା ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ କରିଥିଲା ଭିଜିଲାନ୍ସ ବିଭାଗ । ଅତିରିକ୍ତ କିରାଣୀ ଏମ ଦିବ୍ୟଜ୍ୟୋତି ନିଜ କାର୍ଯ୍ୟାଳୟରେ ଅଭିଯୋଗକାରୀଙ୍କ ଠାରୁ ୯ ହାଜର ଟଙ୍କା ଲାଞ୍ଚ ନେଉଥିବା ବେଳେ ମାଡି ବସିଥିଲା ଭିଜିଲାନ୍ସ ଟିମ ।
ଅଭିଯୁକ୍ତ ଅତିରିକ୍ତ କିରାଣୀଙ୍କଠୁ ରଙ୍ଗ ବୋଳା ଟଙ୍କା ଜବତ କରିବା ସହ ଅତିରିକ୍ତ କିରାଣୀ ଏମ. ଦିବ୍ୟଜ୍ୟୋତିଙ୍କୁ ଗିରଫ କରିଥିଲା । ଏହା ସହ ତଦନ୍ତ ଜାରି ରଖିଥିବା ନେଇ ସୂଚନା ଦେଇଛି ଭିଜିଲାନ୍ସ ବିଭାଗ ।
ନିକଟରେ କିଛି ଦିନ ହେବେ ଲାଞ୍ଚ ନେଇ ଅନେକ ସରକାରୀ କର୍ମଚାରୀ ଭିଜିଲାନ୍ସ ଜାଲରେ ପଡିଛନ୍ତି। ୫ ଦିନ ଭିତରେ ୪ଟି ଘଟଣା ସାମ୍ନାକୁ ଆସିଛି । ଗତକାଲି ୨୦ ହଜାର ଟଙ୍କା ଲାଞ୍ଚ ନେଉଥିବାବେଳେ ବଲାଙ୍ଗୀର ଲୋଇସିଂହା ଥାନା ଅଧିକାରୀଙ୍କୁ ଗିରଫ କରିଥିଲା ଭିଜିଲାନ୍ସ ।
ସେହିପରି ଖୋର୍ଦ୍ଧା ବାଲିଅନ୍ତା RI ଦେବଦତ୍ତ ବିଶ୍ବାଳଙ୍କୁ ୨୦ ହଜାର ଟଙ୍କା ଲାଞ୍ଚ ନେଉଥିବାବେଳେ କାବୁ କରିଥିଲା ଭିଜିଲାନ୍ସ ଟିମ । ଦୁଇ ଦିନ ତଳେ ଢେଙ୍କାନାଳ ଆଇନ ମହାବିଦ୍ୟାଳୟ ମୁଖ୍ୟ କିରାଣୀ ବ୍ୟାକ ପେପର ଫର୍ମ ପୂରଣ ପାଇଁ ଆବଶ୍ୟକ ଆଟେଣ୍ଡାନ୍ସ ସାର୍ଟିଫିକେଟ ପାଇଁ ଜଣେ ଛାତ୍ରଙ୍କ ଠାରୁ ୮,୫୦୦ ଟଙ୍କା ଲାଞ୍ଚ ନେଉଥିବା ବେଳେ ଗିରଫ ହୋଇଥିଲେ ।
ଇଟିଭି ଭାରତ, କଳାହାଣ୍ଡି
