ଭବାନୀପାଟଣା: ଖରା ବର୍ଷା ରୋଗ ପୋକ ସହ ଲଢି ବିଲରେ ସୁନାର ଫସଲ ଫଳାଏ ଚାଷୀ । ହେଲେ ଅମଳ ସମୟ ଆସିଲେ ଚାଷୀ ମନରେ ସରାଗ ଆସେ । କାହିକିଁନା ବର୍ଷ ଯାକର ମୂଲ ଚାଷୀ ଅମଳରୁ ହିଁ ପାଇଥାଏ । ହେଲେ ଏବେ ମଣ୍ତି ସମସ୍ୟା ଯୋଗୁଁ ଚାଷୀ ମୁଣ୍ତରେ ପଡିଛି ଚଡକ । ବର୍ଷଯାକର ଫସଲ ବିକ୍ରି କରିବା ପାଇଁ ଚାଷୀ ମଣ୍ତିକୁ ଧାନ ନେଉଛି । ହେଲେ ମିଲର୍ସଙ୍କ ମନମାନୀ ଯୋଗୁଁ ଚାଷାପୁଅ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛି ।
ଏଭଳି ପରିସ୍ଥିତି ଉପୁଜିଛି କଳାହାଣ୍ତି ଜିଲ୍ଲାରେ । କେଉଁଠି ଶୀତ କାକରରେ ମଣ୍ଡିରେ ଧାନ ପଡି ରହିଛି ତ ଆଉ କେଉଁଠି ଚାଷୀଙ୍କୁ ଟୋକନ ଦେଇ ମିଲର୍ସର ଦେଖାନାହିଁ । କେବଳ ସେତିକି ନୁହେଁ କିଛି ମଣ୍ଡିରେ ମିଲର୍ସମାନେ ଧାନ କୁଇଣ୍ଟାଲ ପିଛା ୮ ରୁ ୯ କେଜି କଟନି ଛଟନି କରୁଥିବା ଚାଷୀ ଅଭିଯୋଗ କରିଛନ୍ତି। ମଣ୍ତିରେ ଧାନ ବିକ୍ରି କରିବା ପାଇଁ ଚାଷୀ ଧାନ ଧରି ଶୀତ କାକରରେ ଜଗି ରହିଛି । ଯାହାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।
ଟୋକନ ଖଣ୍ଡେ ଚାଷୀ ପାଇଥିଲେ ମଧ୍ୟ ଧାନ ବିକ୍ରି ପାଇଁ ବିଭିନ୍ନ ସମସ୍ୟାର ସମ୍ମୁଖିନ ହେଉଛି ଚାଷୀ । ଆଉ କେତେକ ସ୍ଥାନରେ ଚାଷୀଙ୍କୁ ବର୍ତ୍ତମାନ ସୁଦ୍ଧା ଟୋକନ ମିଳି ନ ଥିବା ବେଳେ ଖଳାରେ ଧାନକୁ ଧରି ବସିଛି ଚାଷୀ । ତେବେ ଟୋକାନ ନ ମିଳିବାରୁ ଶେଷରେ ବାଧ୍ୟହୋଇ ଚାଷୀ କମ ଦରରେ ଦଲାଲଙ୍କୁ ନିଜ କଷ୍ଟ ଉପାର୍ଜିତ ଧାନକୁ ବିକ୍ରି କରୁଛି । ଯାହାକି ଯୋଗାଣ ବିଭାଗର ପରିବା ପାଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
କଳାହାଣ୍ତିରୁ ଅଜିତ ସିଂ, ଇଟିଭି ଭାରତ
