କଳାହାଣ୍ଡି: ଚାଷ ଜମିକୁ ପାଣି ଯୋଗେଇ ଦେବା ଦାବିରେ ଚାଷୀଙ୍କ ରାସ୍ତା ଅବରୋଧ । କଳାହାଣ୍ଡି ଜିଲ୍ଲା ଇନ୍ଦ୍ରାବତୀ କେନାଲରୁ ଜୁନାଗଡ଼ ବ୍ଲକ ତଲମଲା ଓ ଆଟିଗାଁ ପଞ୍ଚାୟତରେ ଥିବା ପାଖାପାଖି ୭୦୦ ହେକ୍ଟର ଚାଷଜମିକୁ କେନାଲରୁ ପାଣି ଯୋଗାଣରେ ବ୍ୟାହତ ହେଉଛି । ତୁରନ୍ତ ଏହି ସମସ୍ୟାର ସମାଧାନ ପାଇଁ ଚାଷୀମାନେ ସରକାର ନକଟରେ ଦାବି କରିଛନ୍ତି ।
ସୂଚନା ଅନୁସାରେ ଛୋରିଆଗଡ ଠାରୁ କିଛି ପ୍ରଭାବଶାଳୀ ବ୍ୟକ୍ତି କେନାଲର ଗତିପଥକୁ ଅବରୋଧ କରି ରଖିଥିବା ଅଭିଯୋଗ ହୋଇଛି । ଯାହାଫଳରେ ତଳମୁଣ୍ଡରେ ଥିବା ଆଟିଗାଁ ଓ ତଲମଲା ପଞ୍ଚାୟତ ଚାଷଜମିକୁ ଦୀର୍ଘ ବର୍ଷ ହେବ ପାଣି ମାଡୁନାହିଁ । ଇନ୍ଦ୍ରାବତୀ କୁସୁମଖୁଣ୍ଟି ବିଭାଗୀୟ ଅଧିକାରୀଙ୍କୁ ଅଭିଯୋଗ କଲେ ମଧ୍ୟ ଆଜି ଯାଏଁ କୌଣସି ସୁଫଳ ମିଳିନାହିଁ । ସେପଟେ ଚାଷୀ ପ୍ରତିବର୍ଷ ଜଳ ପାଇଁ ଆର୍ଥିକ ଶୋଷଣର ଶୀକାର ହେଉଥିବା ଅଭିଯୋଗ କରିଛନ୍ତି ।
ଏଣୁ ଏହାର ସ୍ଥାୟୀ ପ୍ରତିକାର ଦାବିରେ ମିଛାଗାଁ ଲଙ୍କେଶ୍ବରୀ ପାଣି ପଞ୍ଚାୟତର ସଭାପତି ଯଶୋବନ୍ତ ପ୍ରଧାନୀ, ତଲମଲା ସରପଞ୍ଚ ଦୁଶିଳା ମାଝୀ, ଆଟିଗାଁ ସରପଞ୍ଚଙ୍କ ନେତୃତ୍ବରେ ଶତାଧିକ ଚାଷୀ ଜୁନାଗଡ଼ ହାତୀନଦୀ ଉପରେ ସକାଳ ୮ ରୁ ରାସ୍ତା ଅବରୋଧ କରି ରଖିବା ଫଳରେ ଜାତୀୟ ରାଜପଥ ୨୬ ଭବାନୀପାଟଣା ଜୟପୁର ଓ ଧର୍ମଗଡ ମୁଖୀଗୁଡା ମଧ୍ୟରେ ଯାତାୟାତ ଠପ ହୋଇପଡିଛି।
କଳାହାଣ୍ଡିରୁ ଅଜିତ ସିଂହ, ଇଟିଭି ଭାରତ
