ଭବାନୀପାଟଣା: ଜମିଜମା ବିବାଦ ମାମଲାକୁ ନେଇ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆତ୍ମହୁତି ଉଦ୍ୟମ । ସଠିକ୍ ସମୟରେ ପୋଲିସର କାର୍ଯ୍ୟାନୁଷ୍ଠାନ ଫଳରେ ବର୍ତ୍ତିଯାଇଛନ୍ତି ଆତ୍ମହତ୍ୟା କରୁଥିବା ପୁରା ପରିବାର। ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲ୍ଲା ଜୁନାଗଡ଼ ଥାନା ଅନ୍ତର୍ଗତ କଳିଆକୁଣ୍ଡଲ ଗ୍ରାମରେ ।
ଅଭିଯୋଗ ଅନୁଯାୟୀ, କଳାହାଣ୍ଡି ଜିଲ୍ଲା ଜୁନାଗଡ଼ ଥାନା ଅନ୍ତର୍ଗତ କଳିଆକୁଣ୍ଡଲ ଗାଁର କ୍ଷେତ୍ର ଚନ୍ଦ୍ର ନାଏକଙ୍କ ବାପା ଦୀର୍ଘ ବର୍ଷ ପୂର୍ବେ ନିଜ ୧୮ ଏକର ଜମିରୁ ଗାଁରେ ଥିବା ଜଗନ୍ନାଥ ମନ୍ଦିରକୁ ୬ ଏକର ଜମି ଦାନରେ ଦେଇଥିଲେ । ହେଲେ ଦୀର୍ଘ ବର୍ଷ ପରେ ସେହି ଗାଁର ଅନାମ ନାଏକ ନାମକ ଜଣେ ବ୍ୟକ୍ତି ଜଗନ୍ନାଥଙ୍କ ଜମିକୁ ହଡପ କରିବା ସହ କ୍ଷେତ୍ର ଚନ୍ଦ୍ର ନାଏକଙ୍କ ନାଁରେ ଥିବା ୧୧ ଏକର ଜମିକୁ ମଧ୍ୟ ହଡପ କରିଥିବା ଅଭିଯୋଗ ହୋଇଛି । ବର୍ତ୍ତମାନ ସୁଦ୍ଧା ୧୮ ଏକର ଜମିରେ ଚାଷ କରୁଛନ୍ତି ଜଗନ୍ନାଥ । ଏହାକୁ ବିରୋଧ କରି କ୍ଷେତ୍ର ଚନ୍ଦ୍ର ନାଏକ ଅନେକ ସମୟରେ ଥାନାରେ ଅଭିଯୋଗ କରିବା ସହ ଜୁନାଗଡ଼ ତହସିଲଦାରଙ୍କ ନିକଟରେ ଅଭିଯୋଗ କରିଥିଲେ । ଅଭିଯୋଗ କରିବା ପରେ ଅନାମ ଆକ୍ରୋଶର ବସବର୍ତ୍ତୀ ହୋଇ ଚନ୍ଦ୍ର ନାଏକଙ୍କ ପରିବାର ଉପରକୁ ଆକ୍ରମଣ କରିବା ସହ ଘର ଭାଙ୍ଗି ଦେଇଥିବା ନେଇ ସେମାନେ ଥାନାରେ ଅଭିଯୋଗ ମଧ୍ୟ କରିଥିଲେ । ହେଲେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବାରୁ ଗତ କିଛି ଦିନ ଧରି ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ କ୍ଷେତ୍ର ଚନ୍ଦ୍ର ନାଏକଙ୍କ ପରିବାର ।
ଜିଲ୍ଲାପାଳ ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ଦେବା ପରେ ଧାରଣାରୁ ଓହରି ଥିଲେ ପରିବାର । ହେଲେ ଜିଲ୍ଲାପାଳ ପ୍ରତିଶ୍ରୁତି ପୂରଣ ନକରିବା ସହ ପରିବାର ଲୋକଙ୍କୁ ହାଇକୋର୍ଟ ଅଭିଯୋଗ କାରିବା ପାଇଁ କହିଥିଲେ । ହେଲେ କ୍ଷେତ୍ରଙ୍କ ପରିବାର ଅତ୍ୟନ୍ତ ଗରିବ ହୋଇଥିବା ବେଳେ ଶେଷରେ ଅତିଷ୍ଠ ହୋଇ ଗୁରୁବାର ଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ପରିବାରର ୧୪ ଜଣ ଆତ୍ମହୁତି ଉଦ୍ୟମ କରିଥିଲେ । ସଠିକ୍ ସମୟରେ ପୋଲିସର କାର୍ଯ୍ୟାନୁଷ୍ଠାନ ଫଳରେ ବର୍ତ୍ତିଯାଇଛନ୍ତି ଆତ୍ମହତ୍ୟା କରୁଥିବା ପୁରା ପରିବାର ।
ଇଟିଭି ଭାରତ, କଳାହାଣ୍ଡି
