ଭବାନୀପାଟଣା:କଳାହାଣ୍ଡି ଜିଲ୍ଲାରେ ପୁଣି ଡାଇରିଆ ଆତଙ୍କ ଦେଖା ଦେଇଛି । ତେବେ ଜିଲ୍ଲାର ଧର୍ମଗଡ ବ୍ଲକର ସନ୍ଧିକୁଲିହାରି ଓ କନା ଗାଁ ଠାରେ ଡାଇରିଆ ଆତଙ୍କ ଦେଖିବାକୁ ମିଳିଛି । ଏଥିରେ 15ରୁ ଉର୍ଦ୍ଧ୍ବ ଗ୍ରାମବାସୀ ଆକ୍ରାନ୍ତ ହୋଇଥିବା ବେଳେ 2ଜଣଙ୍କ ମୃତ୍ୟୁ ହୋଇଥିବା ନେଇ ଅଭିଯୋଗ ହୋଇଛି ।
ସୂଚନା ଅନୁସାରେ, ଗତ ଦୁଇଦିନରେ ସନ୍ଧିକୁଲିହାରି ଗାଁର ଦେଶଣ୍ଡ ବାଗ ଓ କନା ଗାଁ ର ବାସନ୍ତୀ ପରାଭୋଇଙ୍କ ନାମକ ଦୁଇ ଆକ୍ରାନ୍ତଙ୍କ ମୃତ୍ୟ ହୋଇଥିବା ଅଭିଯୋଗ ହୋଇଛି । ତେବେ ସରକାରୀ ଭାବେ ଡାଇରିଆ ଜନିତ ମୃତକଙ୍କ ସୂଚନା ଦିଆ ଯାଇନାହିଁ । ଡାଇରିଆ ବ୍ୟାପିବା ଖବର ଜଣାପଡିବା ପରେ ଗାଁରେ ମେଡ଼ିକାଲ ଟିମ ପହଞ୍ଚି ଲୋକଙ୍କୁ ସ୍ବାସ୍ଥ୍ୟ ସେବା ଯୋଗାଇ ଦେବା ସହ ସଚେତନ କରାଇଥିଲେ । ସେହିପରି ୧୦ ଜଣ ଆକ୍ରାନ୍ତଙ୍କୁ ଧର୍ମଗଡ଼ ମେଡ଼ିକାଲରେ ଭର୍ତ୍ତି କରାଯାଇଥିବା ଜଣାପଡିଛି । ଡାକ୍ତରୂ ଟିମ କହିଛନ୍ତି, "ଗତ ଦୁଇ ଦିନ ମଧ୍ୟରେ ୧୫ଜଣ ଆକ୍ରାନ୍ତ ହୋଇଛନ୍ତି । ସେମାନଙ୍କୁ ଚିକିତ୍ସା ସୁବିଧା ପ୍ରଦାନ କରାଯାଇଛି ।" ତେବେ କେଉଁ କାରଣରୁ ଅଞ୍ଚଳରେ ଡାଇରିଆ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି ସେନେଇ ଜିଲ୍ଲା ସ୍ବାସ୍ଥ୍ୟ ବିଭାଗ ପକ୍ଷରୁ କୌଣସି ସୂଚନା ମିଳି ପାରିନାହିଁ । ସେପଟେ ଗାଁରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବାରୁ ଲୋକେ ଆତଙ୍କିତ ହୋଇ ପଡିଛନ୍ତି ।
ଇଟିଭି ଭାରତ, କଳାହାଣ୍ଡି
