ଭବାନୀପାଟଣା: ଧାନ ଖଳାରେ ବ୍ୟାପକ ଦୁର୍ନୀତି(Corruption in Dhana Khala Money)। ଚାଷୀଙ୍କୁ ପକ୍କା ଧାନ ଖଳା ଯୋଗାଇ ଦେବା ପାଇଁ କୋଟି କୋଟି ଟଙ୍କା ବ୍ୟୟବରାଦ କରୁଛନ୍ତି ସରକାର । କଳାହାଣ୍ଡି ଜିଲ୍ଲାରେ ଧାନଖଳା ଟଙ୍କା ମିଳୁନଥିବା ଅଭିଯୋଗ କରିଛନ୍ତି ଚାଷୀ । ଯାହାକୁ ବିରୋଧ କରି ଚାଷୀ ଓ ଶ୍ରମିକମାନେ କର୍ଲାମୁଣ୍ଡା ବ୍ଲକ ସମ୍ମୁଖରେ ଧାରଣାରେ ବସିଛନ୍ତି ।
ଏହା ମଧ୍ୟ ପଢନ୍ତୁ: ରାଣୀପଡା ପଞ୍ଚାୟତରେ ବ୍ୟାପକ ଦୁର୍ନୀତି: ଧାନ ଖଳା ଟଙ୍କା ଚଳୁ କରିଦେଲେ ବିଭାଗୀୟ ଅଧିକାରୀ !
ଅଭିଯୋଗ ଅନୁଯାୟୀ, କଳାହାଣ୍ଡି ଜିଲ୍ଲା କର୍ଲାମୁଣ୍ଡା ବ୍ଲକରେ ୨୦୧୯-୨୦ ଆର୍ଥିକ ବର୍ଷରେ ବିଭିନ୍ନ ପଞ୍ଚାୟତରେ ଧାନ ଖଳା ନିର୍ମାଣ କାର୍ଯ୍ୟ ଶେଷ ହୋଇଥିଲେ । ହେଲେ କାମ ଶେଷ ହେବା ପରେ ମଧ୍ୟ ପାଉଣା ମିଳିପାରୁନଥିବା ଚାଷୀ ଅଭିଯୋଗ କରିଛନ୍ତି । ଚାଷୀଙ୍କ ସୁବିଧା ପାଇଁ ପ୍ରତ୍ୟେକ ପଞ୍ଚାୟତ ଖଳା ନିର୍ମାଣ ପାଇଁ ଯୋଜନା ରହିଥିବା ବେଳେ କର୍ଲାମୁଣ୍ଡା ବ୍ଲକ ୧୨ଟି ପଞ୍ଚାୟତରେ ଏହି ଖଳା ନିର୍ମାଣ ପାଇଁ ଚାଷୀ ଆଗ୍ରହ ପ୍ରକାଶ କରି ଖଳା ନିର୍ମାଣ କରିଥିଲେ । ହେଲେ ନିର୍ମାଣ ସରିବା ପରେ ବ୍ୟୟ ବରାଦ ହୋଇଥିବା ଟଙ୍କା ନମିଳିବାରୁ ଏନେଇ ବାରମ୍ବାର ବିଡ଼ିଓଙ୍କ ଦ୍ୱାରସ୍ଥ ହୋଇଥିଲେ । ଏଥିରେ ମଧ୍ୟ କୌଣସି ସୁଫଳ ନମିଳିବାରୁ ଚାଷୀ ଓ ଖଳା ନିର୍ମାଣରେ ନିୟୋଜିତ ଶ୍ରମିକମାନେ କର୍ଲାମୁଣ୍ଡା ବ୍ଲକ ସମ୍ମଖରେ ଧାରଣାରେ ବସିଛନ୍ତି । ଯଥାଶୀଘ୍ର ଜିଲ୍ଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ସମସ୍ୟାର ସମାଧାନ ପାଇଁ ଦାବି କରିଛନ୍ତି ଚାଷୀ ।
ଏନେଇ ଚାଷୀ ଅଭିଯୋଗ କରି କହିଛନ୍ତି ଯେ," ସରକାରଙ୍କ ନିର୍ଦ୍ଦେଶକ୍ରମେ ଗତ ସେପ୍ଟେମ୍ବର 2020ରେ କର୍ଲାମୁଣ୍ଡା ବ୍ଲକ ୧୨ ଟି ପଞ୍ଚାୟତରେ ଧାନ ଖଳା ପାଇଁ ଚିଠି ଆସିଥିଲା । ସେଥିମଧ୍ୟରୁ 6ଟି ସ୍ଥାନରେ ଖଳା ନିର୍ମାଣ କରାଯାଇଛି । କିନ୍ତୁ ବର୍ତ୍ତମାନ ସୁଦ୍ଧା ମଧ୍ୟ ସେହି ବିଲ୍ ପାଇପାରୁନାହୁଁ । ଯାହାଫଳରେ ଚାଷୀ ଏବଂ ଶ୍ରମିକମାନେ ନାନା ପ୍ରକାର ସମସ୍ୟା ଭୋଗୁଛନ୍ତି । ଏହି ସମସ୍ୟା ନେଇ ବାରମ୍ବାର ବିଡ଼ିଓଙ୍କ ଦ୍ୱାରସ୍ଥ ହୋଇଥିଲୁ । କିନ୍ତୁ କେହି କର୍ଣ୍ଣପାତ କରିପାରିନଥିଲେ । ଏନେଇ ଆମେ ଆଜି ଧାରଣାରେ ବସିଛୁ । କର୍ଲାମୁଣ୍ଡା ଗୋଷ୍ଠୀଅଧିକାରୀ ଯଦି ସମସ୍ୟାର ସମାଧାନ କରିଦିଅନ୍ତି ତାହାଲେ ଆମେ ଚିରଉପକୃତ ହେବୁ। "
ଗତ ଜାନୁଆରୀ ମାସରେ ମଧ୍ୟ ନୟାଗଡ ରାଣୀପଡା ପଞ୍ଚାୟତରେ ଧାନଖଳାରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ହୋଇଥିଲା । ଅଭିଯୋଗ କଲେ ମଧ୍ୟ ତଦନ୍ତ ହେଉନଥିବା ଅଭିଯୋଗ କରିଥିଲେ ପଞ୍ଚାୟତବାସୀ। ଧାନ ଖଳା ପାଇଁ ଲକ୍ଷ ଲକ୍ଷ ଟଙ୍କା ହଡପ ହୋଇଥିବା ଅଭିଯୋଗ ହୋଇଥିବା ବେଳେ ବ୍ଲକ ପ୍ରଶାସନ ନୀରବ ଦ୍ରଷ୍ଟା ସାଜିଥିବା ଅଭିଯୋଗ ହୋଇଥିଲା।
ଇଟିଭି ଭାରତ, କଳାହାଣ୍ଡି
