ଭବାନୀପାଟଣା: ଲଗାଣ ବର୍ଷା କଳାହାଣ୍ଡି ଜିଲ୍ଲାରେ ଜନଜୀବନ ଅସ୍ତବ୍ୟସ୍ତ କରିଦେଇଛି । ବର୍ଷା ଯୋଗୁଁ ଅନେକ ଗାଁକୁ ଯୋଗାଯୋଗ ବ୍ୟାହତ ହୋଇଛି । ବିଭିନ୍ନ ସ୍ଥାନରେ ଘର ମଧ୍ୟ ଭାଙ୍ଗିଯାଇଥିବା ଜଣାପଡିଛି । ଏହାରି ଭିତରେ ଆଜି ଜିଲ୍ଲାର କେସିଙ୍ଗା ବ୍ଲକ ଅନ୍ତର୍ଗତ ପଥର୍ଲା ଗାଁରେ ପ୍ରବଳ ବର୍ଷାରେ ଏକ ପୋଲ ଧୋଇଯାଇଥିବା ଦେଖିବାକୁ ମିଳିଛି । ପୋଲଟି ଠିକ୍ ଭାବରେ ନିର୍ମାଣ ହୋଇନଥିବାରୁ ଏହା ଧୋଇ ଯାଇଥିବା ଲୋକେ ଅଭିଯୋଗ କରିଛନ୍ତି ।
କଳାହାଣ୍ଡିରେ ଲଗାଣ ବର୍ଷାରେ ଧୋଇଗଲା ପୋଲ
ବୋରିଆରୁ ଗୁର୍ଜିମୁଣ୍ଡା ଗାଁକୁ ସଂଯୋଗ କରୁଥିବା ରାସ୍ତାର ପଥର୍ଲା ଗାଁ ନିକଟରେ ଥିବା ଉରୁ ନାଳ ଠାରେ ପ୍ରଶାସନ ପକ୍ଷରୁ ପୋଲ ନିର୍ମାଣ କାର୍ଯ୍ୟ ଜାରି ରହିଛି । ତେଣୁ ସାଧାରଣ ଲୋକଙ୍କ ପାଇଁ ଏଠାରେ ଏକ ଅସ୍ଥାୟୀ ପୋଲ ନିର୍ମାଣ କରାଯାଇଥିଲା । ହେଲେ ଅସ୍ଥାୟୀ ପୋଲର ନିମ୍ନମାନର କାମ ଯୋଗୁଁ ଏହା ଲଗାଣ ବର୍ଷାରେ ଧୋଇ ଯାଇଥିବା ଅଭିଯୋଗ ହୋଇଛି । ଯେଉଁ କାରଣରୁ ପଥର୍ଲା ଓ କୁଣ୍ଡାବନ୍ଧ ପଞ୍ଚାୟତ ଅନେକ ଗାଁକୁ ଯାତାୟତରେ ସମସ୍ୟା ହେଉଛି ।
ଇଟିଭି ଭାରତ, କଳାହାଣ୍ଡି
