ଭବାନୀପାଟଣା: କଳାହାଣ୍ଡି ଜିଲ୍ଲାରେ ଗତକାଲି(ଶୁକ୍ରବାର) ଦୁଇଟି ପୃଥକ ପୃଥକ ସଡକ ଦୁର୍ଘଟଣାରେ ଦୁଇ ଜଣଙ୍କର ମୃତ୍ୟୁ ହୋଇଛି(2 killed in two separate road accidents) । କଳାହାଣ୍ଡି ନର୍ଲା ଥାନା ଅନ୍ତର୍ଗତ ତୁଲାପଡ଼ା ନିକଟରେ ଭାରସାମ୍ୟ ହରାଇ ଗୋଟିଏ ମିନି ଟ୍ରକ ଗଛରେ ପିଟି ହେବାରୁ ହେଲ୍ପରଙ୍କ ମୃତ୍ୟୁ ହୋଇଥିବା ବେଳେ ଡ୍ରାଇଭର ଅବସ୍ଥା ଗୁରୁତର ରହିଛି । ମୃତକ କଟକ ଜିଲ୍ଲା ବ୍ରାହ୍ମଣ ସାହିଗାଁର ପୂର୍ଣ୍ଣଚନ୍ଦ୍ର ମହାରଣା ବୋଲି ପୋଲିସ ସୂଚନା ଦେଇଛି ।
ଡ୍ରାଇଭରଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ଦୁର୍ଘଟଣାଗ୍ରସ୍ତ ଗାଡିକୁ ଜବତ କରିଛି । ତେବେ ଏହି ମିନି ଟ୍ରକ ଭୁବନେଶ୍ୱରରୁ ନବରଙ୍ଗପୁର ଯାଉଥିବା ବେଳେ ଭାରସାମ୍ୟ ହରାଇ ତୁଲାପଡ଼ା ବୁଲାଣି ନିକଟରେ ଗଛରେ ପିଟି ହୋଇଥିଲା ।
ଅନ୍ୟପଟେ ଚହଗାଁ ନିକଟରେ ଆଉ ଏକ ସଡକ ଦୁର୍ଘଟଣାରେ ଜଣେ ବାଇକ ଆରୋହୀ ପ୍ରାଣ ହରାଇଛନ୍ତି । ଭବାନୀପାଟଣା ସଦର ଥାନା ଅନ୍ତର୍ଗତ ପରମାନନ୍ଦ ପୁର ଗାଁର ପିଣ୍ଟୁ ଗୌଡ଼ କୌଣସି କାମରେ ବୋର୍ଡା ଯାଇ ବାଇକ ଯୋଗେ ନିଜ ଗାଁକୁ ଫେରୁଥିଲେ । ଏହି ସମୟରେ ଚହଗାଁ ନିକଟରେ ସାମ୍ନା ପଟୁ ଦ୍ରୁତ ଗତିରେ ଆସୁଥିବା ଏକ ପିକଅପ୍ ଭ୍ୟାନ ସହ ତାଙ୍କର ମୁହାଁମୁହିଁ ଧକ୍କା ହୋଇଥିଲା । ଘଟଣାସ୍ଥଳରେ ହିଁ ପିଣ୍ଟୁ ଗୌଡଙ୍କ ମୃତ୍ୟୁ ହୋଇଥିବା ବେଳେ ଘଟଣାସ୍ଥଳରୁ ଡ୍ରାଇଭର ଫେରାର ମାରିଥିଲା ।
