ଭବାନୀପାଟଣା: କଳାହାଣ୍ଡି ପୋଲିସର ସଫଳତା । ଗଞ୍ଜେଇ ଚୋରା ଚାଲାଣବେଳେ ୧୦ ଗଞ୍ଜେଇ ମାଫିଆ ଗିରଫ । ଅଭିଯୁକ୍ତମାନଙ୍କ ଠାରୁ ୪ କ୍ବିଣ୍ଟାଲ ୨୭ କେଜି ଗଞ୍ଜେଇ ସହ ଗୋଟିଏ ପିକପ୍ ଭ୍ୟାନ, ଗୋଟିଏ ବୋଲେରୋ ଗାଡି଼, ଗୋଟିଏ ବାଇକ୍, ୫ଟି ମୋବାଇଲ ଓ ନଗଦ ୧୧ହଜାର ୫୬୦ ଟଙ୍କା ଜବତ କରିଛି ପୋଲିସ । ତେବେ ଅଭିଯୁକ୍ତମାନେ ଜୁନାଗଡ଼ ଓ କୋକସରା ଥାନା ଅଞ୍ଚଳର ବୋଲି ପୋଲିସ ଏକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଛି ।
ସୂଚନା ଅନୁଯାୟୀ କଳାହାଣ୍ଡି ଜିଲ୍ଲାର ଜୟପାଟଣା ଥାନା ଅନ୍ତର୍ଗତ ପ୍ରତାପପୁର କେନାଲ ଦେଇ ଗଞ୍ଜେଇ ଚାଲାଣ ହେଉଥିଲା । ବିଶ୍ବସ୍ତ ସୂତ୍ରରୁ ଖବର ପାଇ କଳାହାଣ୍ଡି ଏସପି ଏକ ସ୍ବତନ୍ତ୍ର ଟିମ ପ୍ରସ୍ତୁତ କରି ଚଢ଼ାଉ କରିଥିଲେ । ଏଥିରେ ୧୦ ଜଣ ଗଞ୍ଜେଇ ମାଫିଆଙ୍କୁ ଧରିବାରେ ପୋଲିସ ସଫଳ ହୋଇଛି । ତେବେ ଏହି ଘଟଣାରେ ଅଧିକ ତଦନ୍ତ ଜାରି ରଖିବା ସହ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ପୋଲିସ ସୂଚନା ଦେଇଛି ।
ଇଟିଭି ଭାରତ, କଳାହାଣ୍ଡି
