ଝାରସୁଗୁଡା: ମହିଳାଙ୍କୁ ଗୁଳିକରି ହତ୍ୟା ମାମଲାରେ ଝାରସୁଗୁଡା ପୋଲିସକୁ ବଡ଼ ସଫଳତା । ଛଅ ଘଣ୍ଟା ମଧ୍ୟରେ ଅଭିଯୁକ୍ତ ଗୋପାଳ ଯାଦବକୁ ସୁନ୍ଦରଗଡରୁ ଗିରଫ କରିଛି ପୋଲିସ । ଦୁଇଟି ବନ୍ଧୁକ ସହ 8ଟି ଗୁଳି ଜବତ ହୋଇଛି । ଏକ ସାମ୍ବାଦିକ ସମ୍ମିଳନୀରେ ଉତ୍ତରାଞ୍ଚଳ ଡିଆଇଜି ହିମାଂଶୁ ଲାଲ ଏହି ସୂଚନା ଦେଇଛନ୍ତି ।
ସୂଚନାଯୋଗ୍ୟ ଝାରସୁଗୁଡ଼ା ଥାନା ଅନ୍ତର୍ଗତ ସାରସମାଲ ରୋହିଦାସ ପଡ଼ାରେ ମଙ୍ଗଳବାର ବିଳମ୍ବିତ ରାତିରେ କେହି ଦୁର୍ବୃତ୍ତ ଜଣେ ମହିଳାଙ୍କୁ ଗୁଳିକରି ହତ୍ୟା କରିଥିବା ଅଭିଯୋଗ ହୋଇଥିଲା। ମୃତ ମହିଳା ଜଣକ ଥିଲେ କନକଲତା ରୋହିଦାସ। ଖବର ପାଇ ଝାରସୁଗୁଡା ଏସପି ଅଶ୍ବିନୀ କୁମାର ମହାନ୍ତି, ଏସ୍ଡିପିଓ କୈଳାସ ଆଚାର୍ଯ୍ୟ, ଆଇଆଇସି ସାବିତ୍ରୀ ବଳ ସନ୍ଧାନୀ କୁକୁର ଓ ଏକ ସାଇଣ୍ଟିଫିକ ଟିମ ସହ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ।
କନକଲତାଙ୍କ ଛାତିରେ ଗୁଳିବାଜି ରକ୍ତ ଜୁଡୁବୁଡୁ ଅବସ୍ଥାରେ ବାହାରେ ପଡିଥିବାବେଳେ ତାଙ୍କ ସ୍ବାମୀ ସାନନ୍ଦ ରୋହିଦାସ ଦେଖିବାକୁ ପାଇଥିଲେ ଏବଂ ପରେ ସ୍ଥାନୀୟ ପୋଲିସକୁ ସୂଚନା ଦେଇଥିଲେ । ପୋଲିସ ଏହି ଘଟଣା ଉପରେ ତଦନ୍ତ ଜାରି ରଖି ଶେଷରେ ସୁନ୍ଦରଗଡରୁ ଅଭିଯୁକ୍ତକୁ ଗିରଫ କରିବାରେ ସକ୍ଷମ ହୋଇଛି । ସେ କେଉଁ କାରଣରୁ ହତ୍ୟା କରିଛି ତାହା ପୋଲିସର ଖୋଡତାଳ ପରେ ହିଁ ଜଣାପଡିବ ।
ଝାରସୁଗୁଡାରୁ ରବିନାରାୟଣ ସାହୁ,ଇଟିଭି ଭାରତ
