ଝାରସୁଗୁଡ଼ା: ମଣିପୁର ବର୍ବର କାଣ୍ଡକୁ ନେଇ ସାରା ଦେଶରେ ପ୍ରତିବାଦର ନିଆଁ ଜଳୁଛି। ତେବେ ଏଥିରୁ ବାଦ ପଡ଼ିନାହିଁ ଝାରସୁଗୁଡ଼ା ଜିଲ୍ଲା । ଝାରସୁଗୁଡ଼ା ବସଷ୍ଟାଣ୍ଡଠାରେ ଆଦିବାସୀ ସଂଘ ପକ୍ଷରୁ ଏନେଇ ଆଜି ଏକ ପ୍ରତିବାଦ ସଭା ଅନୁଷ୍ଠିତ ହୋଇଛି। ଏହି ସଭାରେ ମଣିପୁରରେ ହୋଇଥିବା ସ୍ପର୍ଶକାତର ଘଟଣାକୁ ତୀବ୍ର ନିନ୍ଦା କରାଯାଇଛି । ତେବେ ବିଭିନ୍ନ ସଂଘ ଏହି ପ୍ରତିବାଦ ସଭାକୁ ସମର୍ଥନ ଜଣାଇଥିବା ଦେଖିବାକୁ ମିଳିଛି । ମଣିପୁର ହିଂସା ବିରୁଦ୍ଧରେ ଜିଲ୍ଲାପାଳଙ୍କ ଜରିଆରେ ମହାମହିମ ରାଷ୍ଟ୍ରପତିଙ୍କୁ ଦାବିପତ୍ର ମଧ୍ୟ ପ୍ରଦାନ କରାଯାଇଛି ।
ମଣିପୁରରେ ଦଳିତ ମାନଙ୍କ ଉପରେ ହିଂସା ବିରୋଧରେ ଜନ ସଂଗଠନ ତରଫରୁ ପ୍ରତିବାଦ କରଯାଇଛି । ମଣିପୁରରେ ଗତ କିଛି ମାସ ହେଲା ଜାତି ଧର୍ମ ଓ ବିଭିନ୍ନ ସମସ୍ୟାକୁ ନେଇ ହିଂସା କ୍ରମାଗତ ଭାବେ ବଢ଼ିବାରେ ଲାଗିଛି। ଏହି ଘଟଣାକୁ ନେଇ ସମଗ୍ର ଦେଶ ସ୍ତବ୍ଧ ହୋଇଥିବାବେଳେ ଦଳିତ ମହିଳାଙ୍କୁ ଅତ୍ୟାଚାର ଘଟଣା ବର୍ବରତାର ସମସ୍ତ ସୀମା ଅତିକ୍ରମ କରିଛି। ନିକଟରେ ଭାଇରାଲ ହୋଇଥିବା ଭିଡିଓରେ ଦୁଇ ଦଳିତ ମହିଳାଙ୍କୁ ରାସ୍ତାରେ ଉଲଗ୍ନ କରି ସମସ୍ତଙ୍କ ସାମ୍ନାରେ ପରେଡ କରାଯିବା ସହ ଦୁଷ୍କର୍ମ ମଧ୍ୟ ହୋଇଥିଲା । ଏହା ପରେ ପୁରା ଦେଶରେ ଜନ ଆକ୍ରୋଶ ଦେଖିବାକୁ ମିଳିଛି।
ତେବେ ମଣିପୁରେ ଦଳିତ ମହିଳାଙ୍କୁ ଏଭଳି ନିର୍ଯାତନାକୁ ନେଇ ବିଭିନ୍ନ ଜନ ସଂଗଠନ ତରଫରୁ ପ୍ରତିବାଦ କରାଯାଇଛି। ଆଜି ଝାରସୁଗୁଡ଼ା ପୁରୁଣା ବସ ଟର୍ମିନାଲ ପାଖରେ ଥିବା ଗାନ୍ଧୀ ପ୍ରତିମୂର୍ତ୍ତି ନିକଟରେ ବିଭିନ୍ନ ଜନ ସଂଗଠନ ତରଫରୁ ବିକ୍ଷୋଭ ଓ ଅଭିଯୁକ୍ତଙ୍କ ବିରୋଧରେ କଠିନ କାର୍ଯ୍ୟାନୁଷ୍ଠାନ ପାଇଁ ଦାବି କରାଯାଇଛି। ବିକ୍ଷୋଭ ପ୍ରଦର୍ଶନ କରିବା ସହ ଜନ ସଂଗଠନ ତରଫରୁ ଜିଲ୍ଲାପାଳଙ୍କ ଜରିଆରେ ରାଷ୍ଟ୍ରପତିଙ୍କୁ ଦାବିପତ୍ର ମଧ୍ୟ ପ୍ରଦାନ କରାଯାଇଛି ।
