ଝାରସୁଗୁଡା: ରାଜ୍ୟର ଦ୍ଵିତୀୟ ସର୍ବ ବୃହତ ବ୍ଲକ ଭାବେ ଜଣାଶୁଣା ଝାରସୁଗୁଡା ଜିଲ୍ଲା ଅନ୍ତର୍ଗତ ଲଖନପୁରକୁ ୩ ଗୋଟି ବ୍ଲକରେ ବିଭାଜନ ଓ ସବଡିଭିଜନ ମାନ୍ୟତା ଦାବିରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଗଣଧାରଣା କରାଯାଇଛି। ଗୁରବାର ଲଖନପୁର ନାଗରିକ ପରିଷଦ ପକ୍ଷରୁ ଝାରସୁଗୁଡା ଜିଲ୍ଲାର ବେହେରାମାଲ ଛକ ଠାରୁ ଜିଲ୍ଲାପାଳ କାର୍ଯ୍ୟାଳୟ ପାର୍ଯ୍ୟନ୍ତ ଏକ ଶୋଭାଯାତ୍ରାରେ କରି ଦିନିକିଆ ଗଣଧାରଣା ଓ ବୈଠକ ଅନୁଷ୍ଠିତ ହୋଇଥିଲା ।
ଲଖନପୁର ବ୍ଲକକୁ ତିନୋଟି ବ୍ଲକରେ ବିଭାଜିତ କରିବା ସହ ଏକ ନୂତନ ସବଡିଭିଜନର ମାନ୍ୟତା ପ୍ରଦାନ କରିବା ଦାବି ବୋଲି ଲଖନପୁର ନାଗରିକ ପରିଷଦ ପକ୍ଷରୁ ଦାବି କରାଯାଇଛି । ଗତ ନଭେମ୍ବର ମାସରେ ସମାନ ଦାବିକୁ ନେଇ ଲଖନପୁର ପଞ୍ଚାୟତ ସମିତି କାର୍ଯ୍ୟାଳୟ ସମ୍ମୁଖରେ ପାଞ୍ଚଦିନ ଧରି ଗଣଧାରଣା ଓ ବିକ୍ଷୋଭ କରାଯାଇଥିଲା । ପ୍ରକାଶଯୋଗ୍ୟ ଯେ, ଲଖନପୁର ବ୍ଲକକୁ ବିଭାଜନ କରିବାସହ ସବଡିଭିଜନ ମାନ୍ୟତା ପ୍ରଦାନ କରିବା ପାଇଁ ୧୯୯୩, ୧୯୯୮ ଓ ୨୦୨୦ ମସିହାରେ ପଞ୍ଚାୟତ ସମିତି ବୈଠକରେ ସର୍ବସମ୍ମତି କ୍ରମେ ନିଷ୍ପତ୍ତି ନିଆଯାଇଥିଲା ।
ତତ୍କାଳୀନ ଜିଲ୍ଲାପାଳଙ୍କ ଜରିଆରେ ଓଡ଼ିଶାର ମୁଖ୍ୟମନ୍ତ୍ରୀଙ୍କ ସମେତ ସ୍ଥାନୀୟ ଜନପ୍ରତିନିଧିଙ୍କୁ ଲିଖିତ ଦାବିପତ୍ର ମଧ୍ୟ ପ୍ରଦାନ କରାଯାଇଥିଲା। ତେବେ ବର୍ତ୍ତମାନ ସୁଦ୍ଧା କୌଣସି ସୁଫଳ ମିଳିନଥିବାରୁ ଲଖନପୁର ନାଗରିକ ପରିଷଦ ବାଧ୍ୟ ହୋଇ ଗଣଧାରଣା ଆରମ୍ଭ କରିଥିବା ଆନ୍ଦୋଳନକାରୀ ମାନେ କହିଛନ୍ତି ।
ଝାରସୁଗୁଡାରୁ ରବି ନାରାୟଣ ସାହୁ, ଇଟିଭି ଭାରତ
